15.04.1975
Sameinað þing: 63. fundur, 96. löggjafarþing.
Sjá dálk 2910 í B-deild Alþingistíðinda. (2205)
338. mál, eftirstöðvar olíustyrks
Fyrirspyrjandi (Gunnlaugur Finnsson) :
Herra forseti. Fyrirspurn mín til hæstv. viðskrh. er svo hljóðandi:
„Hve há upphæð er enn ógreidd af söluskattsstigi því, sem verja skyldi til niðurgreiðslu á olíu vegna hitunar íbúðarhúsnæðis fyrir tímabilið 1. mars 1974 til 28. febr. 1975 samkv. lögum nr. 5 28. febr. 1974 og lögum nr. 47 frá 14. maí 1974?“
Og í öðru lagi:
„Hvernig verður eftirstöðvunum skipt milli aðila, sem notuðu olíu til hitunar íbúða sinna, og rafveitna, sem notuðu olíu til framleiðslu á raforku til húshitunar?“
Við fsp. þarf harla fáum orðum að bæta. Hún skýrir sig sjálf. Fsp. er fram komin vegna þess að fólk, sem hitar híbýli sín með olíu, á í vaxandi erfiðleikum sökum kostnaðar, ekki síst nú þegar fullur þungi olíuhækkana er fram kominn. Horfa ýmsir fram á það að verða annað tveggja að hírast í hálfköldum húsakynnum eða stofna til skulda ef það er þó mögulegt, en mér er raunar kunnugt um að útsöluaðilar olíu hafa veigrað sér við að loka reikningum þar sem svo er í pottinn búið. Þetta kemur sérstaklega þungt niður á þeim sem búa í gömlu húsnæði og við kaldara loftslag. Á vegum Fjórðungssambands vestfirðinga var gerð á þessu könnun fyrir árið 1973 og þá kom í ljós, svo að dæmi sé nefnt, að þessi liður var 18% hærri í Vestfjarðakjördæmi en landsmeðaltalið segir til um. Fólk, sem býr við þessar aðstæður, og forsvarsmenn þess spyrja því hvort öllum tekjum af söluskattsstiginu, sbr. áðurnefnd lög, hafi verið varið til þessara hluta. Í reglugerð nr. 174 frá 30. maí 1974 er sagt að upphæð styrksins til einstaklinga og rafveitna skuli ákveðinn fyrir hvert tímabil miðað við stöðu Olíusjóðs þá og þá og fjölda þeirra sem styrks njóta. Styrkurinn var fyrir fyrsta tímabilið ákveðinn 1800 kr. fyrir einstakling og breyttist ekki út árið. Hins vegar er vitað að tekjur af hverju söluskattsstigi urðu mun meiri en áætlað var í upphafi liðins árs.
Nú ætti að liggja fyrir hve miklar tekjur söluskattsstigið hefur gefið og hver staða Olíusjóðsins er. Í framsöguræðu hv. 4. þm. Reykn., Ólafs G. Einarssonar, er hann mælti fyrir nál. 28. febr. s. l. varðandi lög um sama efni, kom fram að líkur eru til að eftirstöðvar verði 80 millj. Ég hef hins vegar heyrt að ástæða væri til að ætla að þær muni nema nokkru hærri upphæð og þess vegna þætti mér vænt um að hæstv. viðskrh. upplýsti þessi atriði.