Ávarp forseta Alþingis á Hátíð Jóns Sigurðssonar, í Jónshúsi 19. júní 2011.

Forsætisráðherra, fv. forseti Íslands, sendiherra og aðrir góðir gestir.
Við erum hér samankomin í fjórða sinn til að fagna Hátíð Jóns Sigurðssonar í Jónshúsi. Hátíðin hefur fram til þessa verið haldin á sumardaginn fyrsta, en að þessu sinni þótti fara betur að halda hana nær lýðveldisdeginum, er við fögnum 200 ára fæðingarafmæli Jóns Sigurðssonar.
Vegna ýmissa viðburða á Íslandi í tengslum við 200 ára afmælið átti hvorki ég, né forsætisráðherra, heimangengt á 17. júní. En mér finnst aftur á móti einkar ánægjulegt að hátíðin skuli haldin í dag; á sjálfan kvenréttindadaginn 19. júní.
Ótalmargt hefur þróast til betri vegar í réttindum kvenna, frá þeim tíma er Jón Sigurðsson háði baráttu sína fyrir auknu sjálfræði Íslands og endurreisn Alþingis, þótt baráttan hafi löngum sótts seint.
43% þingmanna eru nú konur og er Alþingi því í hópi þeirra fimm þjóðþinga sem hafa hæst hlutfall kvenna. Einnig má geta þess að allir þrír handhafar forsetavalds eru nú konur; forseti Alþingis, forsætisráðherra og forseti hæstaréttar.
Ágætu hátíðargestir.
Það er mér sönn ánægja að afhenda frú Vigdísi Finnbogadóttur, fyrrverandi forseta Íslands, Verðlaun Jóns Sigurðssonar forseta nú þegar við minnumst 200 ára afmælis Jóns forseta.
Líkt og fram kom hjá Önnu Agnarsdóttur, formanni úthlutunarnefndar fræðimannsíbúðar Húss Jóns Sigurðssonar, verðskuldar frú Vigdís verðlaunin fyrir margra hluta sakir.
Einnig vil ég ítreka þau orð mín að hún var okkur konum mikilvæg fyrirmynd, ekki bara á Íslandi heldur einnig víðar um lönd. Þá vil ég geta þess að Vigdís Finnbogadóttir er á margan hátt frumkvöðull, líkt og Jón Sigurðsson vissulega var.
Einnig hefur frú Vigdísi verið treyst fyrir mikilvægum trúnaðarstörfum á erlendri grund. Vil ég einkum nefna störf hennar sem velgjörðarsendiherra Sameinuðu þjóðanna, bæði á sviði tungumála sem og í baráttunni gegn kynþáttafordómum og útlendingahatri.
Það myndi vissulega draga afhendingu verðlauna á langinn ef ég ætti að telja upp öll önnur trúnaðarstörf sem frú Vigdísi hafa verið falin, auk fjölmargra heiðursdoktorsnafnbóta, svo ég læt hér staðar numið.
Ég óska þér, kæra Vigdís, innilega til hamingju með verðskuldaða viðurkenningu á störfum þínum í anda hugsjóna og starfa Jóns Sigurðssonar og bið þig að taka við verðlaunum Jóns Sigurðssonar forseta árið 2011.