|
|
Fimmtudagur 23. nóvember 2006
Einkavæðingaráráttan bitnar á heilbrigðisþjónustu Miðstöð mæðraverndar var lögð niður í núverandi mynd í dag. Ástæðan fyrir því að mikið rót er komið á þjónustu við verðandi mæður í áhættu er einkavæðingarárátta ríkisstjórnarinnar. Ríkið átti hentugt húsnæði, Heilsuverndarstöðina, sértaklega byggt fyrir heilbrigðisþjónustu, seldi það nánast upp úr þurru og tók á leigu óviðunandi húsnæði langt frá Landspítalanum. Á spítalanum er sú þjónusta sem Mæðraverndin þarf að vera í nánum tengslum við, – og spítalinn hefur ekki mannafla til að sinna þessari þjónustu um svo langan veg sem nú er. Verkefnunum sem var sinnt frá Heilsuverndarstöðinni er búið að koma fyrir víða um borgina. Hvað gekk ráðherra til með því að selja húsið og dreifa þjónustunni við ærinn tilkostnað í óhentugt leiguhúsnæði? Ekki var þetta í þágu heilbrigðisþjónustunnar sem sinnt var í Heilsuverndarstöðinni, - svo mikið er víst. MEIRA... Fimmtudagur 09. nóvember 2006
Aðför að heilbrigðisþjónustu höfuðborgarbúa Miðstöð mæðraverndar hefur verið lögð niður í núverandi mynd. Konur í áhættumeðgöngu fá ekki lengur sömu þjónustu og áður í Heilsuverndarstöðinni. Nú er þeim sinnt við mjög þröngar aðstæður á Landspítalanum. Þarna færist þjónusta við þessar konur aftur um 15-20 ár . Á það bendir yfirljósmóðir mæðraverndar. Þetta er ekki það eina. Við sölu húss Heilsuverndarstöðvarinnar fór einnig starfsemi Miðstöðvar heilsverndar barna í uppnám, en ýmsir þættir þjónustu þar voru sameiginlegir með Miðstöð mæðraverndar. Yfirmenn þessarar þjónustu óttast afleiðingar flutnings þjónustunnar úr Heilsuverndarstöðinni víða um bæinn í mun lakari aðstæður og er atgervisflótti yfirvofandi. Lungna- og berkladeildin er nú flytja í bráðabirgðahúsnæði í Glæsibæ þar til nýtt húsnæði verður komið í Mjóddinni og hugmyndir voru um að atvinnu- og sjúkdómadeildin færi þangað líka. Skert þjónusta vofir einnig yfir almennri sjúkrahússþjónustu höfuðborgarbúa nú þegar Landspítala eru skömmtuð óbreytt raunfjárframlög í fjárlögum sjöunda árið í röð. Samdrátturinn á spítalanum hefur bitnað illa á starfsfólkinu, sem hefur lagt óhemju hart að sér við þær aðstæður og er ekki hægt að ganga lengra í þeim efnum. Þetta bitnar þó verst á sjúklingunum og er ekki hægt að sætta sig við slíkt. Þeir eiga samkvæmt lögum rétt á bestu fáanlegri heilbrigðisþjónustu. Hana er ekki hægt að veita nema auknar fjárveitingar komi til og tekið verði tillit til fjölgunar aðgerða á spítalanum, fjölgunar íbúa og dýrari úrræða eins og nýrra og betri lyfja. Nánar um þetta má sjá í ræðum mínum á Alþingi um heilbrigðsþjónustu í vikunni (undir Þingræður) og greininni "Til varnar Landspítala" undir Greinar á heimasíðunni. Ég minni á að Landspítalinn er sjúkrahús allra landsmanna og einnig hinn almenni spítali fyrir alla höfuðborgarbúa. Við þetta ástand verður ekki unað í heilbrigðisþjónustu við höfuðborgarbúa og þetta fjölmenna landsvæði. MEIRA... Miðvikudagur 25. október 2006
"Hreyfiseðlar" í Garðabæ Eftir að þingmál mitt um hreyfiseðla kom fram hefur heilsugæslustöðin í Garðabæ ákveðið að koma á hreyfiseðlum í tilraunskyni. Er sú tilraun að hefjast um þessar mundir í samstafi við bæjaryfirvöld þar. Nú liggur fyrir Alþingi í þriðja sinn tillaga mín og þingmanna úr öllum flokkum um hreyfiseðla. Tillagan snýst um undirbúning þess að hreyfing geti orðið valkostur í heilbrigðisþjónustunni sem lækning og í fyrirbyggjandi tilgangi, þannig að læknar geti vísað á hreyfingu á sama hátt og þeir gera annars staðar á Norðurlöndum. Í stað þess að læknir skrifi lyfseðil eða sendi sjúkling í aðgerð á sjúkrahúsi geti hann skrifað "hreyfiseðil", - ráðgjafar- og hreyfingaráætlun ef það á við, þar sem sjúklingurinn getur sjálfur tekist á við heilsuleysið með eigin atorku. Kynnið ykkur tillögu mína um hreyfiseðlana á vef Alþingis og grein um sama efni hér á heimasíðunni. Þeir eru áhugaverður og hagkvæmur kostur í ört vaxandi heilbrigðiskerfi. MEIRA... Föstudagur 14. júlí 2006
Vaknað af værum blundi - betra seint en aldrei Siv Friðleifsdóttir heilbrigðisráðherra kynnti stefnumótun í málefnum aldraðra í gær, - tíu mánuðum fyrir kosningar. Gott er að fá stefnumótun frá ríkisstjórninni þótt seint sé. Hingað til hefur málaflokkurinn verið afskiptur í heilbrigðisráðuneytinu og ástandið í málefnum aldraðra eftir því. Margir hafa styrkst í þeirri skoðun að þennan málflokk þyrfti að flytja til ráðuneytis félagsmála. Nú vill ráðherra efla heimaþjónustu, færa heimahjúkrun á sömu hendi og félagsþjónustuna, þ.e. til sveitarfélaganna. Hún vill koma á nætur- og helgarþjónustu í heimahúsum. Samfylkingin og þingmenn hennar hafa á Alþingi hvað eftir annað hvatt til að þetta verði gert, en án árangurs. Ég fagna sérstaklega viðsnúningi Sivjar í sambandi við geðheilbrigðisþjónustu við aldraða. Nú ætlar hún að koma á öldrunargeðdeild, – gott! Það vildi fyrirrennari hennar ekki. Í vetur kallaði ég eftir því í fyrirspurnartíma á Alþingi og svaraði Jón Kristjánsson því neitandi, hann taldi ekki þörf á sérstakri öldrunargeðdeild, - þótt þörfin væri mikil samkvæmt mínum heimildum. Vonandi tekst Siv að fá fjármagn til þessa verks. Nú vill Siv að þeir sem eru í mestri þörf fái forgang á hjúkrunarheimilin, - hún var ekki alveg viss í vetur þegar ég ræddi þessi mál við hana á Alþingi. Ég spurði hana hvort ekki væri nauðsynlegt að LSH hefði forgang í innlögnum á fleiri hjúkrunarheimili en tvö eins og nú er, til að leysa vanda 100 aldraðra á spítalanum, sem ekki var hægt að útskrifa. Hún var tilbúin að íhuga það þá. Það hefur hún greinilega gert og ég fagna þessum áherslum hennar. Hún vill líka fjölga fagfólki í þjónustunni og er það vel. Samfylkingin hefur ítrekað lagt áherslu á að það verði gert. Fjölgun hjúkrunarrýma er gamalkunnur söngur úr ráðuneytinu , - hann hefur verið ótrúverðugur á sama tíma og tæplega helmingur þess fjár sem á að renna til uppbyggingar hjúkrunarheimila með skatti til Framkvæmdasjóðs aldraðra hefur farið í annað í ellefu ára stjórnartíð blágrænu flokkanna tveggja, Bé og Dé. Skyldi Siv ná að breyta þessu fyrir kosningar? Ekki er von á úrbótum í hjúkrunarmálunum fyrr en eftir þær, miðað við núverandi áætlun. Upplýsingagjöf og ráðgjöf við aldraða og aðstandendur þeirra á að auka, en í þeim efnum er víða pottur brotinn eftir ellefu ár Framsóknar yfir málflokknum.. Ekki er ólíklegt að hin öflugu samtök aðstandenda aldraðra, AFA, með Reyni Ingibjartsson í fararbroddi, og Félag eldri borgara undir styrkri forystu Margrétar Margeirsdóttur hafi náð eyrum ráðherrans í þessum efnum nú á síðustu vikum og mánuðum. Ráðherra ætlar að berjast fyrir fjárveitingum til að ná þessu fram. Þar reynir á vilja samstarfsflokksins í blágræna bandalaginu, en fjármálaráðherra hefur mikið um það að segja. Nú er að sjá hvernig fjárlagafrumvarpið, það síðasta fyrir kosningar, mun líta út í þingbyrjun. Ef áform Sivjar eiga að verða að veruleika verður að veita fé til þeirra í fjárlögum. MEIRA... Fimmtudagur 02. mars 2006
Mikil þörf fyrir öldrunargeðdeild Fólk með geðsjúkdóma eldist eins og aðrir og fær öldrunarsjúkdóma ekki síður en annað fólk. Aldraðir geta líka fengið geðsjúkdóma á efri árum. Engin sérstök deild er til hér á landi fyrir aldraða geðsjúka, en sá hópur þarf mjög sérhæfða þjónustu. Þeir hafa verið vistaðir á geðsviði Landspítala – háskólasjúkrahúss og á öldrunarsviði sama spítala. Þessir sjúklingar hafa verið að velkjast á milli þessara deilda. Einhverjir þessara sjúklinga eru langveikir og dvelja heima með göngudeildarþjónustu frá geðsviði, sem er gott á meðan það er hægt. En þegar þeir verða veikari eru þeir lagðir inn, annað hvort á geðdeildina og taka þá upp endurhæfingarpláss, eða þeir lenda inni á öldrunardeildum vegna þess að oft hrjá þá ýmsir aðrir sjúkdómar, oft margir líkamlegir kvillar. Í nágrannalöndum okkar eru allsstaðar reknar sérstakar öldrunargeðdeildir og væri eðlilegt að í 300 þúsund manna samfélagi væru slíkar deildir starfandi. Ég er sammála því fagfólki sem telur að þörf sé á sérstakri öldrunargeðdeild, þ.e. meðferðardeild fyrir þessa sjúklinga. Gert er ráð fyrir að deild fyrir 18–20 manns, sem bæði öldrunarsviðið og geðsviðið kæmu að, myndi anna þörfinni. Svo þarf auðvitað að huga að hjúkrunarúrræðum fyrir þessa öldruðu og geðsjúku, því að þau eru engin. Þetta fólk þarf að vera út af fyrir sig, því það truflar aðra vistmenn og sjúklinga. Ekki þarf nema einn svona sjúkling á deild til að koma öllu í uppnám. Fólk með geðsjúkdóma á ekki heldur að þurfa að búa við þessar aðstæður. Í desember síðastliðinn skipaði ráðherra 15 manna faghóp sem á að skila niðurstöðum um hvernig standa skuli að slíkri þjónustu og hvernig henni skuli fyrir komið. Hann á að skila niðurstöðum nú í mars. Mikilvægt er að frá honum komi jákvæð niðurstaða fyrir þessa öldruðu sjúklinga sem hér um ræðir. Umræðuna á Alþingi um fyrirspurn mina um þetta mál má finna á slóðinni: http://www.althingi.is/altext/132/02/l08133810.sgml Sjá einnig ýtarlegri umfjöllun í grein minni í Morgunblaðinu í dag. Hún er hér á síðunni undir greinar. MEIRA... Þriðjudagur 21. febrúar 2006
Veruleg gagnrýni á reglur um sjúklingagjöld Sérfræðingar og yfirmenn sjúkratrygginga Tryggingastofnunar ríkisins, sem best þekkja sjúkratryggingarnar, segja að reglurnar um það hvernig velferðarkerfið tekur þátt í kostnaði sjúklinga við heilbrigðisþjónustu séu illskiljanlegar jafnvel færustu sérfræðingum og óskiljanlegar almenningi. Þeir segja einnig að um slíkar reglur verði seint mikil sátt. Þetta kemur fram í skýrslu sem þeir unnu í vetur og ber heitið Réttlátari notendagjöld í sjúkratryggingum á Íslandi. Þar kemur fram veruleg gagnrýni á greiðsluþátttökureglurnar – og þeir segja nauðsynlegt að taka til gagngerrar endurskoðunar allt regluverk um greiðsluþátttöku sjúkratrygginga. Reglurnar verði að endurskoðaða og einfalda til að tryggja jöfnuð. Nú hefur þessi skýrsla verið nokkuð í fréttum, eftir beðið var um að hún yrði gerð opinber, án árangurs. Ég reyndi ítrekað að fá hana alla síðustu viku, en það gekk ekki. Skýrslan var hvorki á vef Tryggingastofnuar né heilbrigðisráðuneytisins. Skýrslan var síðan kynnt í stjórn Tryggingastofnunar fyrir helgi. Þessi skýrsla fjallar um framkvæmd laga sem sett hafa verið á Alþingi og reglugerðir sem Alþingi hefur heimilað ráðherra að setja. Við þá framkvæmd og það regluverk hafa sérfræðingar ýmislegt að athuga og við verðum að fara yfir þá þætti. Það er skylda okkar. Það ber að þakka fyrir þessa góðu samantekt á hinum ýmsu ólíku greiðsluflokkum, sem sérfræðingarnir gerðu að eigin frumkvæði, - en niðurstöðurnar knýja á að skýrslan verði birt og ekki síður að alþingismenn bregðist við og taki hana til umfjöllunar. Ég hef óskað eftir því að skýrslan verði kynnt í heilbrigðisnefnd og tekin þar til ítarlegrar umfjöllunar. Síðan verða þingmenn að meta hvaða breytingar þeir vilja gera á sjúkratryggingunum. Það að ráðherra sé andvígur ýmsu í skýrslunni, eins og hann upplýsti á Alþingi í dag, á ekki að koma í veg fyrir að hún verði rædd og gerð öllum aðgengileg sem vilja kynna sér hana. MEIRA... Föstudagur 17. febrúar 2006
Hver vill búa á bráðadeild ? Ekki ég og örugglega enginn. Þess vegna eigum við ekki að líða það að tugum aldraðra sé boðið upp á slíkt hér á landi. Samkvæmt svari heilbrigðisráðherra við spurningum mínum á Alþingi búa 89 aldraðir inni á Landspítalanum á bráða- eða öldrunardeild. Bíða þar, inni á sjúkrahúsi eftir að læknismeðferð er lokið, í þörf fyrir hjúkrun. Þetta fólk er eins og fangar inni á spítala. Við ræddum stöðu þessara öldruðu hjúkrunarsjúklinga á Alþingi í gær. Kastljósi hefur verið beint að óviðunandi aðbúnaði aldraðra á hjúkrunarheimilum, þar sem þeir búa þröngt nokkrir saman í litlum herbergjum, - samanber umræðuna um Sólvang. En mun verri er aðbúnaður þessa hóps. Við hvaða aðstæður búa þeir? Þeir eru ekki í sérbýli, ekki einu sinni í venjulegum herbergjum, heldur langdvölum á sjúkrastofum. Þeir komast sjaldan út fyrir hússins dyr. Sigríður Ólína Haraldsdóttir sérfræðilæknir á bráðadeild lýsir aðstæðum þeirra á sinni deild í nýjasta tölublaði Læknablaðsins svo: "Á bráðadeildinni minni er engin setustofa, enginn matsalur og eina dægradvölin er sjónvarp og útvarp. Heimsóknargestir standa uppi við vegg þar sem aðeins einn stóll fylgir hverju rúmstæði. Tíð skipti eru á herbergisfélögum. Þeir oftast mjög veikir og þeim fylgir ónæði af ýmsum toga." Þessir hjúkrunarsjúklingar hafa ekkert af eigin eigum eða persónulegum munum hjá sér og eru í mjög óheimilislegu umhverfi. Þeir búa saman tveir og þrír á stofum, oft með fárveiku fólki sem verið er að sinna inni á stofunni. MEIRA... Þriðjudagur 31. janúar 2006
Óþolandi seinagangur í hjúkrunarmálunum Á höfuðborgarsvæðinu bíða nú um 450 aldraðir í mikilli þörf fyrir hjúkrunarvist við óviðunandi aðstæður. Ekki lítur út fyrir að ástandið muni batna mikið á næstu árum því aðeins bætast við um 200 ný hjúkrunarpláss á næstu 3-4 árum. Árið 2007 er áætlað að 110 rými verði tilbúin í nýju hjúkrunarheimili í Sogamýrinni og nýtt hjúkrunarheimili á Lýsislóð með 90 pláss verði komið í gagnið 2009, samkvæmt svari ráðherra við fyrirspurn minni á Alþingi frá í gær. Þessi fjölgun annar ekki helmingi þess fjölda sem bíður nú í brýnni þörf. Við vitum vel að öldruðum fjölgar ört og líklega munu margir þeirra sem nú bíða aldrei komast í viðunandi hjúkrunarþjónustu. Hátt í 100 aldraðir liggja nú inni á Landspítala, hafa lokið meðferð þar en komast ekki út vegna þess að ekki er þjónusta í boði fyrir þá, heimaþjónusta eða hjúkrunarpláss. Aðstæður þeirra eru óviðunandi og þeir eru rændir lífsgæðum síðustu æviárin, lokaðir inni á sjúkrahúsi. Á annað þúsund aldraðir bíða nú eftir að komast inn á hjúkrunarheimili, þar af 455 í brýnni þörf, margir heima hjá sér oft alveg upp á sína nánustu komnir um allar nauðsynjar og þarfir. Allir landsmenn undir 70 ára með tekjur yfir ákveðnu marki greiða árlega nefskatt í Framkvæmdasjóð aldraðra og er sú greiðsla hækkuð með lagabreytingu frá Alþingi. Upphaflega var ætlunin að allar skatttekjurnar færu í uppbyggingu en samkvæmt svari ráðherra hafa innan við 60% farið í hana, afgangurinn hefur farið í rekstur og annað. Alls hafa 6.164 milljónir króna runnið í sjóðinn á undanförnum 10 árum. Þar af hafa tæpar 3.606 milljónir farið í uppbyggingu og um 2.558 milljónir í annað. Talið er að hvert hjúkrunarrými kosti 12 milljónir króna, svo ástandið væri ágætt ef nefskatturinn hefði skilað sér eins og upphaflega var gert ráð fyrir. En það kostar líka að reka hjúkrunarheimilin og öldrunarþjónustuna og það er krafa okkar sem greiðum skatta að vel sé farið með fé okkar og hagkvæmni gætt. Það er ekki gert. Tæplega 100 aldraðir liggja nú inni á hátæknispítala í fokdýrum sjúkrarúmum eins og fangar, eftir að hafa lokið meðferð, í stað þess að vera á hjúkrunarheimili með þjónustu við hæfi þar sem þjónustan kostar skattgreiðendur helmingi til þrisvar sinnum minna. Svar ráðherra við fyrirspurn minni um Framkvæmdasjóð aldraðra: http://www.althingi.is/altext/132/s/0686.html MEIRA... Föstudagur 30. desember 2005
Hreyfiseðlar standi til boða í heilbrigðiskerfinu Í grein sem britist í Morgunblaðinu í morgun gagnrýni ég harðlega makalausa markaðsetningu á blóðþrýstingslyfi með líkamsræktarkorti í kaupbæti þar sem markaðsetningunni er beint að sjúklingum. Rökin hjá þeim sem reyna að verja markaðsetningu Novartis og World Class á þannan hátt, eru þau, að blóðþrýstingssjúklingar þurfi hreyfingu og leiðbeiningar um mataræði. Það er mikið til í því, en ættu ekki allir blóðþrýstingssjúklingar að eiga kost á slíku tilboði? Vissulega ættu læknar að geta vísað fólki á hreyfingu og næringarleiðbeingar ef það getur bætt heilsufarið með slíku, en það á ekki að vera háð því að læknir ávísi á eitt tiltekið lyf. Á Norðurlöndum hafa tíðkast "hreyfiseðlar ", sem eru læknaávísanir á hreyfingu og matarleiðbeiningar, sambærilegar lyfseðlum. Ég hef lagt til á Alþingi að slíkum hreyfiávísunum verði komið á hér á landi í stað þess að lyfjameðferð sé eini valkosturinn í lækningu við ákveðnum sjúkdómum. Þar með væri hreyfingarmeðferð orðin valkostur í heilbrigðisþjónustunni. Ekki hefur þessi tillaga fengist rædd á Alþingi hvað þá samþykkt en ég hef flutt hana ásamt þingmönnum úr öllum flokkum í tvígang. Þessi markaðsetning lyfs með líkamsrækt í kaupbæti kallar heldur betur á að Alþingi ræði tillögu mína um hreyfiseðlana sem gerir alla sjúklinga jafna gangvart þessum kosti óháð lyfjategundum eða lyfjum yfirleitt. Þetta hefur gefist vel erlendis og hafa sjúklingar náð heilsu af eigin rammleik með markvissri hreyfingu og bættu mataræði. Það er ódýrara og að mörgu leyti betra fyrir alla aðila, - velferðarkerfið, sjúklingana og skattgreiðendur. MEIRA... Miðvikudagur 23. nóvember 2005
Árangur þrotlausrar baráttu Nú hefur ný þjónusta formlega verið sett á laggirnar í Heilsugæslunni í Reykjavík. Það er eftirfylgd geðsjúkra í nýrri starfstöð að Bolholti 4 undir nafninu Eftirfylgd geðsjúkra/Iðjuþjálfun – Hugarafl. Þetta er árangur af þrotlausri vinnu og baráttu Auðar Axelsdóttur iðjuþjálfa og fleira hugsjónafólks s.s. Elínar Ebbu Ásmundsdóttur sem þekkir hina miklu þörf fyrir þessa þjónustu við geðsjúka og aðstandendur þeirra - og hætti ekki fyrr en markinu var náð. Verkefnið var tveggja ára tilraunaverkefni sem Auður byggði upp en hún er í forsvari fyrir starfsemina. Þarna verður starfandi teymi tveggja iðjuþjálfa og sálfræðings. Það mun sinna eftirfylgni við geðsjúka utan stofnana. Efld verður virkni og þátttaka í samfélaginu, - sem er mjög mikilvægt til að ná góðum bata. Sambærileg þjónusta í nágrannalöndum okkar hefur gefið mjög góða raun. Ég fagna þessum áfanga og hvet alla þá sem þurfa stuðning sem þennan til að nýta sér þessa frábæru þjónustu. Mikilvægt er að kynna vel þessa starfsstöð fyrir almenningi svo hún fái þjónað sem best öllum þeim sem þurfa á henni að halda. MEIRA... Miðvikudagur 12. október 2005
Geðrækt er heilsurækt Ástæða er til að fagna því mikla starfi sem félagasamtök, einstaklingar og aðstandendur geðsjúkra vinna í þágu geðheilbrigðismála hér á landi. Það hefur komið vel fram í umfjöllun um þennan málaflokk nú í október. Þar ber að nefna Geðhjálp, klúbbinn Geysi og Rauða krossinn ásamt mörgum öðrum. Ég kynntist hinu merka Geðræktarverkefni þegar ég sat þar í stjórn, en það verkefni hefur átt stóran þátt í að breyta afstöðu til geðsjúkdóma og allri umræðu um þá. MEIRA... Mánudagur 10. október 2005
Engin heilsa án geðheilsu Geðsjúkir hér á landi búa við mikla fátækt, einangrun og fordóma. Þeir eru fátækasta fólkið á Íslandi. Þetta kom fram í máli Páls Bierings, lektors við HÍ, á ráðstefnu Rauða krossins um geðheilbrigðismál í síðustu viku. Hann byggir þetta á niðurstöðum könnunar, sem hann gerði ásamt fleirum, niðurstöðum sem kalla á brýnar úrbætur. Fólk með alvarlega geðsjúkdóma er atvinnulaust og lifir á örokubótum, sem eru lágar. Það veldur því að þessu fólki reynist erfitt að komast út úr félagslegri einangrun. Margþætta þjónustu vantar fyrir þennan sjúklingahóp, - heimageðhjúkrun, fagráðgjöf og persónulega þjónustu. Svona er ástandið í dag, 10. október 2005, á alþjóða geðheilbrigðisdeginum. Þó að nokkuð hafi miðað í þjónustu við geðsjúka er enn langt í land. Í dag hvetja geðlæknar til að mótuð verði heildstæð stefna í málflokknum og full ástæða er til að fá upplýsingar um það hvað líður aðgerðaáætlun heilbrigðisráðherra í geðheilbrigðismálum. Fyrir 10 mánuðum undirritaði hann í Helsinki, ásamt rúmlega 50 starfsbræðrum sínum, yfirlýsingu um að komið yrði á slíkri áætlun til næstu 5-10 ára. Samkvæmt henni á að efla geðheilsu allra, uppræta fordóma, efla varnir gegn sjálfsvígum og tryggja geðheilbrigðisþjónustu í heilsugæslunni og utan stofnana s.s. á heimilum. Auka skal rannsóknir og tryggja fé til geðheilbrigðismála. Áhersla var einnig lögð á að aðstandendur geðsjúkra, fagaðilar og sjúklingarnir sjálfir yrðu kallaðir til þessarar vinnu. Nú er spurt: Hvað líður þessari vinnu? Hverjir hafa verið kallaðir til? Er ráðherra með nefnd að störfum eða vinnuhóp við að koma aðgerðaáætuninni í framkvæmd? "Það er engin heilsa án geðheilsu" var yfirskrift Helsinki-fundarins í janúar. Í ljósi niðurstaðna rannsókna á stöðu geðsjúkra er mikilvægt að vinna hratt og vel. Við verðum að bæta stöðu og hag geðsjúkra. Boltinn er nú hjá heilbrigðisráðherra. MEIRA... Fimmtudagur 06. október 2005
Í lífshættu vegna lyfjaskorts Krabbameinssjúk börn og fjöldi annarra sjúklinga líða fyrir að lyfjafyrirtæki standa ekki við skuldbindingar sínar. Mannslíf eru í hættu. Undanfarið hafa borist fréttir af alvarlegu ástandi vegna lyfjaskorts í landinu. Lífsnauðsynleg lyf, ákveðin sykursýkislyf, skjaldkirtilslyf og krabbameinslyf fyrir börn hefur skort. Fólk hefur verið í lífshættu og sjúklingar liðið miklar þjáningar vegna þess að ekki eru til rétt lyf. Samkvæmt lögum er lyfjaheildsölum skylt að eiga nægar birgðir af ákveðnum skráðum lyfjum. Með þessum lyfjaskorti er verið að brjóta landslög. Kvartanir vegna þessa berast Landlækni. Heilbrigðisráðherra tók undir alvarleika málsins í umræðu á Alþingi í morgun, þegar ég spurði hann hvernig hann hygðist bregðast við þessu. Hann ætlar að kalla saman hagsmunaaðila og ræða verklagsreglur. Það er gott. Ráðherra gerir sér grein fyrir að aðgerða er þörf, en það þarf án efa meira til. Engin ákvæði eru í lyfjalögunum um viðurlög, ef lyfjafyrirtæki fer á svig við lögin. Lyfjalögin eru í endurskoðun, sem þarf að hraða, svo frumvarp sem tekur á vandanum komi fram á Alþingi. Ýmsum spurningum er ósvarað. MEIRA... Sunnudagur 25. september 2005
Offituvandinn - auglýsingum á óhollustu beint að börnum Í dag er alþjóða hjartadagurinn og hefur umfjöllun í vikunni verið um skýrslu sem Hjartavernd vann í samvinnu við evrópsk hjartaverndarfélög. Hún er um markaðssetningu óhollrar fæðu sem beint er að börnum. Hér er á ferðinni sama umræða og átti sér stað í vetur um þingmál mitt og félaga minna í Samfylkingunni um takmörkun á auglýsingum á óhollustu sem beinist að börnum. Þetta þingmál fékk ekki afgreiðslu á Alþingi en var mikið rætt í samfélaginu og m.a. harðlega gagnrýnt af auglýsendum og markaðsmönnum og svo frjálshyggjuliðinu, sem taldi þarna hina mestu forsjárhyggju á ferðinni. Offita er einn stærsti heilbrigðisvandinn sem vestrænar þjóðir standa frammi fyrir. 20% evrópskra skólabarna eru of feit og fjórðungur þeirra líður vegna offitu. Henni fylgja margir alvarlegir sjúkdómar s.s. hjarta- og æðasjúkdómar, áunnin sykursýki og ýmis stoðkerfisvandi, svo fátt eitt sé upp talið. MEIRA... Sunnudagur 08. maí 2005
UMRÆÐA ER NAUÐSYNLEG Ástæðulaust er að taka umræðu eins og fram fór á föstudaginn var á Alþingi um svar ráðherra við fyrirspurn minni sem áfellisdóm yfir foreldrum barna með athyglisbrest og ofvirkni, eins og sumir hafa gert. Það er ekki óeðlilegt að menn velti fyrir sér þeim mörgu möguleikum sem gætu e.t.v. verið ástæða fyrir þeirri stöðu sem við erum komin í með þessa gífurlegu aukningu á svo stuttum tíma. Þarna var verið að ræða málin málefnalega og reynt að kalla eftir skýringum á þessari þróun. Í svona umræðu þarf að fara varlega og hún er vissulega vandasöm, en engu að síður verður að vera hægt að ræða þessi mál þegar upplýsingar koma fram eins og í svari heilbrigðisráðherra. Annað væri ábyrgðarleysi af stjórnmálamönnum. MEIRA... Föstudagur 06. maí 2005
HEIMSMET Í LYFJANOTKUN BARNA Við höfum sett heimsmet í notkun lyfja tengdum athyglisbersti og ofvirkni hjá börnum. Það kemur fram í ógnvænlegu svari heilbrigðisráðherra við spurningum mínum um gífurlega notkun þessara lyfja hér á landi. Það eru dæmi um að símtal við lækni endi með lyfjaávísun og 10 mínutna heimsókn til geðlæknis einnig. Um það leiti sem aukningin á ritalinnotkuninni hefst eða um 2001 hætti landlæknisembættið að krefjast þess að læknar sæktu um það til embættisins að ávísa rítalíni fyrir þá sjúklinga sem þess þyrftu. Verður ekki að taka það eftirlit upp að nýju? MEIRA... Laugardagur 26. mars 2005
Hreyfing sem meðferð Rannsóknir sýna að ávísun á hreyfingu er raunhæfur kostur. Meta verður í hverju tilfelli hvort sú leið á við viðkomandi sjúkling. Í erindi sem Ingibjörg Jónsdóttir lífeðlisfræðingur hélt á ráðstefnu Hugarafls í síðustu viku kom fram að rannsóknir sýndu að hreyfing hefur áhrif á sömu boðefni líkamans og ýmis lyf svo sem geðlyf. Nú liggur fyrir Alþingi tillaga mín og þingmanna úr öllum flokkum um að heilbrigðisráðherra undirbúi það að hreyfing geti orðið valkostur í heilbrigðisþjónustu, sem lækning og í fyrirbyggjandi tilgangi þannig að læknar geti vísað á hreyfingu á sama hátt og á lyf eða læknisaðgerðir. Til þess að hægt sé að vísa á hreyfingaráætlanir þurfa þær að vera fyrir hendi. Við leggum því til að það verði metið hvort setja þurfi á laggirnar nám eða endurmenntun fyrir þá sem muni hafa umsjón með hreyfingar , lífsstíls eða þjálfunaráætlunum. Svíar, Danir og Norðmenn hafa í nokkur ár gert tilraunir með að vísa á hreyfingu sem úrræði í stað þess að vísa á lyf með góðum árangri. Þar er vísað á hreyfingu bæði sem meðferð og til heilsueflingar. MEIRA... Fimmtudagur 17. febrúar 2005
Rétturinn til hreins lofts Nýverið komu fram alvarlegar upplýsingar um hve óbeinar reykingar eru skaðlegar heilsu þeirra sem fyrir þeim verða. Þær eru hættulegri heilsunni en reykingarnar eru reykingamanninum sjálfum. Í ljósi þessa er óviðunandi að starfsmenn veitinga- og skemmtistaða líði vegna áhrifa af óbeinum reykingum. Þetta er ein fárra stétta sem ekki fær vernd í tóbaksvarnalögum og vinnuverndarlögum. Þetta starfsfólk býr margt við það í vinnu sinni að anda að sér reykmenguðu lofti þó að sannað sé að það valdi óþægindum, sjúkdómum og dauðsföllum. Rannsóknir sýna að fólk sem vinnur á vínveitingabar en reykir ekki er með svipaða þéttni nikótíns í blóði og fólk sem reykir daglega. Nú getum við snúið vörn í sókn í þessum efnum með því að styðja frumvarp Sivjar Friðleifsdóttur, sem ég , Jónina Bjartmarz og Þuríður Backmann flytjum með henni. Með því förum svipaða leið og ýmsar þjóðir í kringum okkur og stöndum um leið við alþjóðlega samninga um tóbaksvarnir sem við erum aðilar að. Berum virðingu fyrir heilsu hvers annars og tryggum starfsfólki á veitingahúsum viðunandi starfsumhverfi og gestum hreint loft. MEIRA... Fimmtudagur 20. janúar 2005
Atlagan gegn offitunni Takmörkum auglýsingar á ruslfæði - Evrópusambandið vill bann Nokkur umræða hefur orðið um þingmál mitt og fleiri þingmanna Samfylkingarinnar um að settar verði reglur um að auglýsingum um óhollustu verði ekki beint að börnum, sem lið í að sporna við ofþyngd og offitu hjá börnum. Nú hefur Evrópusambandið tekið enn dýpra í árinni en við Samfylkingarþingmenn. Þar á bæ hafa menn gefið framleiðendum eitt ár til að bæta merkingar á matvöru og hætta auglýsingum á ruslfæði sem beint er að börnum, samkvæmt fréttum Jyllands-Posten og Financial Times í dag. Þetta er liður í baráttunni gegn síauknum offituvanda í Evrópu. Við vitum að miklar líkur eru á því að feitt barn verði feitur fullorðinn. Það er einnig mikið áhyggjuefni hve mikil aukning er á sjúkdómum sem eru afleiðingar offitu, það er eitt af stærstu heilbrigðisvandamálum framtíðarinnar. MEIRA... Miðvikudagur 15. desember 2004
Vakna þú mín Þyrnirós! Enn eru menntunarmál geðsjúkra í óvissu. Engu er líkara en ráðherra sofi Þyrnirósarsvefni á meða tíminn líður hratt og óvissan kvelur geðsjúka sem bíða í skammdeginu eftir svari. "Málið er í farvegi", sagði Þorgerður Katrín, " - við verðum að leysa það." En ekkert gerist. Fyrir viku ræddi ég málið á Alþingi. Þá var liðin vika frá því að menntamálaráðuneytið lofaði lausn. Nú eru liðnar tvær vikur og ekkert heyrist enn frá stjórnvöldum Hvers vegna er málið látið bíða svona? Fólk er áhyggjufullt og óöryggi ríkir á heimilum geðfatlaðra, meðal aðstandenda og meðal kennara hjá Fjölmennt sem sinna mjög dýrmætu og mikilvægu starfi, - bæði hjá Geðhjálp og Fjölmennt. Við eigum ekki að þurfa að horfa upp á biðlista í þessari þjónustu, en þriðjungur þeirra sem sótti um námsvist í haust komst ekki að. Öryrkjum fjölgar og ráðamenn kvarta yfir því. Hvers vegna taka menn ekki höndum saman og leysa þennan vanda nú þegar? Menntamálaráðherra vill leysa málið og heilbrigðisráðherra talaði einnig í þá veru. Hvernig væri nú að drífa þetta af fyrir jólin þannig að fólk þurfi ekki að búa við þessa óvissu? Hvernig væri nú að finna leið til að útvega fjármuni — þetta eru lágar fjárhæðir sem um er að ræða — þannig að hægt verði að sinna því mikilvæga starfi sem þarna er unnið og tryggja að allir komist að. Ekki komust nema tveir þriðju nemenda að í haust þegar 6 milljónir króna runnu til verkefnisins. Viðbótarfjármagn þarf til þess að hópurinn geti hafið starfsmenntun sína og endurhæfingu og komist aftur út í lífið. MEIRA... Föstudagur 15. október 2004
Sálfræðiþjónusta verður ekki niðurgreidd þrátt fyrir heimild Sálfræðiþjónusta verður ekki niðurgreidd á næstunni þótt Alþingi hafi breytt lögum í þannig að það sé heimilt. Þetta kom fram í máli heilbrigðisráðherra í utandagskrárumræðu um geðheilbrigðismál sem ég átti við hann í gær. Þetta eru slæmar fréttir. Nú stendur fólki með geðræn vandamál, s.s. þunglyndi, kvíða eða aðra geðræna kvilla, aðeins til boða niðurgreidd þjónusta geðlæknis. Ég minni á að viðtalsmeðferð er oft árangursríkari en lyfjameðferð. Slík meðferð á að vera sambærilegur valkostur. Nú kostar tími hjá sálfræðingi sjúklinginn um eða yfir 5000 krónur og er ljóst að margan sjúklinginn munar um þá fjárhæð. Hér er því verið að beina fólki frekar til geðlæknis og jafnvel í lyfjameðferð, með niðurgreislu fyrir læknisþjónustu einvörðungu. Þetta kallar á aukin útgjöld ríkisins og er til verulegs óhagræðis fyrir sjúklinga. Alvarleg staðreynd er, að bið eftir tíma hjá geðlækni er nú 3-5 mánuðir. MEIRA... Mánudagur 03. maí 2004
Enn lengist bið eftir heilsugæslustöð í Voga- og Heimahverfi Um 9 þúsund manns í Voga- og Heimahverfi þurfa að öllum líkindum enn að bíða í 1- 2 ár eftir að fá lögbundna heilsugæsluþjónustu, en í hverfinu eru um fjórðungur íbúa yfir 67 ára aldri. Heilsugæsluþjónustan í Reykjavík er í nokkrum ólestri, sérstaklega í Heima- og Vogahverfi, sem er algjörlega án heilsugæslustöðvar þannig að fólkið í hverfinu fær ekki lögbundna þjónustu. Íbúafjöldinn þar er um 9 þúsund manns. Á þriðja þúsund íbúa í Voga- og Heimahverfinu eru yfir 67 ára aldri, eða um fjórðungur íbúa hverfisins. Til samanburðar má nefna að á landsvísu er hlutfall þeirra sem eru 67 ára og eldri um 10%. Þetta er næstfjölmennasta hverfi aldraðra í Reykjavíki, kemur næst á eftir miðborginni. Í hverfinu eru nokkur hjúkrunarheimili og þurfa íbúarnir þar að sækja heilsugæslu út fyrir svæðið eins og aðrir íbúar. MEIRA... Þriðjudagur 09. mars 2004
Heimahjúkrunin í höfn Það er ánægjuefni að samningar hafa náðst í heimahjúkrunardeilunni og að heimahjúkrunin hér á höfuðborgarsvæðinu verði komin í samt lag á næstu dögum. Mikilvægt er að deilan skuli vera leyst, því heimahjúkrun er mörgum lífsnauðsynleg þjónusta sem alls ekki má skerða. Þetta er mikill léttir fyrir þá sem þarfnast þjónustunnar og aðstandendur þeirra. Það er alltaf slæmt þegar viðkvæmir hópar eins og þeir sem þurfa heimhjúkrun líða fyrir kjaradeilur, en það tókst þó að halda úti lágmarksþjónustu á meðan samningaviðræður voru í gangi og aldrei skapaðist vandræðaástand. Það má þakka mjög miklu vinnuálagi þeirra sem enn voru við störf, - því dugmikla fólki ber að þakka sérstaklega. Þeir kostir sem felast í nýja samkomulaginu, að starfsfólkið í heimahjúkrun geti valið um sólarlagskerfið í akstursmálunum, rekstarleigu og 3ja launaflokka hækkun eða akstursdagbók, hafa greinilega leyst úr ágreiningnum. Það að allir starfsmennirnir koma aftur til starfa á næstu dögum segir sína sögu. Með þessu samkomulagi var verið að koma í veg fyrir að kerfisbreytingar í þjónustunni bitnuðu á starfsfólkinu í formi kjaraskerðingar og það hefur greinilega tekist. Þessar breytingar hafa ekki í för með sér sparnað fyrir hið opinbera og gera menn á þeim bæ sér vonir um talsverða hagræðingu í heimahjúkruninni í framhaldinu, án þess að þjónustan skerðist. Það verður að tryggja að þessi nýi samningur verði ekki til þess að rýra heimahjúkrunina á nokkurn hátt, en reynslan á eftir að leiða það í ljós. Þessi niðurstaða virðist við fyrstu sýn jákvæð fyrir alla aðila, neytendur þjónustunnar og veitendur og svo hið opinbera. Nú þegar þessi deila er frá er mikilvægt að huga alvarlega að skorti á hjúkrunarrýmum, sem er aðkallandi vandamál. Hér bíða á fjórða hundrað manns í brýnni þörf eftir plássi á hjúkrunarheimili. Þá þarf að huga að heilsugæsluþjónustunni hér á höfuðborgarsvæðinu, sem enn er í óviðunandi ástandi. MEIRA... Föstudagur 06. febrúar 2004
Stefnuleysið bitnar á fjölfötluðum Átakanlegt er að sjá hvernig fjárvöntunin á Landspítalanum mun bitna á 55 fjölfötluðum sjúklingum á hæfingardeildinni í Kópavogi, sem áformað er að leggja niður. Sambærilega þjónustu er hvergi að hafa en hún er mörgum þeirra lífsnauðsynleg. Það er vissulega álitamál hvort endurhæfing sem þessi á heima á hátæknisjúkrahúsi, en yfirvöld geta ekki hegðað sér á þennan hátt. Að hætta þjónustunni án þess að nokkuð taki við er ábyrgðarlaust. Ef menn vilja færa þjónustuna frá Landspítala á að gera það markvisst og sjá um leið til þess að ómetanleg reynsla og sérþekking. sem starfsfólkið í Kópavogi býr yfir, glatist ekki. Ég hvet ráðherra til að beita sér fyrir því að tryggja þessum sjúklingum þjónustu áfram s.s. með því að fá Styrktarfélag lamaðra og fatlaðra, núverandi starfsfólk eða aðra til að taka að sér rekstur deildarinnar. Það þarf að gera áður en hinir reyndu starfsmenn sem búið er að segja upp ráða sig í önnur störf. Nú bíða sjúklingarnir og aðstandendur þeirra, eins og geðsjúkir á Arnarholti, milli vonar og ótta eftir að ráðherranefnd ráðslagi um örlög þeirra. Þetta er mjög alvarleg staða, sem verður að bæta úr fljótt. Það verður að hafa hraðar hendur því þessir hópar eru viðkvæmir fyrir því að óvissa ríki um framtíðar skipan mála í aðbúnaði og þjónustu við þá. Látum þessa fjölfötluðu sjúklinga og geðfatlaða ekki líða fyrir það að stjórnvöld hafi ekki unnið heimavinnuna sína undanfarin ár og skilgreint hvaða þjónustu eigi að veita á Landspítalanum og hvaða þjónustu sem þar er nú skuli veita utan hans. MEIRA...
Landsmenn vilja góða heilbrigðisþjónustu Almenningur getur ekki sætt sig við þegar ómarkvisst er skert þjónusta á Landspítalanum eins og nú er gert, með því að mæta ekki fjárþörf spítalans, sem leiðir til þess að þeir sem sannarlega þurfa þjónustu fá hana ekki og ekkert kemur í staðinn. Þetta er vanvirðing við vilja meirihluta almennings, sem hefur ítrekað lýst þeim vilja sínum að standa skuli vörð um velferðarkerfið og heilbrigðisþjónustuna. Menn eru tilbúnir að greiða þá skatta sem til þess þarf, enda næst jöfnuður best með því móti. Það vantar hundruð milljóna króna til að Landspítalinn geti veitt óbreytta þjónustu. Í stað þess að ráðherra axli þá pólitísku ábyrgð að ákveða hvaða þjónustu skuli veita, skerða, eða hætta að bjóða upp á, er ábyrgðinni varpað yfir á starfsmenn spítalans. Afleiðingar þessa ráðslags verða oftar en ekki þær að þeir sem síst geta barist fyrir rétti sínum líða fyrir niðurskurð á þjónustu. MEIRA... Þriðjudagur 04. nóvember 2003
Ósanngjörn gjaldtaka Ungar konur sem fá alvarlega blóðsjúkdóma, s.s. hvítblæði eða krabbamein, sem kallar á mergskipti, þurfa að ganga í gegnum lyfjameðferð, sem hefur þær afleiðingar að þær verða ófrjóar. Þær geta ekki eignast börn eftir slíka meðferð. Fari þessar komur í eggjatöku og tæknifrjóvgun fyrir þessa lyfjameðferð þurfa þær að greiða fyrir hana háar fjárhæðir, tvö til þrjú hundruð þúsund krónur, jafnvel meira eftir aðstæðum þeirra. Tæknifrjóvgun er erfið meðferð fyrir heilbrigðar konur, hvað þá alvarlega veikar, og eftir hana tekur við mikil og erfið krabbameinsmeðferð hjá þessum ungu konum sem ríkið rukkar svona grimmt. Það er ósanngjarnt að sækja þessar háu fjárhæðir í vasa ungra, alvarlega veikra kvenna, sem fara í meðferð til að bregðast við hliðarverkunum lyfja sem þær verða að taka, svo þær geti ef til vill eignast barn síðar á lífsleiðinni. Nú ætti ráðherra að breyta gjaldskrá tæknifrjóvgunardeildar í þá veru að þessar ungu konur fái þessa meðferð endurgjaldslausa. Jón Kristjánsson heilbrigðisráðherra svaraði fyrirspurn á Alþingi frá mér í gær um þetta og sagðist mundu kanna hvort ástæða væri til að breyta reglum í þágu þessara kvenna, en þær eru sem betur fer ekki margar á hverju ári. Það ætti því ekki að vera tiltökumál fyrir ríkissjóð að greiða þennan kostnað. Það væri réttlætis- og mannúðarmál. MEIRA... Fimmtudagur 18. september 2003
Sagan endalausa Enn er runninn upp sá tími að Landspítalinn ákallar stjórnvöld vegna þess að til hans er ekki ætlað nægilegt fjármagn svo hann geti sinnt því hlutverki sem honum er ætlað að sinna. Enn á að leysa fjárhagsvanda þessa eina bráðasjúkrahúss okkar með fjárveitingu á aukafjárlögum, sem dugar þó alls ekki til. Hversu lengi á þetta að ganga svona? Það er löngu orðið tímabært að yfirvöld heilbrigðismála taki á sig rögg og leysi eilífan fjárhagsvanda spítalans. Þau þurfa að tryggja að verkaskipting í heilbrigðiskerfinu sé skýr. MEIRA... Þriðjudagur 18. mars 2003
TUTTUGU SINNUM HÆRRI GJÖLD NÚ Það er ótrúlegt að sjá hvernig ríkisstjórnin hefur hækkað álögur á sjúklinga í stjórnartíð sinni. Greiðslur fyrir röntgenrannsóknir, sem kostuðu 900 krónur, sem var fast gjald, þegar ríksstjórn Davíðs Oddssonar tók við árið 1995, hafa nú 20-faldast. Röntgenrannsóknin sem kostaði 900 krónur kostar nú að hámarki 18.000 krónur, - segi og skrifa átján þúsund krónur! Hið sama hefur einnig verið uppi á teningnum hvað varðar greiðslur sjúklinga fyrir ferliverk. MEIRA... Fimmtudagur 31. október 2002
STYTTUM BIÐ SJÚKLINGA ENGAR reglur eru til um hámarksbiðtíma eftir læknisaðgerð hér á landi. Það er óviðunandi. Ég hef lagt til á Alþingi þrívegis að lögfestar verði reglur um 3-6 mánaða hámarksbið. Langur biðtími eftir aðgerð hefur í för með sér mikil óþægindi fyrir sjúklinga og aðstandendur þeirra. Á Norðurlöndum hafa verið settar slíkar reglur. Í Svíþjóð og Noregi hefur verið lögfestur þriggja mánaða hámarksbiðtími. Í Danmörku er biðtíminn tveir mánuðir. Þar eiga sjúklingar rétt á að fara annað til að fá læknisaðgerð líti út fyrir að biðin verði lengri og greiðir hið opinbera þá fyrir aðgerðina sömu upphæð og upprunalega sjúkrahúsið hefði fengið. MEIRA... Fimmtudagur 10. október 2002
GEÐHEILBRIGÐISMÁL Í BRENNIDEPLI Í dag 10. október er alþjóða geðheilbrigðisdagurinn. Minntist ég hans á Alþingi í morgun. Hann er nú haldinn undir kjörorðinu ,,Áhrif áfalla og ofbeldis á börn og unglinga." Geðsjúkdómar eru meðal algengustu sjúkdóma á Íslandi og má geta nærri að fjórði hver Íslendingur greinist með geðraskanir einhverntíma á lífsleiðinni. Það eru um 70.000 manns. Löng bið er eftir meðferð og endurhæfingu geðsjúkra og nokkurra mánaða bið er eftir tíma hjá geðlæknum samkvæmt upplýsingum frá Geðhjálp. Heimilislausir alvarlega geðsjúkir á höfuðborgarsvæðinu fylla nokkra tugi, og þá vantar tilfinnanlega þjónustu. Tengslaleysi heilbrigðisþjónustunnar við fangelsin er áhyggjuefni, fangar með geðræn vandamál og fíkniefnavanda fá ekki þjónustu og dæmi eru um að geðsjúkir séu settir í fangelsi fyrir að stela sér til matar fyrir smápeninga. MEIRA... Þriðjudagur 08. október 2002
FORELDRUM I BIÐRÖÐUM HJÁLPARSTOFNANA FJÖLGAR Alþingi hefur samþykkt að mótuð skuli heildarstefna í málefnum barna og unglinga og einsýnt er að þeirri vinnu verður að hraða. Stefnumótun dugar þó skammt ef foreldrum er ekki gert kleift að veita börnum sínum viðunandi aðbúnað og viðurværi. Góð lífsskilyrði í uppvexti eru mikilvægur þáttur í líðan barna. Það er því óþolandi og velferðarsamfélagi okkar til vansa að foreldrar skuli þurfa að bíða í röðum eftir aðstoð líknarfélaga og hjálparstofnana til að geta búið börn sín skammlaust í skólann. Samkvæmt upplýsingum frá Hjálparstofnun kirkjunnar fer þeim foreldrum fjölgandi sem þurfa að leita þangað eftir aðstoð vegna kostnaðar við skólagöngu barna sinna. Það er alvarlegur vitnisburður um stefnu ríkisstjórnar Davíðs Oddssonar. Bág kjör fjölda barnafólks, einstæðra foreldra og ekki síst öryrkja og barna þeirra eru stór hluti vanda margra barna... MEIRA... Sunnudagur 06. október 2002
ARÐSEMI MEÐFERÐAR SÁÁ
Þeir sem hætta áfengisneyslu eftir meðferð hjá SÁÁ greiða kostnaðinn við meðferð sína og allra sem fóru í hana með þeim og gott betur með þáttöku sinni á vinnumarkaði eftir meðferðina. Þeir eru líka búnir að greiða fyrir hana margfalt með opinberum gjöldum af því áfengi sem þeir eru búnir að drekka. Þetta eru athyglisverðar niðurstöður Guðmundar Ólafssonar hagfræðings og lektors í HÍ, sem ég kynnti í ræðu á 25 ára afmælisfundi SÁÁ í gær. Guðmundur byggði útreikninga sína á sænskri rannsókn og tölum frá íslensku stórfyrirtæki. MEIRA... Mánudagur 30. september 2002
GEÐSJÚKIR OG LOFORÐ DAVÍÐS
Í stefnuræðu sinni í upphafi þings í fyrra, lagði Davíð Oddsson sérstaka áherslu á stórverkefni hjá ríkisstjórninni í heilbrigðismálum, sem var átak í geðheilbrigðismálum. Á þeim tíma voru 50 – 60 geðsjúkir heimilislausir, 2-300 biðu eftirmeðferðar, og engin eftirfylgni var með þeim sem útskrifuðust af stofnunum. Nú ári síðar er ástandið óbreytt. Samkvæmt upplýsingum frá Geðhjálp eru enn um 50 manns án heimilis, þar af eru 20 manns ýmist innan eða utan fangelsa. Hundruð ungra og aldinna með geðraskanir bíða meðferðar og endurhæfingar og allt að fjögurra mánaða bið er eftir að komast að hjá geðlæknum. Nú síðast berast fréttir af því að alvarlega geðsjúkum sé vísað frá viðeigandi stofnunum. Hvar er átakið sem Davíð Oddsson lofaði þjóðinni fyrir hönd ríkisstjórnarinnar í stefnuræðunni fyrir ári? Hvar eru efndir loforðanna til geðsjúkra og aðstandenda þeirra? MEIRA... |