Heimsókn varaforseta þjóðþings Indónesíu
Unnur Brá Konráðsdóttir, forseti Alþingis, tók í dag á móti varaforseta þjóðþings Indónesíu, hr. Agus Hermanto, og sendinefnd indónesískra þingmanna. Fundinn sat einnig Valgerður Gunnarsdóttir, formaður umhverfis- og samgöngunefndar, en sendinefndin frá Indónesíu hefur á meðan dvölinni stendur kynnt sér hagnýtingu jarðhita.
Á fundinum var rætt um möguleika á samvinnu á sviði jarðhitarannsókna og -nýtingu, tækifæri til samstarfs á sviði fiskveiða og önnur möguleg samstarfssvið. Lýstu bæði Unnur Brá og Agus Hermanto stuðningi við markmið loftslagssamnings Sameinuðu þjóðanna og vilja til að efla samskipti þjóðþings Indónesíu og Alþingis.