28.04.1970
Neðri deild: 88. fundur, 90. löggjafarþing.
Sjá dálk 903 í B-deild Alþingistíðinda. (1048)
174. mál, lax- og silungsveiði
Landbrh. (Ingólfur Jónsson):
Herra forseti. Það eru aðeins örfá orð. Hv. framsóknarmenn, sem hér hafa talað, gera aukaatriðin að aðalatriðum, og málflutningur hv. 2. þm. Sunnl. bar það með sér, að hann var ekki mjög sannfærandi. Hann fullyrti, að með því að hafa fimm menn í n. og skipa hana eins og lagt er til, þá muni bændur örugglega vera í minni hl. í veiðimálanefnd. Það hefur ekkert verið sagt frá því enn þá, hver verður skipaður form. n. Sá, sem landbrh. skipar án tilnefningar, verður að vera á móti bændum, til þess að bændur verði í minni hl. í þessari fimm manna n., því að tæplega skipa Búnaðarfélagið og veiðiréttareigendur slíka menn. En fullyrðingar eins og þessar, sem eru alveg staðlausar, koma náttúrlega ekki að neinu gagni og eru ekki málstaðnum til styrktar. Ég vil taka undir það, sem frsm. landbn. sagði hér áðan, að það er alveg óhætt að fullyrða það, að bændur vilja fá frv. fram, þó að veiðimálanefnd verði skipuð fimm mönnum, og þetta er algjört aukaatriði í augum margra þeirra, og sérstaklega verður þetta aukaatriði, þegar reynsla fæst. Það er hægt að veifa þessu framan í menn eins og dulu og segja: „Grýla, grýla“ — eða eitthvað þess háttar. En það dugar skammt, og það er algjörlega ástæðulaust að taka þessar óskir bænda til greina. Það eru aðrar óskir mikilvægari, sem eru bundnar við hagsmuni þeirra, og þeir hafa fengið margt af því inn í þetta frv.
Ég tel ekki ástæðu til að fjölyrða meir um þetta. Mér þykir vænt um, að hv. 2. þm. Sunnl. sagði hér áðan, að hann byggist við, að hann greiddi atkv. gegn frv., ef n. yrði eins og hér er lagt til, en hann fullyrti það ekki. Ef ég þekki hann rétt, þá endurskoðar hann hug sinn um það og fylgir vitanlega frv., þó að n. verði skipuð öðruvísi en hann helzt kýs. Ég trúi ekki öðru.