14.04.1977
Neðri deild: 65. fundur, 98. löggjafarþing.
Sjá dálk 3110 í B-deild Alþingistíðinda. (2274)
Umræður utan dagskrár
Forseti (Magnús T. Ólafason):
Vegna ummæla hv. 2. þm. Austurl. vil ég enn ítreka það sem ég sagði í athugasemd minni við mál hv. 3. þm. Reykv. Það var á vitorði þingheims og deildarmanna í gær að þetta mál yrði tekið á dagskrá. Það kom m. a. fram í máli eins af þm. þingflokks hv. 2. þm. Austf., og því var hægur hjá, ef þm. úr þeim þingflokki óskuðu mjög eindregið að málið væri ekki tekið á dagskrá, að koma þeirri ósk á framfæri þá þegar við mig sem vitað var að mundi stjórna þessum fundi. Það var ekki gert. En þá áttu þeir enn þess kost að fara að ákvæðum 44. gr., sem ég vitnaði til áðan, um það að ákveðinn fjöldi þm. getur knúið fram atkvgr. í d. um hvort mál skuli tekið á dagskrá, ef þeir eru ósammála um þá dagskrá sem forseti hefur samið.
Ég vísa því algjörlega á bug ummælum hv. þm. um að þau orð, sem ég lét hér falla, hafi byggst á vanþekkingu á þingvenjum, og því fremur vísa ég á bug þeim ummælum að þar sé um bolabrögð að ræða.