27.04.1977
Neðri deild: 74. fundur, 98. löggjafarþing.
Sjá dálk 3840 í B-deild Alþingistíðinda. (2766)
101. mál, virkjun Hvítár í Borgarfirði
Jónas Árnason:
Virðulegi forseti. Það var sitt hvað sem ég vildi sagt hafa þegar ég kvaddi mér hljóðs í fyrradag. Nú verður minna úr slíku, enda er ég nýkominn í salinn og hef ekki fylgst með því, sem gerst hefur á þessum fundi.
Aðeins vildi ég gera ofurlitla aths. varðandi nafnið, hvort við eigum að kalla fossinn Kljáfoss eða Kláffoss. Ég vitnaði í Andrés í Síðumúla í þessu sambandi. Hann hefur mest af sinni ævi búið í næsta nágrenni við þennan stað og heldur því fram, að fossinn hafi alltaf verið nefndur Kláffoss. En hv. þm. Friðjón Þórðarson vitnaði svo í annan mætan mann, Þorstein Þorsteinsson sýslumann, sem var frá Arnbjargarlæk. Það er ekki ýkjalangt frá þessum stað í Hvítá svo að nokkurt mark er takandi líka á því sem Þorsteinn hefur sagt.
En það er held ég ekki alveg rétt sem hv. þm. sagði varðandi Sturlungu í þessu sambandi, að fossinn væri nefndur með nafni í Sturlungu. Ég hygg að svo sé ekki. Það segir hins vegar einhvers staðar að „þeir héldu til brúar“. Þar mun vera átt við þennan stað. En jafnvel þó að talað væri um Kljáfoss í Sturlungu, þá tel ég þá heimild ekki örugga, síður en svo. Það kastast ýmislegt til í handritum þeim hinum fornu. Og mörg eru handritin. Hins vegar legg ég í þessu sambandi miklu meira upp úr því sem stendur í bókum Þorsteins heitins Jósefssonar. Hann var líka úr næsta nágrenni við þennan stað, frá Signýjarstöðum. Og ef hann nefnir fossinn Kljáfoss, þá sýnist mér að það teljist æðimikil rök í málinu, meiri rök en það sem kynni að vera sagt í Sturlungu. Ástæðan til þess er einfaldlega sú, að Þorsteinn Jósefsson hefur að öllum líkindum sjálfur lesið prófarkir að sinni bók, en það gegnir öðru máli um höfund Sturlungu.
