17.11.1970
Sameinað þing: 10. fundur, 91. löggjafarþing.
Sjá dálk 597 í D-deild Alþingistíðinda. (4265)
324. mál, námslán og námsstyrkir
Menntmrh. (Gylfi Þ. Gíslason):
Herra forseti. Varðandi það, að þeir Alþb.-menn hafi flutt till. hér á hinu háa Alþingi um meiri fjárveitingar til lánasjóðsins en endanlega hafi verið samþykktar, er það að segja, að það er öllum þm. kunnara en frá þurfi að segja, að mjög algengt er, að stjórnarandstaða flytji till., sem ganga lengra í útgjaldaátt heldur en meiri hl. Alþ. hefur talið eðlilegt eða hefur talið fært. Þessi tillöguflutningur er einn liður í slíkum tillöguflutningi, sem ég er síður en svo að gagnrýna, en auðvitað ber ekki að líta á það sem skilningsleysi á tiltekinni fjárþörf, þeirri, sem hér er um að ræða, þó að slíkar till. ásamt tugum eða hundruðum annarra séu felldar við afgreiðslu hverra einustu fjárlaga. Þetta er engin ný saga og öllum hv. þm. algerlega kunn. En hitt er staðreynd, sem rétt er áð benda á og vekja athygli á, að á undanförnum árum hefur yfirleitt verið farið eftir tillögum stjórnar lánasjóðsins varðandi fjárveitingar til sjóðsins, og ég vona, að allir telji það eðlilegt, að ríkisstj. hafi nánara samráð a.m.k. við stjórn lánasjóðsins en hv. stjórnarandstöðu, að henni þó algerlega ólastaðri.
Hv. þm. spurði, hvað liði ráðningu í starf námsráðgjafa, sem menntmrn. hefur heimild til að ráða. Mér er mikil ánægja að geta hér sagt frá því, að einmitt fyrir nokkrum dögum tókst samkomulag við ágætan ungan menntamann um það, að hann tæki þetta starf að sér og yrði starfsmaður menntmrn. Hér er um að ræða Þorvald Búason eðlisfræðing, sem áður var starfsmaður í Raunvísindastofnun Háskólans. Hann er nákunnugur málefnum námsmanna, hefur sjálfur stundað langt nám erlendis og var mjög lengi í stjórn Sambands ísl. námsmanna erlendis. Hann hefur nú um nokkur ár starfað við Háskóla Íslands, og ég hygg, að segja megi, að fáa menn hefði verið hægt að velja, sem gjörkunnugri væru. Auk þess er hann núna í stjórn eða jafnvel formaður Félagsstofnunar stúdenta eða a.m.k. einn af helztu ráðamönnum þar, þannig að ég hygg, að óhætt sé að segja, að fáa menn hefði verið hægt að finna, sem væru jafn gjörkunnugir högum námsmanna heima og erlendis, háskólum erlendis og háskólanum hér eins og einmitt þessi ungi vísindamaður, sem nú hefur fallizt á að taka þetta starf að sér og er í þann veginn eða mun alveg á næstunni hefja þetta mjög nauðsynlega og mikilvæga starf.