9. desember 2009
Hlutverk þingmannanefndar
Síðustu daga hefur verið nokkur umfjöllun í fjölmiðlum um væntanlega skýrslu rannsóknarnefndar Alþingis og birtingu hennar, sem og kosningu sérstakrar þingmannanefndar til að fjalla um niðurstöður skýrslunnar. Til að eyða öllum misskilningi vil ég taka skýrt fram að skýrsla rannsóknarnefndarinnar verður birt í heild sinni um leið og hún verður afhent Alþingi. Aldrei hefur staðið til að hafa annan hátt á í þeim efnum. Jafnframt er mikilvægt að Alþingi, sem setti rannsóknina af stað, sé vel undir það búið að taka við skýrslunni. Frumvarpi forsætisnefndar Alþingis, um kosningu sérstakrar þingmannanefndar, er ætlað að tryggja að niðurstöður rannsóknarnefndarinnar fái eðlilega meðferð innan þingsins.
| Lesa meira
30. október 2009
Eftirlitshlutverk Alþingis
Bæta þarf lagarammann um eftirlit Alþingis með störfum ráðherra og stjórnsýslunnar og styrkja þannig lýðræðislegan grundvöll stjórnskipunarinnar.“
Íslenskt samfélag stendur á margan hátt á tímamótum. Hrun fjármálakerfisins hér á landi og ein dýpsta kreppa í íslensku efnahagslífi á síðari tímum leiðir ekki aðeins hugann að þeirri óráðsíu sem virðist hafa einkennt rekstur bankanna og margra fyrirtækja sem flugu hátt á veikburða útrásarvængjum heldur einnig að stjórnkerfinu í heild og þeim gildum sem það er reist á. Hrunið hefur enda leitt til mjög mikillar samfélagsumræðu um lýðræði og ríkisvald þar sem hlutverk Alþingis og tengsl þess við framkvæmdarvaldið hefur oft borið á góma.
| Lesa meira
1. september 2009
Lengsta sumarþing Alþingis á enda runnið
Frammíköll hafa viljað fara úr böndum og nefndi einn þingmaður réttilega við mig að þingmenn hafi ekki kallað frammí heldur gert aðsúg að ræðumönnum. Það er kúnst að kalla framí svo vel fari. Ekki er ætlast til að menn öskri og æpi í þingsalnum, heldur skjóti inn stuttum athugasemdum eða hnyttnum stuttum innskotum. Andsvör þarf líka að fara yfir með nýliðunum, - þau hafa viljað fara út í „skjall samherja“ eins og forverar mínir kölluðu það. En í þeirra tíð voru þingmenn miskunnarlaust reknir úr ræðustól ef þeir stunduðu slíkt, með bjöllusætti og kröfu um andsvar en ekki skjall.
Á þessu þarf að taka í haust. Yfirbragð þingstarfanna verður að bæta og ég er sannfærð um að þingmenn eru sammála mér um það. Standa verður vörð um virðingu Þingsins svo þjóðin hafi trú á Alþingi. Það er undir þingmönnum sjálfum komið.
Nú verður ekkert septemberþing eins og gert er ráð fyrir í þingsköpunum. Það varð að samkomulagi milli mín, forustu þingsins og ríkisstjórnarinnar í ljósi þessa langa sumarþings að fella að þessu sinni niður septemberfundina. Það þýðir þó ekki að við þingmenn sitjum með hendur í skauti næsta mánuðinn, því fer fjarri.
| Lesa meira
31. ágúst 2009
Vinabragð þings Litháa
Það var ánægjulegt á þingforsetafundinum í Osló, nákvæmlega 18 árum upp á dag eftir að við Íslendingar viðurkenndum fyrstir þjóða sjálfstæði Eystrasaltsríkjanna þriggja, afhenti Arūnas Valinskas, forseti Litháíska þingsins mér við frumskjal ályktunar litháíska þingsins. Ályktunin var samþykkt 23. júlí, í henni er skorað á þjóðþing og ríkisstjórnir Evrópusambandsríkjanna að styðja aðildarumsókn Íslands. Var þetta sannkallað vinabragð þings Litháa, en við viðurkenndum sjálfstæði þeirra þennan sama dag , 26. ágúst 1991. „ Við gleymum aldrei ómetanlegum stuðningi og vináttu ykkar Íslendinga á þessum tímum“ sagði Arūnas Valinskas þingforseti þegar hann færði mér innrammað skjalið.
| Lesa meira
31. ágúst 2009
Þingforsetar Norðurlanda og Eystrasaltsríkja funduðu í Ósló
Í síðustu viku var haldinn árlegur fundur þingforseta Norðurlanda og Eystrasaltsríkja og fór fundurinn fram í Ósló að þessu sinni, dagana 25.-27. september. Þessir fundir eru líklega þeir mikilvægustu í alþjóðastarfi forseta Alþingis, enda vettvangur til að efla tengsl við þjóðþing okkar nánustu samstarfsþjóða. Því miður gat ég ekki setið fundinn til enda vegna anna á Alþingi, en 3. og síðasta umræða um ríkisábyrð vegna ICESAVE reikninganna fór fram 27. og 28. sept., eins og kunnugt er, svo ég hentist heim frá Osló daginn eftir að fundurinn hófst en náði að flytja mín innlegg og taka þátt í mikilvægum umræðum áður en ég fór.
Á fundinum í Ósló gerðum við þingforseta grein fyrir stjórnmálum og þingstörfum í löndum okkar. Því miður hefur kreppan leikið Íslendinga og Eystrasaltsríkin illa og ljóst er að Finnar og Svíar finna einnig fyrir samdrætti og auknum erfiðleikum. Það var þó ánægjulegt að Norðmenn og Danir virðast ætla að komast betur út úr kreppunni en flestar aðrar þjóðir.
| Lesa meira
