Þórhildur Sunna Ævarsdóttir kjörin formaður laga- og mannréttindanefndar
Þórhildur Sunna Ævarsdóttir, þingmaður Pírata, var í dag kjörin formaður laga- og mannréttindanefndar, einnar af málefnanefndum Evrópuráðsþingsins. Þetta er í fyrsta sinn sem íslenskur þingmaður gegnir formennsku í nefndinni.
Verkefni formanns laga- og mannréttindanefndar eru að samþykkja dagskrá nefndarinnar, stýra fundum hennar í Strasborg og fundum nefndarinnar utan þingfunda. Formaðurinn er fulltrúi nefndarinnar á opinberum vettvangi. Að auki situr formaður nefndarinnar í framkvæmdastjórn Evrópuráðsþingsins.
Þórhildur Sunna var tilnefnd til formennskunnar af flokkahópi sínum sem í eru sósíalistar, demókratar og grænir. Kjörtímabili nefndarformanns er til loka ársins 2019.