27.02.1975
Neðri deild: 48. fundur, 96. löggjafarþing.
Sjá dálk 1957 í B-deild Alþingistíðinda. (1559)
168. mál, ráðstafanir vegna snjóflóða í Norðfirði
Þórarinn Þórarinsson:
Herra forseti. Það er alltaf leiðinlegt að gera kunningja sínum ógreiða, þó að óviljandi sé. Ég verð að játa það, að mér finnst mjög leiðinlegt að ég hef átt þátt í því í þessum umr. að opinbera enn einu sinni hina miklu fáfræði hv. 9. þm. Reykv. í landbúnaðarmálum. Hann var hér að tala um stéttasamtökin og hann virtist líta svo á að Búnaðarfélag Íslands væri alveg sams konar aðili í þessum málum og t.d. félag ísl. iðnrekenda, Landssamband iðnaðarmanna, Alþýðusambandið, Vinnuveitendasambandið o.s.frv. og þess vegna ætti búnaðarþing ekki frekar að fá ríkisstyrk til starfsemi sinnar heldur en þing þessara samtaka. Það er alger misskilningur hjá hv. þm. að Búnaðarfélag Íslands sé nokkuð skylt þessum samtökum. Bændur hafa önnur samtök, sem eru hliðstæð þessum samtökum, þ.e. Stéttarsamband bænda, og bændur kosta starfsemi þess að öllu leyti. Ríkið borgar ekki einn eyri til þess. Búnaðarfélag Íslands er allt annars konar félagsskapur. Búnaðarfélag Íslands eða búnaðarsamtökin, eins og þessi hv. þm. ætti að vita, voru stofnuð til þess að annast alls konar fræðslustarfsemi á vegum bændastéttarinnar, beita sér fyrir aukinni ræktun og öðru þess háttar. Að því hefur Búnaðarfélag Íslands eingöngu unnið í seinni tíð. Það er af þessum ástæðum sem öll starfsemi Búnaðarfélags Íslands er kostuð af ríkisfé og þar af leiðandi búnaðarþing einnig. Til þess að taka hv. þm. í nokkra kennslustund og gera honum ljósara að hverju starf Búnaðarfélags íslands beinist, þá ætla ég að lesa hér upp úr Ríkisreikningnum frá 1972, sundurliðun á þeirri starfsemi sem Búnaðarfélag Íslands hefur með höndum. Það er jarðrækt, garðyrkjumál, fóðurrækt, verkfæraráðunautur, nautgriprækt, sauðfjárrækt, hrossarækt, alifugla- og svínarækt, bygginga- og bútækni, forðagæsla, búnaðarhagfræðiráðunautur, Ráðningarstofa landbúnaðarins, búnaðarfræðsla, starfsemi búnaðarsambanda, landbúnaðarsýningar, bygging djúpfrystistöðva og Búreikningaskrifstofa. Þetta sýnir að starfsemi Búnaðarfélags Íslands beinist að allt öðrum verkefnum en stéttasambandanna. Það annast upplýsinga- og fræðslumál, búnaðarlöggjöf o.s.frv. Það er til að fjalla um þessi mál, sem búnaðarþing er kvatt saman, og það ræðir um þau. Það hefur sýnt sig, að þótt nokkur kostnaður hafi fylgt starfsemi búnaðarþings, þá hefur það borið mjög mikinn árangur í því að auka áhuga bænda á ræktunarbúskap, á bættum kynbótum og margs konar hagræðingu á sviði landbúnaðarins. Þess vegna er eðlilegt að ríkið standi undir kostnaði Búnaðarfélagsins og búnaðarþings.
Það er búið að nefna það hér af öðrum hv. þþm. hvað starfsemi búnaðarþings hefur kostað. Ég sé að árið 1972 hefur kostnaðurinn orðið 11/2 millj. Það er áreiðanlegt, að búnaðarþingið borgar þessa fjármuni betur en flest annað sem ríkið ver fjármunum sínum til.