21.11.1974
Efri deild: 9. fundur, 96. löggjafarþing.
Sjá dálk 312 í B-deild Alþingistíðinda. (214)
45. mál, Húsnæðismálastofnun ríkisins
Flm. (Helgi F. Seljan):
Herra forseti. Ég verð að játa það að ég hef ofmetið þennan hv. þm. mjög mikið. Ég heyrði það glögglega á hans ræðu að það þarf ekki mikið fyrir að koma til að snúa hv. þm. alveg og koma honum á allt aðra skoðun. Ég hef einmitt haldið að hann teldi sitt aðal vera geysilegt sjálfstæði í skoðunum og orð frá einum eða öðrum í því efni hrinu lítt á hv. þm. En svo kom að því að hann sagðist vera reiðubúinn til þess, jafnvel ef einhver óviðurkvæmileg orð féllu á einhvern hátt í umr., að snúa algerlega við blaðinu og hætta að veita góðu máli lið.
En reyndar skildi ég nú ekki hv. þm. almennilega. Ég lýsti engri fyrirlitningu á Breiðholtsframkvæmdunum. Ég benti aðeins á það, að þessar framkvæmdir hafa haft forgang umfram annað í húsnæðismálakerfinu. Það er rétt. Það hefur alltaf verið séð fullkomlega fyrir fjármagni til þessara framkvæmda á undan almenna kerfinu, sem landsmenn almennt hafa orðið að búa við. Þegar hann ræðir um það að húsnæðisleysi sé mikið í Reykjavík, jafnvel meira en úti um land, þá stafar það vitanlega af þeirri öfugþróun í allri byggðaþróun á Íslandi sem við höfum verið að berjast við og þurfum að berjast á móti.
Ég held að það sé alger misskilningur hjá hv. þm. að útibú frá Húsnæðismálastofnun ríkisins verði á kostnað Reykjavíkur. Hann talaði um að þetta mætti ekki verða á kostnað Reykjavíkur. Ekki get ég séð hvernig útibú frá þessari stofnun yrðu það, því að á það var ekki minnst að flytja þessa stofnun frá Reykjavík, það hefur heldur aldrei hvarflað að mér. Ég tel einmitt rétt að þessi stofnun hafi aðsetur sítt í Reykjavík og útibú frá henni séu sem virkust og öflugust úti um land.
Hv. þm. talaði náttúrlega af lítilli þekkingu, sem vonlegt var, um erfiðleika landsbyggðarmanna í sambandi við húsbyggingar og upplýsingaþjónustu það varðandi. Hann sem sagt reiknaði með því að þeir gætu labbað sig upp í Húsnæðismálastofnun væntanlega, fengið þar lista yfir þau plögg sem þeir þyrftu að hafa. En ég get upplýst þennan hv. þm. um það að víða hafa allt fram til þessa tíma meira að segja byggingarfulltrúar einstakra staða ekki getað gefið húsbyggjendum viðhlítandi upplýsingar um þau plögg sem þarna þyrftu að vera til staðar. Húsnæðismálastofnun ríkisins — það var það sem ég deildi á fyrst og fremst — hefur oft ekki látið viðkomandi aðila vita þó að nauðsynleg plögg vantaði í hans skjöl.
Ég hef svolitla reynslu af þessum málum. Það er mjög ríkur þáttur í störfum okkar þm. að annast ýmsa fyrirgreiðslu fyrir menn í sambandi við þessi húsnæðismál, og sú fyrirgreiðsla tekur býsna mikinn tíma hjá okkur. Ég sagði að þessi stofnun hefði aukið upplýsingamiðlun sína til mikilla muna og til mikilla bóta fyrir alla húsbyggjendur, og það er rétt. En ég endurtek það„ að víða hafa upplýsingar verið af mjög skornum skammti og stofnunin ekki látið mönnum í té þær upplýsingar sem þeir hafa á þurft að halda svo að allt væri fyllilega löglegt.
Það er nú einu sinni svo með okkur landsbyggðarmenn að valdið hefur safnast saman hér í Reykjavík, og við erum ekkert að snúa okkur beint að reykvíkingum með einhverju stærilæti, eins og hv. þm. var að tala um, þegar við erum að tala um þetta vald, sem hér hefur safnast saman. Ég hef bent á það t.d. að ég er hér að fjalla um eina af þeim stofnunum, sem ríkisvaldið hefur komið á fót, og það hefur haft forgöngu um það óneitanlega að þjappa saman of miklu valdi einmitt hér á þessu svæði. Það er gegn þessari þróun, gegn þessu valdi sem við erum að berjast og á ekkert skylt við andúð á Reykjavík. Það mætti þá alveg eins benda á það að viðleitni borgarbúa og borgarfulltrúa t.d. hér í Reykjavík væri til þess að efla og treysta hag sinna umbjóðenda, en henni fylgdi um leið viss andúð á íbúum landsbyggðarinnar. Því dettur mér ekki í hug að halda fram. En ég held að hv. þm. þurfi ekki að hafa áhyggjur af því að sveitarfélögin úti um land kvarti og stynji undan því að fá til sín meira vald, fá til sín stofnanir þótt því fylgi hæft og gott starfslið. Hann þarf ekki að hafa áhyggjur af því. Þau hafa hingað til tekið hverri þjónustuaukningu fegins hendi og hverjum góðum starfsmanni fegins hendi þótt það hafi kostað þau eitthvað. Og ég veit ekki heldur til þess, að það sé ástæða til þess fyrir sveitarfélögin, því að þetta er mjög mikilvægt fyrir hvert það sveitarfélag sem fær til sín þetta vald, fær til sín þessa þjónustu.