11.12.1968
Sameinað þing: 19. fundur, 89. löggjafarþing.
Sjá dálk 714 í D-deild Alþingistíðinda. (3722)
72. mál, innheimta viðbótarskatta og skattsekta
Fjmrh. (Magnús Jónsson):
Herra forseti. Því miður er ógerlegt að svara nákvæmlega þeirri fsp., sem hér er borin fram, a.m.k. ekki nema með meiri vinnu og rannsóknum, en tök eru á að framkvæma, nema þá á mun lengri tíma. Þetta gildir um a– og c–lið, sem eru mjög svipaðs eðlis og það byggist á því, að það er mjög erfitt að sundurliða og sundurgreina, hvað greitt er og hvað vangreitt af einstökum sköttum, sem á greiðendur eru lagðir. Og vitanlega er heldur ekki í rauninni komin nein reynd á það, miðað við síðasta ár, enda býst ég ekki við, að það sé það, sem vakir fyrir hv. fyrirspyrjanda, hvað í rauninni er hægt að segja, að sé vangreitt eða ekki fyrir árið 1968, því að það ár er ekki liðið á enda, en engu að síður er sjálfsagt að reyna að svara þessu svo sem auðið er og hefur þá fyrst og fremst verið miðað við Reykjavík, en þar eru þessi gjöld langhæst, sem tilnefnd hafa verið. Hitt verð ég að játa, að við höfum því miður ekki haft aðstöðu til þess að skoða allt landið í þessu efni, hvernig það stendur.
En eins og ég sagði, er erfitt að svara a— og raunar einnig c–lið, vegna þess að þessari innheimtu er ekki haldið aðskilinni. Meginreglan hefur hins vegar verið sú og þess vegna er því ekki haldið aðskildu, að þessi gjöld hafi verið innheimt á sama hátt og skattar, sem á hafa verið lagðir hverju sinni.
Innheimta þessara skattsekta fer eftir sömu reglum og innheimta annarra opinberra gjalda. Það er tekið reglulega af kaupi, þegar það á við, lögtök gerð í fasteignum eða lausafé og þeim öðrum innheimtuaðgerðum beitt, sem tiltækar eru og uppboðum þegar allt annað þrýtur. Ákveðinn frestur á greiðslu þessara viðbótarskatta eða skattsekta tiltekins árafjölda er ekki veittur og hefur ekki verið samþykktur. Þó getur í einstaka tilfellum verið árangursríkara að semja um lágmarksgreiðslur á mánuði eða viku, eins og stundum eru dæmi til, í stað þess að gera gjaldanda gjaldþrota og tapa öllum gjöldunum. Þetta verður að sjálfsögðu að metast hverju sinni og innheimtumenn eru látnir um að meta það.
Gjaldendum í Reykjavík, sem úrskurðaðir voru fyrir 31. ágúst 1967, bar að greiða samtals af þessum viðbótarsköttum og skattsektum 24 millj. 494 þús. kr. Af þeirri upphæð eru eftirstöðvar 6.2 millj. eða nákvæmlega 6.175.892 kr., og af þeirri upphæð eru 9 aðilar, sem skulda samtals 5.1 millj. Þessar óinnheimtu eftirstöðvar stafa af því, að sumir þeirra eru í gjaldþrotaskiptum, sumir hafa mótmælt lögtökunum, en fasteignauppboð standa fyrir dyrum hjá sumum. Þessar tölur eru miðaðar við 2. des. Þess má geta, að viðbótarálagning eða viðbótarskattar eða skattsektir á þessa 9 aðila, sem ég gat um, nam 13.4 millj. og þar af eru ógreiddar 5.1 millj.
Þeir, sem samtals fengu viðbótarálagningu, voru 127. Þar af hefur 101 gert fullnaðarskil, þannig að 26 aðilar skulda viðbótarálagningu. Um innheimtu á þessum viðbótargjöldum hjá öðrum innheimtumönnum á landinu gilda nákvæmlega sömu reglur, en ég verð að taka fram, eins og ég sagði áðan, að því miður hefur ekki verið auðið að afla nákvæmra upplýsinga um þetta, þar sem svo nákvæmar skilagreinir liggja ekki fyrir frá innheimtumönnum úti á landi, að þetta sé hægt að kanna, nema með sérstakri könnun í hverju umdæmi landsins. Það má því segja, að, að þessu leyti sé fsp. ekki nákvæmlega svarað, en þetta gefur, að ég hygg, nokkuð glögga mynd af því, hvernig sakir standa með innheimtuna.
Eins og upplýsingarnar bera með sér, eru þær miðaðar við gjöld, sem höfðu verið álögð á síðasta ári og þar sem í rauninni er ekki hægt að fella um það dóm núna, hvað er hægt að telja vanskil á þessu stigi varðandi gjöld, sem áttu að koma til innheimtu á þessu ári, enda býst ég við, að fyrir fyrirspyrjanda hafi vakað að fá einmitt glöggt fram, hvað er í vanskilum af þeim gjöldum, sem er hægt að ætlast til, að séu að fullu greidd.
Í b–lið er spurt, hve miklu þessir viðbótarskattar og sektir hafa numið samtals. Svo sem hv. fyrirspyrjandi skýrði frá, greindi ég frá því í fjárlagaræðu minni, hvað hefur verið á lagt af viðbótarsköttum og sektum 31.8. 1968. Það voru 62 millj. 836 þús. kr. Þó ber þess að geta til viðbótar, að ólokið var þá álagningu útsvara, sem lögð eru á af framtalsnefndum hér og þar um landið í 120 málum og ákvörðun sekta í 87 málum.
C–lið hef ég svarað óbeint með því, sem fram kom í sambandi við innheimtuna og ég upplýsti til svars við a–lið.