26.01.1970
Neðri deild: 43. fundur, 90. löggjafarþing.
Sjá dálk 254 í B-deild Alþingistíðinda. (220)
123. mál, tollskrá o.fl.
Fjmrh. (Magnús Jónsson):
Herra forseti. Það eru aðeins örfá orð, sem ég vildi segja hér. Í fyrsta lagi tek ég það fram, varðandi allar þær brtt., sem hv. formaður fjhn. gerði hér grein fyrir og hann flytur, annað hvort með stuðningi meiri hl. n. eða allrar n., eins og var gert við 2. umr. málsins, að um þær allar er það að segja, að þær hafa verið útbúnar í samráði við rn. og hef ég ekkert við þær að athuga. Vil ég mæla með því, að þær verði samþykktar. Sömuleiðis að sjálfsögðu sú till., sem hann gat hér um, að væri flutt sameiginlega af n. í heild.
Varðandi till. þá, sem hv. 5. þm. Austf. gat hér um, þar sem lagt er til að lækka mjög verulega í tolli jarðýtur, þá get ég því miður ekki sagt það sama, að ég geti mælt með þeirri till., ekki vegna þess, að það væri óæskilegt, að jarðýtur væru í lágum tolli og reyndar margt annað, sem telja mætti í því sambandi, en hér er um geysistóran flokk að ræða, þar sem útilokað er að aðgreina jarðýtur sérstaklega. Jarðýtur eru jú notaðar til margvislegra hluta annarra en landbúnaðar og annað væri ókleift með öllu, ef fara ætti inn á þessa braut, en að taka vinnuvélar almennt hér undir. En hér yrði þá um að ræða stórfellt tap fyrir ríkissjóð, sem hann getur ekki tekið á sig eins og sakir standa. Það er þegar búið að fallast á allverulegar breytingar hér og má segja, að teflt sé í nokkra tvísýnu með þær viðbótarniðurfellingar eða lækkanir á tollum, sem þegar hafa verið samþ. eða till. liggja nú fyrir um. Verð ég því miður að segja, að mælirinn er nú meira en fullur, þannig að ég get ekki mælt með þessari till. og verð mjög að fara fram á það, að hv. þd. felli hana.
Varðandi þá till., sem hv. 4. þm. Austf. flutti hér, er það nú fyrst og fremst að segja, að hún varðar að vísu ekki þetta mál nema óbeinlínis og hefur engin áhrif á tollana sem slíka, heldur er þar um að ræða ákvæði varðandi þær reglur, sem fylgja skal við verðlagningu vara í sambandi við þessa tollabreytingu. Ég býst við, að allir hv. þdm. geti verið sammála um það, að það sé hin mesta nauðsyn, að þessar tollalækkanir skili sér, svo sem verða má, í lækkuðu vöruverði. Hitt er annað mál, sem ég tel æskilegt að komi hér fram, að þó svo sé, þá tel ég ekki rétt að gera brtt. um þetta efni í sambandi við tollskrána, enda féllst hv. þm. í rauninni á, að það gæti verið nokkurt efamál, hvort slíkt ætti að gera nú eða ekki. Við höfum mjög fullkomna löggjöf og ákveðna varðandi öll verðlagsmál og sérstaka verðlagsnefnd starfandi, sem að sjálfsögðu hlýtur að taka til endurskoðunar verðlagsákvæði í sambandi við þær tollalækkanir, sem verða. En að slá því föstu í sambandi við tollskrána sem slíka, hvaða reglum sú n. skuli fylgja, tel ég ekki eðlilegt. Ég vil hins vegar taka það fram, að þó ég geti ekki mælt með þessari till. og telji ekki eðlilegt, að hún sé samþykkt hér, þá tel ég ekki, að afstaða manna í því efni feli í sér neina yfirlýsingu um það, að ekki sé rétt og skylt að verðlagsyfirvöld taki fullkomið tillit til þess sjónarmiðs, sem ég hef hér lýst og hv. þm. einnig í sínu máli, að þetta komi eins mikið og mögulegt er hinum almenna neytanda til góða. Það er auðvitað grundvallarnauðsyn, að svo verði. En ég tel sem sagt hvorki eðlilegt né á neinn hátt formlegt, að sú brtt. verði gerð í sambandi við tollskrána, og hygg, að slíkt hafi heldur aldrei verið gert áður, þ.e. að tengja saman verðlagsmál og tollamál.
Um þetta má vafalaust deila, eins og um svo margt annað, en þetta er ástæðan, sem veldur því, að ég tel ekki eðlilegt að samþykkja till., eins og hún liggur fyrir hér, þar sem við höfum þegar mjög sterka stjórn á verðlagsmálunum og hlýtur hún að koma til endurskoðunar á réttum vettvangi.