08.03.1976
Efri deild: 72. fundur, 97. löggjafarþing.
Sjá dálk 2407 í B-deild Alþingistíðinda. (2004)
183. mál, fjölbrautaskólar
Steinþór Gestsson:
Herra forseti. Þegar lög um fjölbrautaskóla voru sett á árinu 1973 gerði ég að umræðuefni, þegar þau voru til meðferðar hér í hv. d., að eðlilegt væri að fleiri sveitarfélögum en Reykjavík gæfist kostur á því að efna til fjölbrautaskóla. Ég bar þá fram till. um að sú heimild gæti náð til fleiri skóla og um það fjallar 6. gr. eins og hún er núna í lögunum.
Hv. 1. flm. þess frv., sem hér er til umr., hefur nú gert grein fyrir því hverra breytinga hann telur þörf til að gera fjölbrautaskólann aðgengilegri fyrir hin ýmsu sveitarfélög. Get ég að sjálfsögðu fallist á þau rök. Hins vegar verður að viðurkenna að form fjölbrautaskóla er mjög í deiglunni og við vitum ekki nægilega vel hvernig hann á að starfa til þess að hann komi að fullum notum. Og þó að í þessu frv. sé gert ráð fyrir að tengja betur en er gert í lögum iðnfræðslu og aðra fræðslu í landinu, þá er það eigi að síður svo, að margir bera þann ugg í brjósti að til að byrja með verði iðnfræðslan ekki í því lagi innan fjölbrautaskólanna sem hún þarf að verða. Ég er ekki að mæla gegn því að breyting verði gerð á kostnaðarhlutföllum milli ríkis og sveitarfélaga varðandi fjölbrautaskóla, en ég tel að það sé rétt að fara að öllu þessu með gát og að þeir aðilar, sem eru að þreifa sig áfram um skólaform í þessu efni, möguleika til þess að semja um þetta sin á milli, og að því leyti til virðist þetta frv. ekki ganga langt út fyrir það sem mér finnst eðlilegt í þessu efni.
Ég ætla ekki að tefja umræður frekar en orðið er vegna þessa máls. Ég vil aðeins lýsa því að ég tel að það hafi komið í ljós og hafi ásannast með flutningi þessa frv. að sú heimild, sem ég fékk komið inn í lögin á sínum tíma, hafi átt fullan rétt á sér. Og ég vona að þessi mál þróist í þá átt að hægt verði áður en langt um liður að finna eðlilega kostnaðarskiptingu milli þeirra aðila sem þessa skóla reka.