19.04.1977
Neðri deild: 67. fundur, 98. löggjafarþing.
Sjá dálk 3297 í B-deild Alþingistíðinda. (2327)
129. mál, járnblendiverksmiðja í Hvalfirði
Ragnhildur Helgadóttir:
Herra forseti. 2. gr. þessa frv. fjallar um það, að ríkið skuli eiga meira en helming af verksmiðju þeirri sem við fjöllum hér um og að jafnan skuli fulltrúar ríkisins vera í meiri hluta í stjórn verksmiðjunnar. Ekkert ákvæði er í frv. um að Alþ. skuli kjósa þessa fulltrúa ríkisins. En aðalatriðið er þó hitt, að ég tel það ekki vera í verkahring ríkisins að standa í áhættusömum atvinnurekstri og leggja þar undir ríkisfé. Við afgreiðslu frv. til l. um járnblendiverksmiðju vorið 1975 var ég mótfallin þeim gr. frv. sem um þetta atriði fjölluðu. Sú afstaða mín hefur ekki breyst og verður þeim mun ákveðnari sem það er líka óbreytt í þessu frv. að ríkið skuli hafa skyldu til að eignast eða leysa til sín alla verksmiðjuna að 15 árum liðnum ef samstarfsaðilanum sýnist svo. Að þessu vandlega athuguðu sé ég mér ekki annað fært en greiða atkv. gegn 2. gr. og segi nei.
