28.04.1977
Neðri deild: 77. fundur, 98. löggjafarþing.
Sjá dálk 3884 í B-deild Alþingistíðinda. (2881)
230. mál, kjarasamningar starfsmanna banka
Dómsmrh. (Ólafur Jóhannesson):
Herra forseti. Þetta frv. er samið að tilhlutan viðskrn., en þó í fullu samráði við bankaráð og bankastjórnir ríkisbankanna svo og fyrirsvarsmenn Sambands ísl. bankamanna. Það hefur um nokkurt skeið verið unnið að undirbúningi frumvarpa um viðskiptabanka í eigu ríkisins og viðskiptabanka sem reknir eru í hlutafélagaformi. Má segja að fyrir liggi nú frv. um það efni, en þó þótti eftir atvikum ekki rétt að leggja þau fyrir þetta þing.
Í yfirlýsingu, sem gefin var þegar samkomulag um kjör bankastarfsmanna var gert 18. júní 1976, kváðust bankaráð og bankastjórnir ríkisbankanna mundu beita sér fyrir því, að í fyrirhugaða löggjöf um viðskiptabankana yrðu sett ákvæði um kjarasamninga bankastarfsmanna. Jafnframt kváðust sömu aðilar mundu beita sér fyrir því, að sett yrðu sérstök lög um kjarasamninga bankastarfsmanna ef ný löggjöf um viðskiptabankana hefði ekki verið samþykkt á Alþ. í febr. s. l. Yfirlýsing þessi var gefin í samráði við ráðh. Í beinu framhaldi af þessari yfirlýsingu er þetta frv. flutt. Efni þess er í megindráttum það sama og laga nr. 29 frá 1976, um kjarasamninga Bandalags starfsmanna ríkis og bæja. Fyrir þeim afbrigðum, sem koma til greina og eru smávægileg, er gerð grein í aths. sem einstökum greinum fylgja.
Frv. hefur hlotið afgreiðslu í Ed., shlj. að ég hygg. Ég vænti þess, að því verði hér í þessari hv. d. tekið með sama skilningi, vegna þess að það er óskað eftir því að þetta frv. verði afgreitt á þessu Alþingi.
Ég leyfi mér að leggja til, herra forseti, að frv. verði að lokinni þessari umr. vísað til fjh.og viðskn.