28.04.1977
Efri deild: 67. fundur, 98. löggjafarþing.
Sjá dálk 3862 í B-deild Alþingistíðinda. (2818)
208. mál, byggingarlög
Iðnrh. (Gunnar Thoroddsen):
Herra forseti. Árið 1973 skipaði þáv. félmrh., Hannibal Valdimarsson, 9 manna n. til að endurskoða gildandi lög um byggingarmálefni og semja frv. til byggingarlaga sem gildi fyrir landið allt. N. var einnig falið að gera till. til breytinga á skipulagslögum ef hún teldi slíkt nauðsynlegt í sambandi við endurskoðun byggingarlaganna. Í þessa n. voru skipaðir fulltrúar frá Tæknifræðingafélagi Íslands og landbrn., frá Reykjavíkurborg og Arkitektafélagi Íslands, Verkfræðingafélagi Íslands, Byggingafræðingafélagi Íslands, Sambandi ísl. sveitarfélaga, skipulagsstjórn ríkisins, og formaður var ráðuneytisstjóri félmrn., Hallgrímur Dalberg. Nokkru síðar voru skipaðir til viðbótar í n. fulltrúi frá Meistarasambandi byggingarmanna og frá Sambandi byggingarmanna.
Þessi n. vann mikið og merkilegt starf og skilaði frá sér einróma frv., til byggingarlaga. Það frv. var lagt fyrir síðasta þing og var vísað til 2. umr. í Nd. og til félmn. Félmn. Nd. sendi það til umsagnar allmargra aðila, en henni vannst ekki tími til að afgreiða málið frá sér áður en þingi lyki. Hins vegar var ákveðið að formaður félmn. Nd. og ráðuneytisstjóri félmrn. athuguðu allmargar umsagnir sem fram höfðu komið. Niðurstaðan af þeirri vinnu varð sú, að frv. var lagt fyrir þetta þing, fyrir hv. Nd. að nýju, með nokkrum breytingum sem gerð er grein fyrir í grg. frv. Málið hefur svo verið að nýju til meðferðar í félmn. Nd. og hún skilaði fyrir nokkru áliti þar sem hún mælti einróma með samþykkt frv.
Málið hefur því gengið í gegnum Nd. og er nú komið hingað, og skal ég ekki rekja efni þess að þessu sinni, svo ítarlega sem það er gert í grg. frv. Hér er um að ræða sameiningu og samræmingu á dreifðum lagaákvæðum og að því stefnt að fá byggingarlög fyrir landið í heild.
Ég legg til að frv. verði vísað til 2. umr. og hv. félmn.
