26.04.1977
Sameinað þing: 81. fundur, 98. löggjafarþing.
Sjá dálk 3766 í B-deild Alþingistíðinda. (2677)
69. mál, áhrif Framkvæmdastofnunar ríkisins og Byggðasjóðs á athugun á atvinnu- og byggðaþróun í landinu
Tómas Árnason:
Herra forseti. Ég skal ekki hafa mörg orð um þetta, en það hvarflar nú að manni sú hugsun, að það felist ákveðinn tilgangur í því að setja rannsókn á ákveðna stofnun, og ég tek því ekki vel sem hv. síðasti ræðumaður talar um í þessu efni. Auðvitað er hér um að ræða það, að verið er að setja öðrum þræði rannsókn á stofnunina. Það er ljóst. Og það er kannske þess vegna sem ég hef talað dálítið í þessu máli. En í því efni vil ég vekja athygli á því, að það gæti verið ástæða til þess að setja rannsókn á ýmislegt fleira í þessu þjóðfélagi. Það gæti verið ástæða til að rannsaka ýmislegt fleira. Það gæti verið ástæða til þess að rannsaka í heild hvernig fjármagni þjóðarinnar er yfir höfuð varið, hve miklu er varið til arðbærra framkvæmda og hve miklu er varið í arðbæran atvinnurekstur. Menn skilja nú fyrr en skellur í tönnum, og það þýðir ekkert að tala við menn eins og hv. þm. var að ræða hér um áðan. Hann ætlar sér auðvitað að reyna að koma lagi á Framkvæmdastofnunina. Það er það sem hann ætlar sér. Og hann gerir það til þess að þjóna ákveðnum öflum, svo ég tali alveg hreinskilnislega um þessi mál. Það er mín skoðun. Eigi að síður kvarta ég ekkert yfir því, þó að það séu rannsökuð eða athuguð ákveðin áhrif, ég hef ekkert á móti því. En það sló mig a. m. k. strax þegar þessi till. kom fram, að hún væri flutt öðrum þræði í þeim tilgangi.
Varðandi Framkvæmdastofnunina er það að segja, að að svo miklu leyti sem hún fjallar um ráðstöfun á fjármagni, þá hefur hún með höndum stjórn á tveimur stórum sjóðum. Annar er Framkvæmdasjóður Íslands, og á þessu ári verða lánaðir úr Framkvæmdasjóði um 6 milljarðar. Hins vegar er Byggðasjóður, en úr honum verða lánaðar um 1700 millj. kr. Framkvæmdasjóðurinn, sem er miklu stærri, starfar ekkert síður í þágu Reykjavíkur og reykvískrar atvinnuuppbyggingar heldur en annarrar uppbyggingar í landinu. Hann gerir engan mun á Reykjavík og öðrum landshlutum í því efni — alls engan. Það er Byggðasjóðurinn sem gerir það. Þó er nú kannske ástæða til þess að vekja athygli á því, af því að það kemur fram í skýrslunni, að það eru lánaðar 93 millj. úr Byggðasjóði til Reykjavíkur og það er meira en í sum önnur kjördæmi landsins. (Gripið fram í.) Reykjavík er ekki alveg afskipt, eða var það ekki á síðasta ári. Ég man nú ekki hvernig þessi skipting var, en ég hygg að það hafi verið lánað meira til Reykjavíkur úr Byggðasjóði á síðasta ári heldur en t. d. í Vesturlandskjördæmi, minnir mig vera.
Varðandi það atriði sem hv. þm. minntist á, þar sem er höfnin í Reykjavík og hafnarmannvirki og hafnaraðstaða, geri ég ráð fyrir að það sé alveg rétt hjá honum, hann er kunnugur þeim málum, að það sé þörf á því að bæta þá aðstöðu. En ég kemst ekki hjá að vekja athygli á því, að vöruflutningar til landsins fara að langsamlega mestu leyti í gegnum Reykjavíkurhöfn, Reykjavíkurhöfn hefur þess vegna miklu meiri tekjur en nokkur önnur höfn á landinu og þar af leiðandi betri aðstöðu til þess að sinna sínum verkefnum, þó að ég efist ekki um það sem hv. þm. sagði áðan, að það sé þörf á því að bæta þar um. Mér er það raunar kunnugt, t. d. í sambandi við strandferðaskipin og margt og margt fleira. En ég skal ekki lengja umr. frekar, en vildi láta koma fram þá skoðun mína, að í leiðinni sé þessi till. hugsuð þannig að það sé ástæða til þess að skoða hjá þeim í Framkvæmdastofnuninni.