17.02.1976
Sameinað þing: 52. fundur, 97. löggjafarþing.
Sjá dálk 1952 í B-deild Alþingistíðinda. (1629)
114. mál, sjónvarp á sveitabæi
Steingrímur Hermannsson:
Herra forseti. Mér var legið á hálsi fyrir að dreifa kröftunum um of og mér skilst í því sambandi, af því að Byggðasjóður var sérstaklega nefndur, að Byggðasjóður ætti eiginlega að snúa sér alhliða að þessu verkefni og ætti ekkert að vera að hugsa um annað. Ég vil mótmæla því. Ég hef hvergi látið það koma fram, sem skilja mátti á hv. fyrsta flm. þessarar till., að í frv. því, sem ég flutti ásamt nokkrum öðrum félögum mínum í Ed., sé gert ráð fyrir alhliða endurnýjun á dreifikerfi sjónvarps. Segir í 1. gr. frv. um það verkefni, sem bar er um að ræða, að Ríkisútvarpinu skuli skylt að leggja áherslu á að koma fullnægjandi hljóðvarps- og sjónvarpssendingum til allra landsmanna og til sjómanna á fiskimiðunum í kringum landið. Þarna eru sjómennirnir teknir með, enda er ég þeirrar skoðunar að þörf þeirra sé ákaflega mikil og vafasamt að skilja þá frá í þessu verkefni, því að sums staðar má jafnframt með tiltölulega litlum aukakostnaði fullnægja hvoru tveggja, eins og kemur fram í þeirri skýrslu sem hæstv. menntmrh. lagði fram á s.l. ári. Sums staðar má með því að hækka aðeins sjónvarpsmastur og beina því rétt bæði ná til sveitabæja, sem þess njóta ekki nú, og til sjómanna alllangt út á miðin. Og einnig til frekari áréttingar eru í grg. með þessu frv., þar sem rætt er um kostnaðinn í áætlun sjónvarpsins, taldir ýmsir liðir sem varla geta talist til þess verkefnis sem hér um ræðir, að koma sjónvarpssendingum til þeirra landsmanna sem ekki njóta sjónvarps nú. Ég get að vísu vel skilið að hv. 9. landsk. þm. hafi ekki fylgst með þessu, hún situr í Nd. En mér kemur undarlega fyrir sjónir að hæstv. forseti vor í Ed. skuli ekki hafa tekið eftir þessu, Þar segir jafnframt: „eð koma örbylgjusambandi og varasendum upp hlýtur að teljast til eðlilegrar þróunar sjónvarpskerfisins og því ekki innan þessa verkefnis sem hér um ræðir.“ Ég vil fyrst og fremst leiðrétta þann misskilning að hér sé ekki verið að leggja áherslu á sama viðfangsefnið, en að vísu sjónvarp til sjómanna tekið þarna inn í og það viðurkenni ég að er töluverð aukning á verkefnum. En ég tel eðlilegt að hafa það hvort tveggja saman.
Það er líka víðs fjarri að ég sé að leggjast gegn þessari þáltill. Ég hef hvað eftir annað, eins og ég hef getað fundið orð til, lagt áherslu á að hér er um mikið byggðamál og mannréttindamál og nauðsynjamál og fleira að ræða. En ég er aðeins að gera athugasemd við það, að ég tel að fjáröflunin í till. sé ekki raunhæf. Hver sem leggur þetta til verður að mínu mati annaðhvort að benda á viðbótartekjur fyrir Byggðasjóð eða benda á það sem Byggðasjóður á þá að láta ógert. Ég verð að viðurkenna það, að ég er í mjög miklum vandræðum með að benda á það sem Byggðasjóður ætti að láta ógert. Ég held ég geti mælt fyrir hönd allra, sem þar sitja í stjórn, að við erum allir í mjög miklum vandræðum með það. Viðfangsefnin eru svo gífurlega mörg. Mér finnst að við séum að taka frá einum mikilvægum þætti byggðamála í annan með þessari tilfærslu sem hér er gert ráð fyrir. Við erum að skaða einn þótt við bætum annan, og það finnst mér ekki rétta leiðin. Mér sýnist engin goðgá að ætla þetta þjóðinni sem slíkri í heild, því að fyrir því er gert ráð með þessu gjaldi. Það leggst á alla sjónvarpsnotendur, hvar sem þeir eru á landinu, og þeir eru sem betur fer á fleiri stöðum en í Reykjavík, svo að það þarf ekki að segja að sé eingöngu verið að leggja þetta á reykvíkinga, það er verið að leggja á landsmenn alla. Mér sýnist að þessir menn og svo Alþ. með fjárveitingu í þessu skyni ættu að lyfta þessu litla átaki sem hér er eftir. Þetta er ekki verið að taka frá neinum þætti byggðamála í þennan þó mikilvæga þátt byggðamála. Þetta er mín athugasemd og vildi ég gjarnan að það lægi ljóst fyrir.