29.04.1975
Sameinað þing: 71. fundur, 96. löggjafarþing.
Sjá dálk 3423 í B-deild Alþingistíðinda. (2521)
228. mál, fjáraukalög 1971
Fjmrh. (Matthías Á. Mathiesen) :
Herra forseti.
Frv. það til fjáraukalaga fyrir árið 1972, sem hér liggur fyrir á þskj. 427, er samið af fjmrn. samkv. till. yfirskoðunarmanna Alþ. eins og fram kemur í aths. þeirra með ríkisreikningi fyrir árið 1972. Er hér sami háttur hafður á og áður. leitað er heimilda fyrir öllum umframgjöldum og eins og frv. ber með sér nemur fjárhæðin samtals 1 milljarði 914 millj. 275 þús. kr.
Við 1. umr. fjárlagafrv. fyrir árið 1974 gerði forveri minn í embætti fjmrh. grein fyrir afkomu ríkissjóðs árið 1972 og jafnframt var lögð fram grg. ríkisbókhaldsins um afkomuna. Þar var nokkur grein gerð fyrir frávikum fjárlaga og reiknings og má vísa til þeirra skýringa.
Fjárlög fyrir árið 1972 gerðu ráð fyrir gjöldum að fjárhæð 16 milljarðar 440 millj. 649 þús. kr. Gjöld Alþ. eru ekki meðtalin enda er ekki leitað heimilda fjárlaga fyrir þeim umframgjöldum. Sambærileg fjárhæð reiknings nam 18 milljörðum 263 millj. 787 þús. kr. eða 1 milljarði 823 millj. 238 þús. kr. umfram fjárlög. Sundurliðun fjáraukalaga miðast við hvert rn. og þar sem gjöld heilbr.- og trmrn. reyndust 91 millj. og 37 þús. kr. undir áætlun fjárlaga er samtala fjáraukalaga 1 milljarður 914 millj. 275 þús. kr.
Ef litið er á stærstu einstöku frávikin, kemur í ljós að 4/5 hlutar umframgjalda má rekja til eftirfarandi fjögurra þátta: Gjöld vegagerðar námu 629 millj. 623 þús. kr. umfram fjárlög. Gjöld vegna niðurgreiðslna á vöruverði námu 495 millj. 652 þús. kr. umfram fjárlög. Vaxtagjöld námu 238 millj. 457 þús. umfram fjárlög. Gjöld Landhelgisgæslu námu 195 millj. 239 þús. kr. umfram fjárlög. Þessir 4 liðir nema samtals 1 milljarði 558 millj. 971 þús. kr. Mismunurinn 355 millj. 304 þús. kr. greinist á ýmsa liði, þ. á m. eru 125 millj. kr. sem eru framlag til Landsvirkjunar sem ekki hafði verið gert ráð fyrir í fjárlögum.
Til nánari skýringar á framangreindum umframgjöldum að fjárhæð 1 milljarður 914 millj. kr. skal þess getið að verulegur hluti þeirra byggist á ýmsum lagaákvæðum, þ. á m. ákvæðum laga um ráðstöfun tiltekinna tekjustofna ríkisins í ákveðin verkefni, lántökuheimildum til umframgjalda á vissum sviðum og notkun heimildarákvæða fjárlaga. Í grg. ríkisbókhaldsins kemur fram að þegar tekið hefur verið tillit til þessara sérstæðu gjaldaheimilda eru umframgjöldin 844.4 millj. kr. á árinu 1972. Hins vegar er þörf á staðfestingu þessara aukafjárveitinga með fjáraukalögum.
Ég legg svo til, herra forseti, að að lokinni þessari umr. verði frv. vísað til 2. umr. og hv. fjvn.
