|
|
Þriðjudagur 20. mars 2007
"Drengir, sjáið þið ekki veisluna?" Hér á landi búa um 5.300 börn í fjölskyldum sem hafa tekjur undir fátæktarmörkum og í könnun Gallup frá í janúar telur fjórðungur Íslendinga að í fjölskyldu sinni séu einhverjir sem eru fátækir. Bein tengsl eru milli fjárhagslegrar afkomu foreldra og andlegrar líðanar barna. Fátækustu börnin voru margfalt líklegri til þess að sýna mikil einkenni depurðar, að vera leið og einmana, langa til að gráta og eiga erfitt með að sofna. Fátæk börn fóta sig verr í skólakerfinu og gengur illa í námi. Fátæku börnin töldu sig síður bundin af reglum samfélagsins. Þeim fannst heimurinn óréttlátur. Börnin sem upplifðu fátækt fannst þau heilsulausari, þau hreyfðu sig minna, voru of þung, borðuðu óhollari mat, minna af ávöxtum og fóru mun sjaldnar til tannlæknis en önnur börn. "Drengir, sjáið þið ekki veisluna?" - voru viðbrögð fjármálaráðherra Sjálfstæðisflokksins við þeirri staðreynd að barnabætur hafa lækkað ár frá ári í tíð ríkisstjórnarinnar þar til nú rétt fyrir kosningar, en málið var rætt í þinglok. Þarf frekari vitna við að gefa þurfi þessum stjórnarherrum frí í vor? MEIRA... Fimmtudagur 15. mars 2007
Reykvískar konur geta breytt sögunni Ég hef sjaldan fylgst með eldhúsdagsumræðum af meiri athygli en nú. Ingibjörg Sólrún bar af forystumönnum flokkanna, bæði í framgöngu og málflutningi. Mikið gætum við íslenskar konur verið stoltar af henni sem forsætisráðherra. Það er í valdi kvenna á höfuðborgarsvæðinu að gera kosningarnar í vor sögulegar og gera konu, - reynda konu, fyrrverandi borgarstjóra í Reykjavík - að fyrsta forsætisráðherra Íslands. Konu sem hefur látið verkin tala þegar hún var í aðstöðu til að breyta einhverju, - við munum t.d. hvernig ástandið var í dagvistarmálunum áður en Ingibjörg Sólrún kom í ráðhúsið. Það var eins og ástandið er í hjúkrunarmálunum nú. Hún breytti stöðunni gagnvart barnafólkinu og hún mun leysa hjúkrunarvandann komist Samfylkingin til valda. Og ekki má gleyma jafnréttismálunum, sem hún náði miklum árangri í með því að setja þau í forgang í borginni. Til þess að stuðla að þeim sögulegu tíðindum að kona verði forsætisráðherra verða konurnar sem studdu okkur jafnaðarmenn, - kusu Samfylkinguna í síðustu kosningum - að styðja okkur áfram. Hugsið ykkur hversu mikilvægt það er í jafnréttis- og kvennabaráttunni að ungt fólk fái slíka fyrirmynd, konu sem forsætisráðherra – frekar en að í forsætisráðuneytið setjist einn karlinn enn að loknum kosningum. Kona í forsætisráðuneytinu hefði sambærileg áhrif og þegar Vigdís Finnbogadóttir var forseti. Það hafði ótrúlega mikil áhrif á stöðu kvenna og viðhorf landsmanna til þess að konur standi jafnfætis körlum í forystuhlutverkum. MEIRA... Mánudagur 23. október 2006
Kosningamiðstöðin opin í bankastræti Nú hefur kosningamiðstöð mín verið opnuð í Bankastræti 11. Á opnunardaginn leit þar inn fjöldi fólks, sem naut veitinga og söngs Karlakórs Reykjavíkur, sem svíkur engan sem á hlýðir. Svo fengu börnin skemmtun við sitt hæfi þegar Skoppa og Skrítla skokkuðu í Bankastrætið úr Þjóðleikhúsinu eftir sýningu þar og sungu og dönsuðu í kosningamiðstöðinni. Nú er framundan undirbúningurinn fyrir prófkjörið 11. nóvember, en í því geta allir tekið þátt sem undirrita stuðningsyfirlýsingu eða eru félagar í Samfylkingunni. Ég stefni á fjórða sæti í prófkjöri Samfylkingarinnar í Reykjavík, en það er sama sæti og ég hlaut í prófkjöri flokksins fyrir fjórum árum og skipaði ég þá 2. sæti listans í Reykjavík suður. Prófkjörið er sameiginlegt fyrir bæði kjördæmin í borginni. Kosningastjóri minn er Linda Ásgeirsdóttir, en hún stjórnaði líka kosningabaráttu minni í prófkjörinu fyrir fjórum árum. Kosningamiðstöð mín í Bankastræti 11 verður opin að jafnaði kl. 12 – 18 daglega fram á prófkjörsdaginn, laugardaginn 11. nóvember. Síminn þar er 534 9498 og gsm sími minn er 894 6500. Í Bankastræti 11 er alltaf heitt á könnunni og meðlæti - og eru allir alltaf velkomnir. MEIRA... Sunnudagur 23. apríl 2006
Tími til að lifa? Sjálfstæðisflokkurinn í Reykjavík vill veita fólki "tíma til að lifa". Meiri tíma með fjölskyldu sinni, börnum og foreldrum bjóða þeir nú, sem er góðra gjalda vert. Ætli fulltrúar Sjálfstæðisflokksins sem eru við völd í landinu hafi frétt af þessum vilja flokksfélaga sinna, sem sækjast eftir umboði kjósenda í borginni til að stjórna þar? Það er ekki mikill tími til að lifa hjá láglaunafólkinu, sem er með um 100 þúsund krónur í laun á mánuði, eins og umönnunarstéttirnar hjá Eflingu eru með. Ekki hefur fjármálaráðherra Sjálfstæðisflokksins viljað hækka daggjöldin á hjúkrunarheimilunum svo þetta fólk fái sómasamlegar tekjur og "tíma til að lifa". Hjá þeim eru það bara aukavaktir og púl til að ná endum saman, sem reyndar dugar varla til. Harpa Njáls skrifar vandaða grein í Mogga á laugardaginn, þar sem hún gerir grein fyrir afleitri stöðu hinna lægst launuðu á tímum ríkisstjórnar Sjálfstæðisflokks og Framsóknar. Sú grein ætti að vera skyldulesning allra þeirra sem ganga að kjörborði á næstunni í borgarstjórnarkosningunum. Steinunn Valdís borgarstjóri tók á launamálum hinna lægstlaunuðu hjá Reykjavíkurborg, en ríkisstjórnin hefur ekki viljað gera hið sama fyrir umönnunarstéttir í velferðarþjónustunni, sem heyrir undir ríkið. Harpa bendir líka á hvernig ríkisstjórnin hefur leikið barnabótakerfið hér á landi. Ísland er eina ríkið á Norðurlöndum sem tengir barnabætur tekjum foreldra. Annars staðar á Norðurlöndum er barnabótum ætlað að tryggja börnum afkomu og uppeldisskilyrði. Árið 2005 hófust skerðingar barnabóta ef einstætt foreldri fór yfir tæpar 62 þúsund krónur í tekjur á mánuði! Og af miklum rausnarskap voru skerðingarmörkin hækkuð í rúmar 77 þúsund krónur um síðustu áramót. Þessi skerðingarmörk eru skammarlega lág og bendir Harpa á að þau þyrftu að vera 190 þúsund krónur á mánuði til að tryggja afkomu og öryggi barna og unglinga. Sjálfstæðismenn ættu að beita sér fyrir sómasamlegum barnabótum þar sem þeir ráða nú, í stað þess að yfirbjóða ókeypis leikskólapláss fyrir takmarkaðan hóp barnafólks ef þeir nái völdum í borginni. Flokksbræður þeirra hafa brugðist barnafólki með skammarlegum skerðingum barnabóta, - og brugðist láglaunafólki með því að fólk í fullu starfi ber svo lítið úr býtum að það lifir við skort og fátækt. Fólk sem hegðar sér svona á valdastóli í ríkisstjórn á ekki skilið að fá stuðning til valda í borginni. MEIRA... Þriðjudagur 08. júlí 2003
SVIKIN KOSNINGALOFORÐ KORTERI EFTIR KOSNINGAR Það voru ekki liðnir tveir mánuðir frá kosningum þegar ríkisstjórnin tilkynnti að ekki væri ætlunin að standa við kosningaloforðin fögru, enda líklega aldrei verið ætlunin. Þrátt fyrir að menn hafi vissulega gert sér grein fyrir því löngu fyrir kosningar að verulegrar þenslu myndi gæta vegna framkvæmdanna á Austurlandi þá voru kjósendur á Norðausturlandi ginntir til að styðja stjórnarflokkana með innantómum loforðum og fagurgala um jarðgöng. Og nú korteri eftir kosningar veigrar ríkisstjórnin sér ekki við að tilkynna að ekkert verði af göngum í bráð. Athyglisvert er að fjármálaráðherra upplýsti í fréttum að frekari niðurskurður á vegaframkvæmdum væri fyrirhugaður. Hvað munu þær fela í sér? Á nú að taka til baka miljarðana sex sem ríkisstjórnin veitti til vegaframkvæmda og menningarhúsa rétt fyrir kosningar í vor? Það er mikilvægt að stjórnin upplýsi nánar um þessar fyrirætlanir í samgöngumálum. MEIRA... Mánudagur 19. maí 2003
SAMFYLKINGIN Á HELMING KVENNA Á ÞINGI
Nýafstaðnar kosningar hafa vakið að nýju umræðuna um stöðu kvenna á Alþingi, enda er full ástæða til þess. Í Alþingiskosningunum tókst Samfylkingarkonunum ágætlega að halda sínu. Þær eru enn 9 í þingflokknum, tvær hættu og tvær nýjar komu inn í staðinn. Við erum nú tæpur helmingur þingflokksins, 9 af 20, en vorum 9 af 17 áður. Við erum líka tæplega helmingur kvenna meðal þingmanna, eða 9 af 19, og við vorum líka með konu sem forsætisráðherraefni. Er ekki ástæða til að jafnréttissinnar fagni þessu og gleðjist? Formaður Kvenréttindafélags Íslands hefur nú kvatt sér hljóðs á öldum ljósvakans og harmað mjög hve hlutur kvenna versnaði og virðist lítið komast að annað en konurnar í stjórnarflokkunum og rýr hlutur þeirra. Nú á Kvenréttindafélagið að heita þverpólitíkst félag og því væri eðlilegt að fulltrúar þess vektu einnig athygli á því þegar konum gengur vel, ná árangri og eru í forystusveit í stjórnmálum, eins og hjá Samfylkingunni. MEIRA... Miðvikudagur 19. mars 2003
UPPRÆTUM FÁTÆKT OG LÆKKUM SKATTA
Samfylkingin vill skoða af alvöru fjölþrepaskattkerfi sem hefur þá kosti að það dregur úr skattbyrði þeirra sem hafa meðaltekjur og þar undir og dregur úr áhrifum jaðarskatta. Slíkt kerfi auðveldar tekjujöfnun og er því í anda þeirrar jafnaðarstefnu sem við stöndum fyrir. Samhliða þessu viljum við taka upp viðræður við samtök öryrkja og aldraðra um afkomutryggingu svo enginn þurfi að una fátækt eða óvissu um kjör sín, í samræmi við þingmál Jóhönnu Sigurðardóttur og fleiri þingmanna Samfylkingarinnar. Þetta kynnti Ingibjörg Sólrún Gísladóttir á Kópavogsfundinum undir kjörorðinu ,,Vorið framundan" í vikunni. MEIRA... |