21.01.1970
Sameinað þing: 31. fundur, 90. löggjafarþing.
Sjá dálk 787 í D-deild Alþingistíðinda. (3708)
913. mál, flutningar frá Reykjavíkurhöfn um veg til álversins
Fyrirspyrjandi (Jón Árm. Héðinsson):
Herra forseti. Ég hef leyft mér á þskj. 224 að heina svo hljóðandi fsp. til samgmrh.: „Hve mikið magn af vörum hefur verið flutt frá Reykjavíkurhöfn um veg til Straumsvíkur frá 1. ágúst til 31. desember 1969 á vegum álversins? Hve miklu magni af vörum var landað á sama tíma í Straumsvíkurhöfn og einnig í Hafnarfjarðarhöfn á vegum álversins? Hvað borgar Eimskipafélag Íslands h.f. í vegasjóð af þessum flutningum frá Reykjavíkurhöfn til Straumsvíkur?“
Tilefni þessarar fsp. er einfaldlega það, að það vakti athygli mína sem Kópavogsbúa og margra annarra, sem áttu leið um þessa fjölförnustu samgönguleið landsins, að æ ofan í æ fóru þungir vöruflutningavagnar með sennilega 10–15 tonn í einu um þessa leið nú í skammdeginu, og eðlilega gekk umferð mjög stirðlega vegna þessa. Stundum voru tugir bíla á eftir þessum vögnum. Hins vegar sýndu bílstjórar þessara vagna mikla lipurð og óku til hliðar og hleyptu bílum fram hjá, en þar á móti skapaðist aukin slysahætta, þegar fólksbílar og aðrir vöruflutningabílar voru að reyna að troða sér fram hjá og umferðin var raunverulega þreföld á þessum mjóa vegi. Eins hefur vaknað löngun hjá mér að vita, hvort Straumsvíkurhöfn væri nokkuð verri til notkunar. Það kann að vera, að hún sé ekki komin á eðlilegt athafnastig, eða er hún enn á því stigi, að ekki sé hægt að nota hana með sama árangri og Reykjavíkurhöfn? Síðast, en ekki sízt, mætti í þessu sambandi vekja athygli á því, að ég veit ekki betur en að í samningum um álverið sé tekið fram, að álverið sé vörugjaldsfrítt af sínum vörum til og frá. Og þá vaknar spurningin um það, hver borgar vörugjöld hér í Reykjavík, eða gefur Reykjavíkurhöfn þessi vörugjöld eftir eða tekur Eimskip á sig kvöðina?
Nú geta verið ágæt rök fyrir því af hendi Eimskipafélagsins að koma með skip sín hingað, þó að vörur séu til álversins. Það mun sennilega koma í ljós í svarinu. Ég var ekki svo nákvæmur í fsp., að það væri ástæða til að telja það upp. En séu vörurnar sáralítill hluti í hverjum farmi, er auðvitað eðlilegt að nýta legutíma skipanna sem bezt, og ef þannig stæði af sér gætu verið góð rök fyrir því að skipa upp í Reykjavík og flytja um veg til Straumsvíkur. En án skýringa finnst manni þetta nokkuð undarlega að hlutunum staðið og ég skal ekki spá í það fyrir fram, um hve mikið magn er hér að ræða, en það kæmi mér ekki á óvart, þó að hér væri orðið um nokkur þúsund tonn að ræða, sem um land hafa farið. Þess vegna bar ég þessa fsp. fram.