|
|
Sunnudagur 13. janúar 2008
Verndum Laugaveginn – snúum við blaðinu Andstæðingar niðurrifs húsanna við neðanverðan Laugaveg fengu öflugan rökstuðning fyrir málstað sínum í máli og myndum hjá Sigmundi Davíð Gunnlaugssyni í Silfri Egils í dag. Innlegg hans í umræðuna var eins og talað út úr mínu hjarta. Ég hef verið talsmaður þess að vernda beri gamla bæjarhluta í borginni og sérstaklega Laugaveginn. Á árum áður þegar ég starfaði í ferðaþjónustunni og fór víða um heiminn með íslenska ferðamenn tók ég eftir því hvað gamlir og heildstæðir bæjarhlutar drógu að sér fólk og fyrirtæki, verslanir og veitingastaði. Það bókstaflega iðaði allt af lífi í slíku umhverfi. Það hljóta allir að sjá sem fylgdust með Silfrinu í dag og sáu myndirnar og dæmin sem Sigmundur Davíð tók að það væri mikill skaði og slys að snúa ekki við blaðinu hvað varðar Laugaveginn. Það er ekki of seint. Mig langar að benda á tiltölulega nýleg umhverfisslys sem hafa skaðað miðbæinn. Það eru byggingarnar við Ingólfstorg, - Plaza hótelið, Tryggingamiðstöðin og Morgunblaðshúsið og svo gömlu fallegu húsin, Geysishúsið, Fálkahúsið og Fógetinn og uppgerðu húsin við hliðina á honum út að Herkastalanum. Þarna eyðileggja þessi steinhús samfellu húsanna í Aðalstrætinu og við torgið. Fyrir vikið verður Ingólfstorg aldrei það torg sem það ætti að vera. Fólk safnast saman í umgjörð gömlu húsanna við Austurvöll á góðviðrisdögum, en á Ingólfstorgið mæta menn ekki nema á vel auglýsta útifundi og stoppa þá stutt, - nema hjólabrettabörnin sem nýta sér skábrautirnar og fámennið. Nýverið breytti fosætisnefnd Alþingis ákvörðun fyrri nefndar og ákvað með forgöngu Sturlu Böðvarssonar forseta þingsins að láta gera upp gamla Hótel Skjaldbreið. Það gladdi mig að geta lagt því lið í nefndinni. Skjaldbreið er mikilvægur hlekkur í götumyndinni út frá Dómkirkjunni og Alþingishúsinu, þar sem endurgerð hafa verið tvö gömul hús á vegum Alþingis. Snúum við blaðinu og verndum og endurheimtum gamla arfleifð og sjarma miðbæjarins í Reykjavík, - endurreisum gömlu húsin að Laugavegi 4 og 6. MEIRA... Fimmtudagur 28. júní 2007
Eiturlyfjabölið á dagskrá Í vikunni komst eiturlyfjabölið rækilega til umræðu eftir lát ungrar stúlku sem eiturlyfjasalar rændu lífinu, eins og faðir hennar orðaði það í áhrifamikilli og sorglegri minningargrein um hana. Þar segir hann að eiturlyfjafaraldurinn hafi ekki komist á blað í síðustu kosningum. Það er rétt að það mál hefði mátt bera hærra í kosningabaráttunni. Samfylkingin er eini stjórnmálaflokkurinn sem hefur mótað heildstæða stefnu í vímuefnamálum. Hópur fólks með reynslu af málaflokknum vann stefnuna í vetur undir minni verkstjórn. Í framhaldinu var ályktun samþykkt á landsfundi og er hún birt í heild hér að neðan. Í aðgerðaáætluninni um málefni barna og unglinga, "Unga Ísland", sem var eitt helsta stefnuplagg okkar í kosningunum, var einnig tekið á þessum málaflokki. Fyrsta verkefnið í þeirri aðgerðaáætlun er nú að hefjast, - sem er að vinna á allt of löngum biðlistum barna eftir greiningu á Greiningarstöð ríkisins. Nokkrir þeirra sem unnu hvað ötulast í vímuefnahópnum létu í sér heyra í aðdraganda kosninga um málið og vil ég í sambandi nefna þau Njörð P. Njarðvík og Kristínu Blöndal, sem bæði skrifuðu greinar um málið. Hér að neðan eru stefna og hugmyndir Samfylkingarinnar í málaflokknum, sem ég tel mikilvægt að sem flestir kynni sér. Hún byggist á því að komið verði á laggirnar vímuvarnaráði, sem taki á málaflokknum heildstætt og hafi yfirsýn yfir alla þætti hans: MEIRA... Fimmtudagur 19. apríl 2007
Reykur og gufa í Reykjavík Hér kvaddi vetur í gær með ósköpum í henni Reykjavík. Fyrst brann Haraldarbúð, Fröken Reykjavík og Cafe Ópera - allt hornið Austurstræti-Lækjargata fuðraði upp síðdegis og ekki var líft í miðbænum í nágrenninu, - óskaplegt menningartjón - og svo sprakk heitavatnsæð á Vitastíg í gærkvöldi og 80 stiga heitt vatn rann eins og stórfljót niður Laugaveginn. Sjóðheitt vatnið sprautaðist um götur og gangstéttar og sjö manns brenndust á fótum. Gufan og reykurinn í báðum tilvikum voru slík að Reykjavík stóð undir nafni og meira en það. Jæja, nú er sumarið komið og sólin skín þótt ekki sé hlýtt - það fraus saman í nótt, - sem boðar gott! Er búin að vera á skemmtunum og í skrúðgöngum víða um bæinn í dag og er nú að byrja að henda kosningaefni niður í tösku. Við Rannveig Guðmundsdóttir erum á förum í fyrramálið til Oslóar, Stokkhólms og Kaupmannahafnar til að hitta Íslendinga um helgina og ræða við þá um kosningarnar og stefnumál Samfylkingarinnar. Gleðilegt sumar! MEIRA... Fimmtudagur 22. mars 2007
Er Alcan stjórnmálaflokkur? Í fréttum í gær sagði talsmaður Alcan að fyrirtækið væri í kosningabaráttu og beitti sömu aðferðum og stjórnmálaflokkar. Tilefnið er upplýsingasöfnun og skráning starfsmanna fyrirtækisins á afstöðu Hafnfirðinga til stækkunar álversins. Fram kom að starfsmenn Alcan hringja í Hafnfirðinga, fá fram afstöðu þeirra til stækkunar og skrá hana niður. Hvað á þetta að þýða? Eitt er að þetta milljarða fyrirtæki ausi fé í gjafir til Hafnfirðinga og í auglýsingaherferð, en eigum við að láta það óátalið að erlendir auðhringir safni upplýsingum um skoðanir landsmanna. Þetta minnir mig helst á persónunjósnir bandaríska sendiráðsins og íslenskra stjórnvalda fyrr á árum á óæskilegum skoðunum Íslendinga. Í hvaða stöðu eru starfsmenn settir gagnvart vinnuveitanda sínum? Vita vinir, ættingjar og nágrannar starfsmanna að skoðanaskipti þeirra við starfsmanninn eru færð í gagnagrunn fyrirtækisins? Hvernig ætlar fyrirtækið að nota þessar viðkvæmu persónuupplýsingar? Verða þær notaðar þegar menn sækja um störf hjá Alcan, eða þegar Alcan sækir næst um meiri stækkun? Það verður fróðlegt að heyra niðurstöðu Persónuverndar, sem hefur málið til skoðunar? MEIRA... Fimmtudagur 05. október 2006
Vaxandi ójöfnuður gagnrýndur Í tíð þessarar ríkisstjórnar hefur ójöfnuður aukist mjög. Fyrir áratug vorum við meðal þeirra ríkja þar sem einna mestur jöfnuður ríkti. Nú eru himinn og haf milli þeirra sem hafa mest og venjulegs fólks, millitekju- og láglaunamanna. Hátekjumenn eru með allt upp í 22 milljónir á mánuði á sama tíma og hinn venjulegi maður hefur um 3-3,5 milljónir króna í árstekjur. Þetta mun leiða til stéttaátaka ef jöfnuður verður ekki aukinn á ný. Skattar hafa þrefaldast á láglauna- og meðaltekjuhópana á sama tíma og hátekjuliðið með fjármagnstekjurnar er að greiða um 13% skatt af ofurlaunum sínum. Þetta kom m.a. fram í umræðu um vaxandi ójöfnuð í samfélaginu sem fram fór á Alþingi í dag að frumkvæði Samfylkingarinnar, og þær Jóhanna Sigurðardóttir og Ingibjörg Sólrún tóku þátt í. Lífeyrisþegar sem njóta eingöngu greiðslna almannatrygginga greiða nú verulegan skatt af þeim bótagreiðslum, heilar mánaðartekjur á ári, en greiddu ekki skatt áður. Það er sanngjörn krafa að lífeyrisþegar greiði fjármagnstekjuskatt af lífeyrissparnaði sínum en ekki almennan tekjuskatt eins og nú er. MEIRA... Mánudagur 31. júlí 2006
Hagsmunir neytenda ráði ferðinni Samfylkingin hefur um árabil haft forystu á Alþingi um margvíslegar aðgerðir til að lækka matarkostnað heimilanna. Nú er komin fram vönduð greinargerð og úttekt á orsökum hins háa matvælaverðs hér á landi. Þar kemur fram að meginástæðan sé verð á búvörum. Enn fremur segir þar að engin ein aðferð sé áhrifaríkari til að lækka matarverð en sú að lækka tolla á landbúnaðarvörur. Landbúnaðarkerfið hér á landi er úrelt kerfi sem bitnar á neytendum. Við erum að greiða um 28 milljarða til þessa kerfis, um 14 milljarða í beingreiðslur til bænda og álíka mikið til viðbótar í tolla og innflutningsvernd. Þingflokkur Samfylkingarinnar hefur lýst stuðningi við tillögur Hallgríms Snorrasonar í skýrslu matvælaverðsnefndarinnar og lagt til að samhliða þeim verið leitað leiða til að auðvelda bændum aðlögun að breytingunum sem þeim fylgja. MEIRA... Sunnudagur 22. janúar 2006
Skattalækkunarbrellur ríkisstjórnarinnar staðfestar Stefán Ólafsson prófessor hefur staðfest málflutning Samfylkingarinnar um að skattastefna ríkisstjórnarinnar hafi aukið skattbyrði almennings, þvert á það sem stjórnarliðar hafa haldið fram með stöðugu skattalækkunartali. Stefán sýnir fram á að skattbyrðin hefur aukist verulega á 90% heimila og dregið hefur úr kaupmáttaraukningu fólks, en 10% heimila hafa notið skattalækkana, - þ.e. þeir sem eru allra tekjuhæstir. Undir þetta hefur Gylfi Magnússon dósent við Háskóla Íslands tekið. Það ber að hrósa fræðimönnum eins og þeim Stefáni þegar þeir kynna slíkar staðreyndir. Undanfarin ár hefur oft virst sem vísindamenn hafi ekki þorað að kynna upplýsingar sem sýna fram á að stjórnvöld fari með rangt mál í málfutningi sínum. Þar hefur stjórnarandstaðan oft verið ein í í slagnum, þótt hagsmunahópar hafi reyndar stundum lagt henni lið. Vonandi sýnir framganga þessara fræðimanna að tímar óttans undir stjórn Davíðs Oddsonar séu liðnir. Árni Mathiesen fjármálaráðherra reyndi af veikum mætti að andmæla grein Stefáns í Morgunblaðinu daginn eftir að hún birtist, en öll rök skorti. Fyrirsögn þeirrar fréttar var: "Grein Stefáns meiri brella en skattalækkanir ríksstjórnarinnar" – og þar með var ráðherrann að viðurkenna að meintar skattalækkanir ríkisstjórnarinnar væru brella! Ekki tókst honum í máli sínu að hrekja neitt af því sem fram kom í grein Stefáns, "Stóra skattlækkunarbrellan". Ég hvet alla til að lesa grein Stefáns, en hún birtist miðvikudaginn 18. janúar í miðopnu Morgunblaðsins. Þar er skýrt út hvernig ríkisstjórnin lækkaði skatta með annarri hendinni og hækkaði síðan með hinni. Afleiðingin er sú sem getið er hér að ofan. Lífeyrisþegar og láglaunafólk á vinnumarkaði bera skattbyrðarnar í góðærinu. Þannig eru áherslurnar hjá þeirri hægristjórn sem hér er við völd. Þetta breytist ekki fyrr en Samfylkingin kemst í ríkisstjórn og stefna jafnaðarmanna um samhjálp og réttlátt samfélag kemst í framkvæmd. MEIRA... Fimmtudagur 24. nóvember 2005
Er kirkjan nógu kristileg? Nú erum við að ná þeim langþráða áfanga að allir verði jafnir fyrir íslenskum lögum með samþykkt lagabálkanna í frumvarpinu um réttarstöðu samkynhneigðra og breytingartillögu sem Guðrún Ögmundsdóttir þingmaður Samfylkingarinnar hefur boðað í nefndinni sem fjallar um málið á Alþingi. Með þessari lagasetningu verður fólki ekki lengur mismunað eftir kynhneigð. Þegar við erum að ná þessum áfanga eftir langa réttindabaráttu samkynheigðra virðist þjóðkirkjan ætla að draga lappirnar og treystir sér ekki til þess að samþykkja að samkynhneigð pör geti fengið hjónavígslu eins og önnur pör fyrr en í fyrsta lagi eftir tvö ár, ef samkomulag næst þá um það! Ekki finnst mér þetta bera vott um kristilegt hugarfar kirkjunnar manna. Margir prestar hafa lýst yfir því að þeir vilji að allir hafi sama rétt til hjónabands og þeir vilji gjarnan gefa saman samkynhneigð pör í kirkjum sínum, en einhverjir afturhaldsseggir virðast ráða þarna ferðinni. Ég hvet þjóðkirkjuna til að sýna kristilegt hugarfar og leyfa þeim þjónum sínum sem vilja að vígja samkynhneigð hjón, - hinir geta síðan rætt málin þar til þeir treysta sér til að fara að landslögum. MEIRA... Þriðjudagur 11. október 2005
BLOGG-KLUKK Blogg-klukk er leikur sem gengur á milli þeirra sem halda úti heimasíðum. Björgvin G. Sigurðsson blogg-klukkaði mig í gær ásamt 5 öðrum þingmönnum. Leikurinn felst í því að ég verð að segja frá 5 atriðum um mig sem fáir vita um, - og birta á vefsíðu minni. Síðan verð ég að klukka fimm bloggara. Mitt klukk kemur hér: MEIRA... Sunnudagur 03. júlí 2005
Ertu fréttaefni morgundagsins? Í gærmorgun blöstu við í blöðunum fréttir af bílslysi á Hellisheiði þar sem fjórir slösuðust, þar af einn alvarlega og síðdegis sama dag bárust fréttir af bílslysi á Reykjanesbraut við Hafnarfjörð þar sem tveir bílar lentu saman og þrir slösuðust. Slysafréttir sem þessar vekja ugg. Umferðarslys kosta okkur 14-18 milljarða á ári. Við verðum að snúa vörn í sókn í þessum efnum Nú fer í hönd einn mesti ferðatími ársins. Mjög margir ferðast um landið í júlí og ágúst og þá eykst hættan á vegum landsins, sem ekki eru allir gerðir til að taka við þeirra miklu umferð sem um þá fer á mestu álagstímunum, sérstaklega eftir að allir vöruflutningar og þungaflutningar færðust á vegina. Spurningin hér að ofan er ein af spurningum Umferðarstofu til ökumanna á vegum landsins í sumar. Verið er að auka eftirlit með ökumönnum og auka löggæslu. Hvatningar- og varnaðarorð eru hengd á borða á fjölförnum leiðum. Þetta er ágætis viðleitni en það þarf meira til sporna við umferðarslysum. Við verðum að beita öllum ráðum til að ná þeim markmiðum sem við höfum sett okkur í fækkun umferðarslysa. MEIRA... Fimmtudagur 25. nóvember 2004
Öryggi íbúa á höfuðborgarsvæðinu – rýmingar- og björgunaráætlun ekki til Í dag vakti Jóhanna Sigurðardóttir máls á brunavörnum og öryggismálum í kjölfar stórbrunans hjá Hringrás. Hún benti á að brunavörnum er ábótavant í um 300 fyrirtækjum á höfuðborgarsvæðinu og kallaði eftir aðgerðum stjórnvalda. Viðbrögðum allra aðila á slysstað var hrósað í umræðunum og því fagnað að ekki hlaust manntjón af. Ég benti á það í umræðunni í morgun að nú yrði að vinna rýmingaráætlun fyrir höfuðborgarsvæðið til að auðvelda björgunarstörf ef það verða stórslys hér eða náttúruhamfarir og flytja þarf íbúa í burtu. Ekki er til nein björgunaráætlun fyrir íbúa svæðisins ef stórslys eða náttúruhamfarir verða sem kalla á að íbúar verði að flytja burtu. Það kom fram í svari dómsmálaráðherra við fyrirspurn minni um málið á síðasta þingi. Að þessu sinni þurfti að flytja 600 manns frá heimilum sínum, en ef vindátt hefði verið önnur hefði sá fjöldi orðið mun meiri. Slíkar áætlanir eru til fyrir Hveragerði og ýmis önnur svæði á landinu. Ég tel því fulla ástæðu til þess að vinnu verði hraðað við gerð rýmingar- eða björgunaráætlunar fyrir þetta stóra svæði, höfuðborgarsvæðið. Með henni ætti að skýrast verkaskipting milli aðila við björgunarstörf og það hvernig best verður staðið að rýmingu ákveðinna hverfa og bæjarhluta á höfuðborgarsvæðinu. MEIRA... Miðvikudagur 06. október 2004
Skattalækkanir duga ekki fyrir tveim bíómiðum Núverandi ríkisstjórn hefur aukið álögur á almenning um 4 milljarða króna frá því hún tók við völdum í fyrra. Nú vill ríkisstjórnin hins vegar skila einhverju tilbaka í tekjuskattslækkunum en þó með afar ójöfnum hætti, þ.e. 1% lækkun á tekjuskatti og 2% lækkun á hátekjuskatti. Hvernig hagnast fólkið í landinu á þessari skattalækkun? Við í Samfylkingunni höfum bent á það. Á meðan kennarinn fær andvirði bleyjupakka fær milljónamaðurinn eina utanlandsferð á mánuði. Þessu óréttlæti höfnum við. Við viljum lækka matarskattinn sem kemur öllum til góða og afnema stimpilgjöld sem koma ungu fólki og skuldsettum fjölskyldum vel. MEIRA...
Samkomulag við lífeyrisþega svikið Í gær var fjárlagafrumvarp ríkisstjórnarinnar rætt á Alþingi. Þar benti ég á hver staða lífeyrisþega er í frumvarpinu og hvernig ríkisstjórnin hefur brugðist bæði öldruðum og öryrkjum. Fyrir síðustu kosningar var komið á samráðshópi sem hagsmunasamtök aldraðra og ríkisstjórnin eiga fulltrúa í. Aldraðir höfðu miklar væntingar til þessarar nefndar og töldu að þeir fengju kjarabætur gegnum starf hennar. Nefndin hefur ekki verið kölluð saman frá því löngu fyrir kosningar. Allir þekkja hver staðan er gagnvart öryrkjum sem hafa verið sviknir um aldurstengdar bætur, en síðari hluta samkomulags við þá átti að efna nú en ekkert bólar á í frumvarpinu. Svona efnir ríkistjórnin samkomulag og kosningaloforðin við lífeyrisþega. Þau eru orðin tóm. MEIRA... Miðvikudagur 16. júní 2004
Við breytum ekki reglum eftir á Undanfarið hafa verið umræður um það meðal ráðamanna að til greina komi að setja skilyrði um þátttöku eða svokallaða þröskulda í þjóðaratkvæðagreiðslunni sem haldin verður um fjölmiðlafrumvarpið í ágúst. Ég frábið mér slíkar vangaveltur. Þetta mál er nú komið til þjóðarinnar og geta stjórnvöld því ekki sett hamlandi reglur um atkvæðagreiðsluna eftir á. Samkvæmt stjórnarskránni er ekki kveðið á um neinar hömlur í atkvæðagreiðslum og ef ráðamenn taka upp á því að setja slíkar reglur stríðir það gegn stjórnarskránni og hérlendri hefð. Ef menn vilja setja slík ákvæði á stjórnarskrána tekur það nokkurn tíma. Koma þarf fram frumvarp á þingi um það og verði það samþykkt þarf að samþykkja það aftur á Alþingi eftir næstu alþingiskosningar. Það er sjálfsagt að skoða það í tengslum við endurskoðun stjórnarskrárinnar, sem er önnur umræða sem ekki á við nú og ber að bíða seinni tíma. Staðfestingarvaldið á þessum lögum hefur forsetinn nú sent til þjóðarinnar og valdið er hjá henni. Í stjórnarskránni okkar er á nokkrum stöðum kveðið á um atkvæðagreiðslur og allsstaðar gert ráð fyrir einföldum meirihluta þeirra sem mæta. Það eru því þær reglur sem gilda eiga um þjóðaratkvæðagreiðsluna. Ég trúi því ekki að óreyndu að lögfræðinganefnd ríkisstjórnarinnar muni komast að annarri niðurstöðu. MEIRA... Miðvikudagur 10. desember 2003
Neyðarlínan svari fleiri neyðarnúmerum en 112 Eins og allir ættu að vita hér á landi er neyðarnúmerið á Íslandi 112 og svarar Neyðarlínan því númeri. Þetta númer er samevrópskt neyðarnúmer og hefur Evrópusambandið gefið út tilskipun þar um. Í ýmsum öðrum löndum, eins og í sumum nágrannalöndum okkar, eru önnur neyðarnúmer. Ég nefni sem dæmi Bretland sem er með 999, í Bandaríkjunum og Kanada er neyðarnúmerið 911. Hingað koma fjölmargir erlendir ferðamenn. Fjöldi Bandaríkjamanna og Kanadamanna kemur hingað og fjöldi Bandaríkjamanna býr í herstöðinni á Reykjanesi og þeir ferðast mjög mikið um landið. Því miður hafa undanfarið orðið alvarleg slys á ferðamönnum og þegar eitthvað alvarlegt hendir er ekki ólíklegt að menn grípi símann og hringi í það neyðarnúmer sem þeim er efst í huga. Ég veit til þess að þó að neyðarnúmerið í Bretlandi sé 999 svarar Neyðarlínan þar í landi líka ef hringt er í 112 og jafnvel fleiri númer. Það hefði verulega aukið öryggi í för með sér ef íslenska Neyðarlínan tæki við símtölum úr fleiri númerum en 112, númerum sem eru þekkt neyðarnúmer t.d. 911, sem er mjög þekkt neyðarnúmer um stóran hluta heimsins. Ekkert nema ef til vill kostnaður er því til fyrirstöðu að Neyðarlínan taki við símtölum og svari fleiri númerum en 112, neyðarnúmerinu sem er opinbert númer hér á landi. Þetta upplýsti Björn Bjarnason í svari við fyrirspurn minni á Alþingi um þetta mál í síðustu viku. Ég efast um að tilkostnaður við að Neyðarlínan svari líka þessum þekktu neyðarnúmerum sé mikill og tel að það sé þess virði að legga í þann kostnað til að auka öryggi ferðamanna og annarra sem hér dvelja og þekkja önnur neyðarnúmer. MEIRA... Mánudagur 08. desember 2003
Bætum öryggismál á höfuðborgarsvæðinu Ekki er til rýmingar- eða björgunaráætlun fyrir Reykjavík og nágrannasveitarfélög ef náttúruhamfarir eða stórslys verða sem ógna lífi íbúa á svæðinu. Þetta staðfesti dómsmálaráðherra er hann svaraði fyrirspurn minni á Alþingi í síðustu viku. Í landi eins og okkar, þar sem náttúrukraftar geta brotist fram skyndilega og jafnvel ógnað lífi fólks, er öflugt forvarnar- og björgunarkerfi mjög mikilvægt. Það er jafnframt mikilvægt í ljósi þess að í breyttum heimi eru aðrar ógnir en áður, t.d. hryðjuverk, eiturefnahernaður og eiturefnaslys. Með lagabreytingu í fyrra voru viðbragðsaðilar sameinaðir í björgunarmiðstöðinni í Skógarhlíð. Tilgangurinn var aukið öryggi og efling almannavarna, stytting á boðleiðum og einföldun á stjórnskipulagi svo og sparnaður í opinberum rekstri. Til þess að vera sem best undir björgunaraðgerðir búinn eru gerðar björgunaráætlanir fyrir ýmis svæði sem talin eru geta verið hættusvæði í ákveðnum tilvikum og við ákveðnar aðstæður. Samgöngunefndarmenn Alþingis heimsóttu Skógarhlíðina og ræddu málefni björgunarstöðvarinnar. Þar kom fram að til eru rýmingar- og björgunaráætlanir fyrir ýmis bæjarfélög, t.d. Hveragerði, en ekki fyrir höfuðborgina. Þetta tel ég mjög alvarlegar upplýsingar. Við þurfum ekki annað en að sjá hvernig hraun hefur runnið á höfuðborgarsvæðinu, horfa til Bláfjallasvæðisins, Kleifarvatns, Krýsuvíkur og annarra svæða í nágrenninu sem eru virk eldfjallasvæði. Heimaeyjargosið er talandi dæmi um það sem getur gerst. Vegakerfið hér út úr borginni er löngu sprungið á álagstímum og er þjóðvegahátíðin á Þingvöllum mönnum enn í fersku minni þar sem bílar komust hvorki lönd né strönd þegar mjög margir fóru af stað á sama tíma. Stórslys geta alltaf orðið og bæði þau og náttúruhamfarir gera ekki boð á undan sér, hvað þá hryðjuverk, þó að við séum kannski ekki í mestri hættu hvað þau varðar. Á þessu svæði býr um helmingur þjóðarinnar og það er ekki til rýmingaráætlun, áætlun um hvernig skuli koma fólki í burtu ef alvarlegt ástand skapast og líf íbúa á svæðinu er í hættu. Þótt almannavarnanefndum sé nú heimilað að vinna saman eins og ráðherra sagði í svari sínu kemur það ekki í stað björgunaráætlunar. Hvernig ætla menn að rýma höfuðborgina og nágrannasveitarfélögin ef lífi íbúanna er ógnað? Um það verður að útbúa áætlun, það þarf að að vera ljóst hvernig skuli brugðist við í hverju hverfi í Reykjavík og nágrannasveitarfélögum, ekki síður en í bæjarfélögum eins og Hveragerði. MEIRA... Mánudagur 28. apríl 2003
BURT MEÐ RANGLÆTIÐ, MISSKIPTINGUNA OG RÍKISSTJÓRNINA Umræðan um eignatilfærsluna í landinu vegna gjafakvótakerfisins hefur nú sem betur fer náð í gegn í kosningabaráttunni. Æ stærri hluti þjóðarinnar hafnar þessu ranglæti. Fiskistofnarnir eru sameign þjóðarinnar og við verðum að koma þeim aftur í hendur réttra eigenda. Heildarvirði úthlutaðs kvóta á yfirstandandi fiskveiðiári eru 350 milljarðar sé miðað við það gangverð sem útgerðarmenn sjálfir eru að nota við kaup og sölu kvótans. Það eru ríflega ein milljón og tvöhundruð þúsund á hvern Íslending, 1.2oo.ooo krónur! Til samanburðar eru fjárlög íslenska ríkisins á árinu 2003 uppá 250 milljarða. Það sem Davíð Oddsson lofar að bæta við, 30 þúsund tonnum af þorski sem á sambærilegu verðlagi leggja sig á 34,5 milljarða og 21 þúsund tonni af ýsu sem með sama hætti mundi gera 13 milljarða. Þessar sameiginlegu eigur okkar á samkvæmt uppleggi ríkisstjórnarflokkanna að afhenda óskertar til þeirra sem þegar hafa kvótann. Ríkisstjórnin deilir og drottnar, og misskiptingin eykst. MEIRA... Mánudagur 24. mars 2003
RÍKISSTJÓRNIN RÝRÐI STUÐNING VIÐ HREYFIHAMLAÐA Bifreiðastyrkir og bifreiðakaupalán á hagstæðum kjörum er stuðningur sem velferðarkerfið hefur veitt hreyfihömluðum og fötluðum í gegnum Tryggingastofnun ríkisins. Ríkisstjórn Davíðs Oddssonar fækkaði þessum styrkjum stórlega og rýrði lánakjörin vegna bifreiðalánanna verulega á valdatíma sínum. Það er ekki nóg með að kjör þessa hóps hafi versnað, heldur stuðningur vegna hreyfihömlunar einnig. MEIRA... Þriðjudagur 18. mars 2003
GEIR STAÐFESTIR SKATTAHÆKKANIR RÍKISSTJÓRNARINNAR Í svari sem fjármálaráðherra lagði fram í síðustu viku á Alþingi við fyrirspurn Rannveigar Guðmundsdóttur um tekjuskatta kemur fram að skattbyrði hefur þyngst hjá öllum nema þeim sem hafa hæstar tekjurnar. Svar ráðherrans staðfestir það sem m.a. Samfylkingin, Stöð 2 og samtök eldri borgara hafa haldið fram undanfarið; að skattar hafi hækkað. MEIRA... Mánudagur 17. febrúar 2003
KOSNINGASKJÁLFTI STJÓRNARHERRANNA "Krakkar mínir, komið þið sæl, ég er jólasveinninn" segir í gömlu dægurlagi, en þessi setning kom í hugann sl. þriðjudag, þegar forsætis- og utanríkisráðherra tilkynntu þá ákvörðun sína, glaðir í bragði, að selja ríkiseigur fyrir 6,3 milljarða og setja í menningarhús og vegagerð. Rúmlega 6000 Íslendingar eru á atvinnuleysisskrá og eru 70% þeirra á höfuðborgarsvæðinu. Með þessu eiga nokkur hundruð þeirra að fá vinnu við vegagerð og húsbyggingar, að stærstum hluta úti á landi og mestanpart karlar, iðnaðar- og verkamenn. Konur eru um helmingur atvinnulausra, þær eiga greinilega að mati ríkisstjórnarinnar að éta það sem úti frýs og menntamenn líka. Ríkisstjórnarherrarnir hyggjast verja 5,6 milljörðum króna til ýmissa framkvæmda til að sporna gegn atvinnuleysi og koma 18% af því fé til höfuðborgarsvæðisins, MEIRA... Fimmtudagur 23. janúar 2003
BREGÐUMST VIÐ AUKNU ATVINNULEYSI Atvinnuleysi nú í desember hefur ekki verið meira, á sama tíma, frá árinu 1997. Vinnumálastofnun spáir 3,5 – 3,9% atvinnuleysi nú í janúar. Greiningardeild Kaupþings áætlar að það fari í allt að 5% á næstu mánuðum. Atvinnuleysið nú er öðruvísi en oftast áður því það bitnar á öllum hópum, einnig á menntafólki. Efnahagsstjórn ríkisstjórnar Davíðs Oddssonar hefur haft þær afleiðingar að nýsköpun í atvinnulífinu hefur koðnað niður. Samdráttur undanfarið og sameining stórfyrirtækja hafa einnig leitt til aukinna uppsagna og munu gera áfram. MEIRA... Þriðjudagur 05. nóvember 2002
VILJA STJÓRNVÖLD AÐ RÍKISHÁSKÓLARNIR VISNI Á MEÐAN EINKAHÁSKÓLARNIR DAFNA? Samkeppnis- og aðstöðumunur háskólanna eftir því hvort þeir eru ríkis- eða einkareknir er ólíðandi. Björn Bjarnason fyrrverandi menntamálaráðherra kom á fjármögnunarkerfi fyrir háskólastigið í landinu, sem felur í sér óviðunandi mismunun og ávísun á verulegt forskot fyrir einkaháskólana. Ríkis- og einkaháskólarnir fá sömu fjárhæð fyrir hvern nemanda. Síðan bæta einkaskólarnir skólagjöldum við. Háskólinn í Reykjavík um 180 þúsund krónum á ári sem nemur um 50% af framlagi ríkisins í lagadeild og viðskiptadeild, svo dæmi sé tekið. Háskóla Íslands og öðrum ríkisháskólum er ekki heimilt að taka skólagjöld. Fjölmennar deildir Háskóla Íslands s.s. lagadeild og viðskiptadeild þurfa auk þess að greiða af ríkisframlagi sínu, um þriðjung til fámennra kennslugreina, MEIRA... Föstudagur 01. nóvember 2002
NÁMSMENN UTANGARÐS Námsmenn á heimavist eða stúdentagörðum öðluðust rétt á húsaleigubótum þótt þeir byggju í herbergi með aðgangi að eldhúsi og baði. Um 600 námsmenn bíða nú eftir húsnæði á stúdentagarði hér í Reykjavík. Námsmenn eiga sem sagt ekki allir kost á slíku húsnæði og verða að leigja sér sambærilegt húsnæði annars staðar, sem er almennt mun dýrara en garður eða heimavist, en þar fá þeir ekki húsaleigubætur samkvæmt núgildandi lögum ef þeir deila eldhús- og salernisaðstöðu með öðrum. Þetta óréttlæti í garð fjölda námsmanna verður að leiðrétta. Ég hef tvívegis lagt það til á Alþingi en ríkisstjórnin hefur ekki haft vilja til að leiðrétta þetta misrétti sem námsmenn utan Garðs eru beittir. MEIRA... Mánudagur 21. október 2002
ALDRAÐIR NEYÐAST TIL AÐ SELJA HÍBÝLI SÍN Hér á landi eru um 7000 lífeyrisþegar, 80 ára og eldri, sem hafa lítið sem ekkert úr lífeyrissjóðum. Stór hluti þeirra eru ekkjur sem hafa verið heimavinnandi húsmæður. Þetta fólk er að greiða 1 til 1,5 mánaðargreiðslur til baka til ríkisins á ári. Lendi það inni á spítala lengur en 120 daga á tveim árum falla lífeyrisgreiðslur Tryggingastofnunar niður, það fær engar tekjur nema dagpeningalús, en útgjöldin falla ekki niður. Ég veit dæmi þess að öldruð kona úr þessum hópi neyddist til að selja ofan af sér íbúðina eftir langvarandi veikindi, vegna þessara ómannúðlegu reglna í kerfinu. Það dæmi er ekki einsdæmi. MEIRA... Þriðjudagur 15. október 2002
RÉTTUR FEÐRA SENN Í HÖFN Nú er til umfjöllunar á Alþingi ný lagasetning í málefnum barna og hefur dómsmálaráðherra tekið inn í hana mikið baráttumál okkar í Samfylkingunni, sem er að feður geti höfðað barnsfaðernismál. Ég ásamt fleiri þingmönnum Samfylkingarinnar hef lagt fram frumvarp þrívegis þar sem lögð er til þessi breyting á barnalögunum. Tilgangurinn var að bæta úr þeim ágalla á barnalögum að einungis móðir og barn geti átt aðild að barnsfaðernismáli, en Hæstiréttur Íslands kvað upp þann dóm 18. desember 2000 að þessi ágalli á barnalögum bryti í bága við 70. gr. stjórnarskrárinnar. MEIRA... Föstudagur 27. september 2002
Framsókn smokkfisksins - skyldulesning Viðskiptablaðið birtir í þessari viku athyglisverða úttekt á því sem er að gerast bak við tjöldin í valdablokkunum í samfélagi okkar, undir fyrirsögninni "Framsókn Smokkfisksins." Þar er staðhæft að brottför Finns Ingólfssonar úr hægindastóli Seðlabankans yfir í lykilembætti Smokkfisksins sýni að Framsóknarmenn séu aftur að ná vopnum sínum í viðskiptalífinu. Í allri umræðunni undanfarið um helmingaskiptin innan ríkisstjórnarflokkana hefur ekki tekist að koma þeim skilaboðum áleiðis í hverju þau felast. Þessi úttekt ætti að varpa nokkru ljósi á það, þótt enn vanti tilfinnanlega grein um "Sjálfstæði Kolkrabbans" til að fylla út í myndina. Greinin er því skyldulesning fyrir alla þá sem vilja setja sig inn í það sem fram fer bak við tjöldin í makkinu hjá ríksstjórnarliðinu. MEIRA... Miðvikudagur 25. september 2002
Aldraðir enn í nefnd
Það er augljóst að framundan eru kosningar til Alþingis. Ríkisstjórnin virðist hafa hrokkið við í gær og allt í einu munað eftir öldruðum. Skotið var á samráðsfundi með Landsambandi eldri borgara í Ráðherrabústaðnum og samstarfshópur stofnaður um málefni þeirra. Loksins eftir rúm sjö ár á valdastóli eru ráðamenn til í að skoða þróun tryggingamála og hjúkrunarheimila. Nú þegar valdatíð þessarar ríkistjórnar er á síðustu metrunum á að setja fram áætlun um breytingar eða lagfæringar sem þyrftu að koma til framkvæmda á næstu tveimur til þremur árum. Það er auðvelt að gefa loforð inn í framtíðina þegar það er alls óvíst hvort ríkisstjórnin verði í stöðu til að efna þau loforð. Þetta er gamalkunnug saga, málefni aldraðra hafa áður verið sett í nefndir hjá þessari ríkisstjórn. Það væri nú meira langlundargeðið... MEIRA... Þriðjudagur 24. september 2002
Fátæktin bitnar á börnunum
Fólkið í landinu... Það er óþolandi í velferðarsamfélagi okkar að feður sem ekki búa með börnum sínum og eru öryrkjar eða atvinnulausir geta varla sinnt foreldraskyldum sínum vegna fátæktar. Undanfarið hafa verið í sambandi við mig feður sem eiga erfitt með að hafa börn sín hjá sér og geta ekki sinnt þeim sem skyldi vegna þessa. Þegar faðirinn er atvinnulaus þarf hann að framfæra sig á 73.765 krónum á mánuði og hjá honum hlaðast meðlagsskuldir upp. Örykinn fær á mánuði um 73 þúsund ef hann er aðeins á bótum frá Tryggingastofnun. Þetta eru upphæðir sem hrökkva ekki fyrir nauðþurftum örykjans sjálfs, hvað þá framfærslu barns - en barnalífeyrir almannatrygginga fer til móður ef barnið er með lögheimili hjá henni, jafnvel þótt foreldrar séu með sameiginlega forsjá og séu jafnmikið með... MEIRA... |