28.02.1974
Sameinað þing: 62. fundur, 94. löggjafarþing.
Sjá dálk 2420 í B-deild Alþingistíðinda. (2228)
414. mál, ríkisjarðir
Fjmrh. (Halldór E. Sigarðsson):
Herra forseti. Út af fsp. hv. þm. Pálma Jónssonar á þskj. 371 vil ég geta þess, að fyrir réttu ári eða þriðjudaginn 27. febr., svaraði ég fsp., sem var hér um bil shlj. þessari fsp., frá hv. þm. Helga Seljan. Sú fsp. var í 5 liðum, en þeir voru þessir:
„1. Hver er fjöldi bújarða í eigu ríkisins í hverju kjördæmi?
2. Á hve mörgum þeirra er búið sjálfstæðu búi?
3. Hve margar jarðir eru nytjaðar frá öðrum bújörðum?
4. Hve margar ríkisjarðir eru leigðar öðrum en bændum?
5. Til hve langs tíma eru jarðir að jafnaði leigðar, og eftir hvaða reglum er farið við ákvörðun um það, hverjum skuli leigja þær jarðir, er losna á hverjum tíma.“
Fsp. hv. 5. þm. Norðurl. v. nú varðandi ríkisjarðir er í þrem líðum. Svar mitt til hv. þm. Helga Seljans er að finna í 16. hefti Alþingistíðinda, sem nær yfir tímabilið 26. febr. til 1. mars 1971.
Um fyrstu tvo liðina má því vísa til þessa svars. Á síðasta ári hafa orðið litlar breytingar á fjölda jarða í ríkiseign og ábúð á þeim. Jarðeignasjóður keypti 2 jarðir á árinu, en 3 jarðir voru seldar. Þannig eru ríkisjarðir nú taldar 819. Í fyrra töldust 626 jarðir í fastri ábúð. Á árinu hefur ein jörð fallið úr ábúð, en mun byggjast í vor og ein eyðijörð byggjast að nýju.
3. tölul. fsp. skil ég þannig, að spurt sé um, hverjir hafi árið 1973 haft afnot jarða í ríkiseign, sem ekki voru í fastri ábúð. Svar við þessari spurningu er þess eðlis, að ég tel ekki rétt að eyða tíma hv. Alþ. í þá upptalningu, sem því fylgir að telja upp hverja jörð eða jarðarskika. Um 120 þessara jarða hafa bændur til afnota til að bæta búskaparaðstöðu sína, mest með því að nýta jarðirnar til beitar. Sumar eru jafnframt notaðar til heyöflunar, þar sem tún eru varin og í sæmilegri rækt. Um 40 jarðir eru á vegum ríkisstofnana, þ. á m. Landgræðslu ríkisins, Skógræktar ríkisins, vitamálastjórnar o.fl. Auk þess eru allmargar eyðijarðir, sem ekki er ráðstafað og enginn hefur bein samningsbundin not af. Flestar eru jarðir þessar í byggðarlögum, sem eru algerlega komin í eyði.
Ég vona, að þetta svar sé nægjanlegt fyrir hv. þm., en mun þessu til viðbótar afhenda honum lista yfir þessar jarðir og jarðarskika, sem spurt er um í 3. lið fsp., þar sem ég tel ekki vera hægt að fara að lesa hann upp hér á hv. Alþ.