04.12.1968
Sameinað þing: 17. fundur, 89. löggjafarþing.
Sjá dálk 706 í D-deild Alþingistíðinda. (3709)
80. mál, Vestfjarðaáætlun
Sigurvin Einarsson:
Herra forseti. Það er ekki í fyrsta sinn, sem minnzt er á Vestfjarðaáætlun í þessum sal, en ég verð að viðurkenna, að hæstv. fjmrh. talaði af meiri hreinskilni og sanngirni um þetta mál, en við höfum átt að venjast áður.
Hann skýrði frá því, eins og ég reyndar vissi áður, að Vestfjarðaáætlunin hefði alls ekki verið birt að neinu leyti, nema hvað snertir vegina. Þetta hef ég gagnrýnt mjög á undanförnum þingum, en það hefur ekki verið viðurkennt fyrr en nú. Ég kann hæstv. ráðh. út af fyrir sig þakkir fyrir að vera það hreinskilinn að skýra alveg hreinlega frá þessu. Það kom líka fram í svörum hans, að þessi rammaáætlun, sem hæstv. ríkisstj. hefur látið gera, nær aðeins til nokkurra þátta samgöngumálanna, þ.e. til vega og sá þáttur var birtur. Hún nær til hafna og flugvalla, en það hefur aldrei verið birt, hvernig sá hluti áætlunarinnar var, en hún nær ekki til samgangna á sjó. Þar að auki hefur komið fram, að hún snertir ekkert atvinnulífið, þ.e.a.s. engin áætlun hefur verið gerð um uppbyggingu atvinnulífsins á Vestfjörðum. Hún nær á engan hátt til menntamála. Hún nær ekkert til raforkumála. Og loks vil ég benda á, að hún nær ekki nema til nokkurs hluta Vestfjarða. Það er allstór hluti Vestfjarða, sem hún nær alls ekki til. Það er öll Strandasýsla. Það er ekki einn einasti stafur í henni um þá sýslu. Það er allt Ísafjarðardjúp að innanverðu, það eru fjögur sveitarfélög. Ég veit ekki til, að neitt sé í þessari áætlun, sem snertir Djúpið. Og hún nær ekki til Vestur–Barðastrandarsýslu, nema að því leyti, að einn vegarspotti nær, eftir því sem ég veit bezt, nokkra km yfir mörkin. Ég vil því benda á, að þar sem ólokið er miklu í áætlunargerð fyrir Vestfirði, verður að taka þessi héruð með, alveg eins og önnur héruð, þó að þau séu fámennari. Atvinnuástand hefur verið bágborið þarna víða, að ég ekki tali um rafmagnsmálin, þar sem heil byggðarlög hafa enga raforku.
Þá gat hæstv. ráðh. þess í sambandi við Norðurlandsáætlun, að Strandasýsla hefði verið tekin þar með. Ég hef ekkert orðið var við, að hve miklu leyti, það kann að hafa verið. Ég er ekki að neita því, að það hafi verið tekið tillit til Strandasýslu, hvað snertir ráðstafanir í atvinnumálum. Ég hygg þó, að það hafi að einhverju leyti náð til Hólmavíkur og Drangsness. En hvað samgöngurnar snertir, kemur það ekkert við Norðurlandsáætlun, því að Strandasýsla verður þó að tilheyra Vestfjörðum. Svo er það hvað snertir raforkumálin og svo mætti lengi telja, enda veit ég ekki, hvernig er hægt að tala um Vestfjarðaáætlun, ef hún á ekki að ná til nema nokkurs hluta af Vestfjörðum. Það má ekki skera kjördæmin sundur hér um bil til helminga fyrirvaralaust.
Að lokum vil ég beina því til hæstv. ráðh., hvort honum fyndist ekki ástæða til, þar sem svo mikið er eftir í áætlunargerð fyrir Vestfirði, að kveðja til fulltrúa frá Vestfirðingum sjálfum til þess að undirbúa þær áætlanir, sem enn eru eftir, í hvaða formi sem það er gert, hvort sem það eru þm. eða hreinlega kjörnir fulltrúar af t.d. sýslunefndum og bæjarstjórnum fyrir vestan, svo að ég nefni dæmi. Er það ekki eðlilegast, að hæstv. ríkisstj. hafi ásamt sínum sérfræðingum fulltrúa heiman úr byggðarlögunum til þess að undirbúa áætlanirnar? Ég vil mjög mælast til þess, að slíkt ráð verði upp tekið við áætlunargerð fyrir Vestfirði, sem mikið er eftir af og hæstv. ríkisstj. taki þetta til athugunar. Mér þætti gott að heyra, hvernig hæstv. ráðh. tekur þeirri hugmynd.