|
|
Föstudagur 06. febrúar 2009
Opnun heimasíðu Þjónustu- og þekkingarmiðstöðvar fyrir blinda, sjónskerta og daufblinda einstaklinga Í dag heimsótti ég Þjónustu- og þekkingarmiðstöð fyrir blinda, sjónskerta og daufblinda einstaklinga og opnaði þar nýja og glæsilega heimasíðu miðstöðvarinnar: www.midstod.is en á henni er að finna allar upplýsingar fyrir blinda, sjónskerta og daufblinda einstaklinga og aðstandendur þeirra. Með stofnun miðstöðvarinnar um áramótin urðu þau tímamót að málefni blindra, sjónskerta og daufblindra fluttust frá heilbrigðisráðuneytinu til félags- og tryggingamálaráðuneytisins. Þetta er skynsamleg og réttmæt breyting, því þar eiga málefni fatlaðra sinn rétta samastað. Málefni fatlaðra eru jú ekki heilbrigðismál enda eru fatlaðir einstaklingar ekki veikir. Um er að ræða einstaklinga sem búa við skerta getu og færni á tilteknum sviðum vegna fötlunar. Starfsfólk stofnunarinnar hefur haft í mörg horn að líta síðustu vikur og mánuði við undirbúning að starfsemi hennar. Ég þakka þeim öllum fyrir þeirra mikið og... MEIRA... Þriðjudagur 03. febrúar 2009
Heimsókn á Vinnumálastofnun við Engjateig Í dag heimsótti ég þjónustuskrifstofu Vinnumálastofnunar við Engjateig í Reykjavík. Mikill fjöldi fólks hefur skráð sig án atvinnu þessa fyrstu daga mánaðarins og annríki því verið mikið hjá stofnuninni við skráningu umsókna um atvinnu og atvinnuleysisbætur. Hitti ég þar marga sem eru í erfiðum sporum. Gissur Pétursson, forstjóri Vinnumálastofnunar, tók á móti mér ásamt Hugrúnu Jóhannesdóttur, forstöðumanni þjónustumiðstöðvar Vinnumálastofnunar á höfuðborgarsvæðinu, og Hrafnhildi Tómasdóttur, sviðsstjóra ráðgjafarsviðs þjónustuskrifstofunnar á Engjateigi. Þau kynntu mér helstu verkefni stofnunarinnar. Mikil áhersla er lögð á að fólk nýti sér þær leiðir sem hún hefur yfir að ráða til að styðja fólk til virkni og sjálfseflingar með þátttöku í fjölbreyttum námskeiðum sem stofnunin stendur fyrir og eru fólki að kostnaðarlausu. Ég tel ekkert verkefni brýnna en að sporna gegn vaxandi atvinnuleysi með öllum tiltækum ráðum... MEIRA... Laugardagur 06. september 2008
Stöndum með ljósmæðrum Því var haldið fram í heitum pottum að Samfylkingarkonur stæðu ekki með ljósmæðrum í baráttu þeirra fyrir bættum kjörum. Það er nú eitthvað annað. Stjórn Kvennahreyfingar Samfylkingarinnar ályktaði sérstaklega til stuðnings þeim í byrjun deilunnar og síðan höfum við mætt allstaðar þar sem kallað hefur verið eftir stuðningi við ljósmæður, að sjálfsögðu, - og hvatt til samninga við þær í umræðum. Ríkisstjórnin ætlar að endurmeta laun hefðbundinna kvennastétta það kemur skýrt fram í stjórnarsáttmálanum og konurnar í Samfylkingunni hvetja ríkisstjórnina til að standa við það. Það tekur eflaust tíma, en það verður að gerast fyrr en síðar. Hér er ályktunin okkar til stuðnings ljósmæðrum: MEIRA... Miðvikudagur 13. ágúst 2008
Barátta fyrir betri heilsu, - ekki boð og bönn Engum blandast hugur um að offita er stór heilsufarsvandi sem þjóðir heims glíma við, - vandi sem fræðimenn hafa kallað faraldur. Í baráttunni við vandann er engin ein leið, taka þarf á mörgum þáttum, auka hreyfingu, borða hollan mat, minnka alltof stóra skammta, forðast sælgæti o.s.frv. Mikið áhyggjuefni er að börn eru orðin of feit og feitt barn verður oftast feitur fullorðinn. Morgunblaðið fjallaði um þennan vanda í gær og ræddi við Elvu Gísladóttur hjá Lýðheilsustöð, sem benti á eina leið í baráttunni sem er að takmarka auglýsingar á óhollustu sem beint er að börnum. Þetta er leið sem ég hef lagt til á Alþingi og margar vestrænar þjóðir hafa farið. Í tillögu minni er ekki verið að leggja til boð og bönn heldur að heilbrigðisráðherra nái samkomulagi við auglýsendur, framleiðendur og innflytjendur á óhollri matvöru um að auglýsa ekki á þeim tímum þegar börn eru að horfa á sjónvarp. Ná þarf samkomulagi um að markaðssetja vörurnar ekki gagnvart börnum sem hafa oft hvorki þroska né vit til að meta þær upplýsingar sem að þeim er beint. Áhrifamáttur auglýsinga er mikill og verulegur þegar börnin eru annarsvegar. Í leiðara Morgunblaðsins kveður við gamla frjálshyggjutóninn, talað er um reglugerðarsvipur og athafnafrelsi. Það er útúrsnúningur. Þessi tónn á ekki við í þessu máli. Foreldarnir verða að segja nei við börnin, segir Mogginn. Vissulega er ábyrgð foreldra mest þegar um er að ræða að börnin þeirra borði hollan mat, en það kemur ekki í veg fyrir að aðrir taki líka á sig ábyrgð í baráttunni fyrir bættri heilsu þjóðarinnar. Jafnvel skynsömustu foreldrar gefa eftir þegar linnulaus áróður fyrir óhollustu hefur dunið á börnum þeirra með barnaefninu öllum stundum. Við verðum öll að axla ábyrgð svo fylgikvillar offitunnar sligi ekki heilbrigðiskefið og rýri lífsgæði komandi kynslóða. MEIRA... Þriðjudagur 01. júlí 2008
Hvað gerist nú í málum lífeyrisþega? „Hvað gerist næst í okkar málum?“ spyrja lífeyrisþegar mig gjarnan þessa dagana. Miklar breytingar voru gerðar í vetur á Alþingi á almannatryggingalögunum sem bæta kjör lífeyrisþega verulega í samræmi við stefnuyfirlýsingu ríkisstjórnarinnar frá því í maí í fyrra og stefnumál Samfylkingarinnar. Þær breytingar hafa verið að taka gildi í áföngum. Þann 1. apríl tók gildi fyrsti áfanginn og nú 1. júlí tekur næsti áfangi gildi og þá öðlast lífeyrisþegar, aldraðir og öryrkjar mikilvægar kjarabætur og réttindi, - frítekjumörk hækka og ýmsar fleiri breytingar frá í vetur taka gildi. Senn er búið að uppfylla flest í stjórnarsáttmálanum sem varðar lífeyrisþega. MEIRA... Fimmtudagur 08. maí 2008
Ekkert að óttast – Norðurlöndin okkar fyrirmynd Ríkisstjórn Samfylkingarinnar og Sjálfstæðisflokksins leggur ríka áherslu á öfluga velferðarþjónustu. Stefna hennar að veita hér heilbrigðisþjónustu á heimsmælikvarða, lækka lyfjaverð, einfalda greiðsluþátttöku hins opinbera, kostnaðargreina heilbrigðisþjónustuna og beita sér fyrir aukum jöfnuði. Það kemur fram í stjórnarsáttmálanum og heilbrigðisráðherra vinnur ötullega að þessum verkefnum. Fyrirmyndin að þeim breytingum sem eru í undirbúningi er sótt til Norðurlandanna, - landa sem eru þekkt um allan heim fyrir góða heilbrigðisþjónustu og öflugasta velferðarkerfi sem til er. Ríkisstjórnin hefur ítrekað verið vænd um að stefna að einkavæðingu í heilbrigðiskerfinu og alið er á ótta við það af andstæðingum hennar. Það er engin einkavæðing á ferðinni í þeim breytingum sem framundan eru. Nefndin sem er að fara yfir rekstur Landspítala - háskólasjúkrahúss skoðaði t.d. þrjú háskólasjúkrahús á Norðurlöndum til að hafa sem fyrirmynd í störfum sínum. Ef ætlunin væri að einkavæða – hefði þá ekki verið leitað annað? Það er verið að horfa til norræna velferðarkerfisins og reynslunnar þar. Verið er að koma á sjúkratryggingastofnun til að annast kaup og sölu fyrir hið opinbera á heilbrigðisþjónustu - að sænskri fyrirmynd, - en Norðurlöndin hafa fyrir löngu kostnaðargreint öll verk í heilbrigðisþjónustunni. Það er nauðsynlegt til að gera kerfið skilvirkt, - það er í þágu sjúklinga, skattgreiðenda og allra landsmanna. Í undirbúningi er nýtt greiðsluþátttökukerfi í heilbrigðisþjónustunni fyrir almenning, sem mun auka jöfnuð og réttlæti. Það kemur í stað núverandi kerfis sem hefur gengið sér til húðar og er bæði óréttlátt og yfirmáta flókið. Í nýja kerfinu verða allir sjúklingar varðir fyrir miklum heilsufarskostnaði. Þessar breytingar eru líka sóttar til Norðurlandanna, sem hafa haft þetta kerfi um árabil og hafa af því góða reynslu. Í öllum þessum breytingum verður það grundvallarmarkmið jafnaðarstefnunnar tryggt, að fólki verður ekki mismunað eftir efnahag eða stöðu og enginn mun geta greitt til að komast framfyrir í röðinni. Við munum standa vörð um það. Heilbrigðisþjónustan og velferðarkerfi okkar er og verður áfram félagsleg þjónusta, sem verður efld á margvíslegan hátt að norrænni fyrirmynd. MEIRA... Laugardagur 19. apríl 2008
Hvers eiga börnin að gjalda? Auglýsendur notfæra sér sakleysi barna og auglýsa stíft þegar þau horfa á sjónvarpið. Börn undir tveggja ára aldri þekkja vörumerki úr auglýsingum. Þau gera sér ekki grein fyrir hvað er barnaefni og hvað auglýsing, fyrr en um 5 ára aldur og um 8 ára aldur átta þau sig fyrst á því að auglýsingar eru hlutdrægar. Þess vegna er markaðssetning sem beint er að börnum siðlaus. Ríkissjónvarpið auglýsir meira en Stöð 2 á tímum barnaefnis. Útvarpsstjóri segir litlu breyta fjárhagslega fyrir Sjónvarpið þó það hætti að auglýsa óhollustu á áhorfstímum barna. Hvernig stendur á því að við förum ekki að dæmi annarra Evrópulanda og tökum á þessum ósóma? Hvorki menntamálaráðherra né heilbrigðisráðherra aðhafast í málinu, en Umborðsmaður barna og Talsmaður neytenda hafa barist fyrir því um skeið að við hættum að markaðssetja óhollustu gagnvart saklausum börnum. Þorgerður Katrín sagðist ætla að ræða við Pál útvarpsstjóra um þetta þegar hún færi yfir útvarpssamninginn, en vill samt að sjónvarpsstöðvarnar ákveði þetta sjálfar. Það sagði hún þegar ég ræddi við hana á Alþingi í vikunni um mikilvægi reglna um takmörkun auglýsinga á tímum barnaefnis. Í síðustu viku kynnti menntamálaráðuneytið á málþingi nýja sjónvarpstilskipun Evrópusambandsins. Þar kom fram að á Ísland gilda mun vægari reglur en í nágrannalöndum okkar um auglýsingar sem beint er að börnum. Á kynningunni kom fram að stór hluti auglýsinga í kringum barnatíma eru auglýsingar á skyndibita, sykruðum vörum og óhollustu ......... MEIRA... Fimmtudagur 17. apríl 2008
Fullnaðarsigur Um síðustu mánaðamót náðist loksins fram fullnaðarsigur í þeirri mannréttindabaráttu sem lífeyrisþegar hafa háð á annan áratug. Baráttu fyrir þeim sjálfsögðu mannréttindum að lífeyrir úr almannatryggingunum skerðist ekki vegna tekna maka. Sigur í baráttu sem hefur sett mark sitt á söguna m.a. með makalausri túlkun á öryrkjadómnum, mótmælum og kröfugöngum. Það var ekki fyrr en Samfylkingin var komin í ríkisstjórn og með forræði á lífeyristryggingum almannatrygginga, að þessi sjálfsögðu mannréttindi voru í höfn. Um 5.800 lífeyrisþegar fengu hærri bætur við afnám makategningarinnar, - mismiklar eftir tekjum og samspili þeirra, - jafnvel tugi þúsunda á mánuði. Fleiri kjarabætur tóku gildi um mánaðamótin, - skerðingarhlutfall ellilífeyris lækkaði úr 30% í 25% og frítekjumark hækkaði til samræmis við örorkulífeyri sem kom 460 ellilífeyrisþegum til góða. Vasapeningar til tekjulausra hjúkrunarsjúklinga á hjúkrunarheimilum hækkuðu um tæplega 30%, en frá desember hafa þeir hækkað úr 28.600 í 38.225 krónur. Einnig tók gildi 90.000 króna frítekjumark á fjármagnstekjur til að minnka of- og vangreiðslur. Gera má ráð fyrir að sú aðgerð komi í veg fyrir skerðingu bóta hjá 7–8.000 lífeyrisþegum, en þorri þeirra hefur fjármagnstekjur undir þessum mörkum. MEIRA... Þriðjudagur 25. mars 2008
Straumhvörf á Akranesi - endurhæfingarklúbbur Nú er liðið rúmlega hálft ár frá því að ég tók við verkefnistjórn Straumhvarfaverkefnissins og það er ánægjulegt að sjá hve vel miðar áfram í því. Okkur mun takast í ár að halda þeirri áætlun sem gerð var í upphafi. Straumhvörf, fimm ára verkefni félagsmálaráðuneytisins til eflingar á þjónustu við geðfatlaða hefur á undanförnum rúmum 2 árum stutt fjölmörg verkefni í þágu geðfatlaðra um allt land. Undir Straumhvarfa verkefnið heyra 160 manns, en mun fleiri njóta góðs af því. Á morgun miðvikudag verður undirritað samkomulag um stuðning við endurhæfingarklúbb fyrir öryrkja á Akranesi. Það er þriggja ára tilraunaverkefni og koma að verkefninu Akraneskaupstaður, Sjúkrahúsið á Akranesi, Akranesdeild Rauðakrossins og svæðisskrifstofa málefna fatlaðra á Vesturlandi. Á starfsvæði svæðisskrifstofunnar á Vesturlandi eru 6 manns sem heyra beint undir verkefnið, þrír á Akranesi og þrír í Borgarnesi. Verið er að leysa húsnæðisvanda þeirra á mismunandi hátt eftir því hvað hentar hverjum og einum. Það gerum við í samstarfi við ýmsa, s.s. Brynju hússjóð ÖBÍ, sveitarfélögin í Borgarnesi og á Akranesi og fleiri aðila. Á síðasta ári hófu Straumhvörf að veita öllum skjólstæðingum sínum í Borgarnesi frekari liðveislu, - þjónustu sem heldur áfram. Undanfarnar vikur hafa verið gerðir samningar um þjónustu og húsnæði fyrir geðfatlaða á vegum Straumhvarfa á Suðurlandi, Selfossi, Reykjanesbæ og Kópavogi. Straumhvörf starfa eftir stefnumótun félagsmálaráðuneytisins í málefnum geðfatlaðra og kemur að húsnæði, fjölbreyttri þjónustu, endurhæfingu, starfsendurhæfingu, upplýsingu fyrir aðstandendur og námskeiðum fyrir starfsfólk sem vinnur fyrir geðfatlaða svo fátt eitt sé talið. MEIRA... Sunnudagur 03. febrúar 2008
ÖRYGGISNETIÐ EINFALDAÐ OG STYRKT Almannatryggingakerfið er orðið eins og illa farin og stagbætt flík eftir áratuga misvandaðar viðgerðir. Óteljandi breytingar á þessum mikilvægu lögum hafa verið gerðar án þess að horfa á þau í heild. Flestar ríkisstjórnir hafa lofað að endurskoða lögin í heild en því miður gefist upp. Það hefur bitnað á þeim sem þurfa að treysta á stuðning almannatrygginganna í veikindum, erfiðleikum, eða þegar breytingar hafa orðið í lífi þeirra. Þarna er verk að vinna. Velferðarkerfið verður að vera í sífelldri endurskoðun og þróun í takt við stöðugar breytingar í samfélaginu. Horfa verður á kerfið í heild og hlúa að því. Sterkt og skiljanlegt velferðarkerfi er hverju samfélagi dýrmætt. Í stefnuyfirlýsingu ríkisstjórnarinnar frá 23. maí 2007 segir um þessi mál: „Ríkisstjórnin leggur áherslu á að styrkja stöðu aldraðra og öryrkja. Unnið verði að einföldun almannatryggingakerfisins.“ Einnig er þar lögð áhersla á að gera samfélagið barnvænt með heildstæðri aðgerðaáætlun í málefnum barna. Ingibjörg Sólrún Gísladóttir lagði þunga áherslu á velferðarmálin við ríkisstjórnarmyndunina og sér þess stað í stjórnarsáttmálanum. Frá því að ríkisstjórn Samfylkingarinnar og Sjálfstæðisflokksins tók við völdum í vor hafa velferðarmálin verið á dagskrá. Ekki hefur verið slegið slöku við, - kallaðir til sérfræðingar og hagsmunasamtök í vinnu við að undirbúa breytingar á lögum til að styrkja möskvana í því öryggisneti sem velferðarkerfið okkar er, í anda stefnumiða okkar jafnaðarmanna og ríkisstjórnarinnar. Vanda þarf til verka. MEIRA... Fimmtudagur 06. desember 2007
Kjör lífeyrisþega bætt verulega – kosningaloforðin efnd Í gær voru kynntar ráðstafanir ríkisstjórnarinnar í þágu aldraðra og öryrkja sem lögfestar verða eftir áramót. Þetta er annað skrefið sem tekið er í að styrkja velferðarkerfi okkar eins og flokkarnir lofuðu fyrir kosningar. Formenn stjórnarflokkanna þau Ingibjörg Sólrún Gísladóttir og Geir H. Haarde eiga hrós skilið fyrir að hafa gengið svo vasklega fram í þessum málum. Stjórnarflokkarnir voru mjög samstíga í því að þessi velferðarmál, kjarabætur til lífeyrisþega og málefni barna væru forgangsmál. Á vorþinginu var samþykkt aðgerðaráætlun ríkisstjórnarinnar í málefnum barna og ungmenna sem þegar er farið að vinna eftir í Félagsmálaráðuneytinu og nú voru kynntar ráðstafanir í þágu aldraðra og öryrkja. Þær fela m.a. i sér að skerðing tryggingabóta vegna tekna maka verður afnumin, sem er mikið mannréttindamál og hefur verið báráttumál hagsmunasamtaka bæði aldraðra og öryrkja. Frítekjumark atvinnutekna lífeyrisþega 67 – 70 ára hækkar í 100.000 á mánuði og vasapeningar lífeyrisþega á stofnunum verða hækkaðir. Gripið verður til sérstakra aðgerða til að draga úr of- og vangreiðslum tryggingabóta, nokkuð sem hefur komið illa við marga lífeyrisþega sem hafa fengið kröfur um endurgreiðslu hárra fjárhæða frá Tryggingastofnun aftur í tímann, oft ef tekjur þeirra hafa farið örlítið yfir ákveðin viðmiðunarmörk. Ríkissjóður mun einnig tryggja að ellilífeyrisþegar fái að lágmarki 25 þúsund krónur á mánuði frá lífeyrissjóði frá 1. júlí 2008 eins og lofað er í stjórnarsáttmálanum. Öryrkjum verða tryggðar sambærilegar kjarabætur en útfærslur verða undirbúnar í tengslum við starf framkvæmdanefndar um örorkumat og starfsendurhæfingu. MEIRA... Fimmtudagur 29. mars 2007
Unga Ísland - börnin í forgang Eitt mikilvægasta verkefni samtímans er að tryggja velferð barna á Íslandi. Niðurstöður kannana sem kynntar hafa verið undanfarið sýna að þar er verk að vinna. Of mörgum börnum hér líður illa. Of mikið álag er á foreldrum og vinnutími hér á landi er lengri en í nágrannalöndum okkar. Við í Samfylkingunni mun á næsta kjörtímabili beita okkur fyrir markvissum aðgerðum til að bæta stöðu barna og barnafjölskyldna á Íslandi. Það verður gert í samstarfi við foreldra, skóla, sveitarfélög, samtök atvinnurekenda, verkalýðsfélög, meðferðaraðila, samtök sem vinna að heill barna og samtök fólks af erlendum uppruna. Þessi stefnumótun Samfylkingarinnar í málefnum barna og ungmenna var kynnt í dag. Hún er metnaðarfull og framsækin. Upplausn í fjölskyldum og flókin fjölskyldutengsl vekja vanlíðan hjá börnum. Það koma m.a. fram í máli Sigrúnar Júlíusdóttur prófessors í HÍ í morgun á ráðstefnunni "Mótum framtíð" sem stendur nú yfir á Nordica hótelinu. Ég minni líka á átakanlegar niðurstöður tveggja nýlegra rannsókna um átakanlegar afleiðingar fátæktar á börn, en 5.300 eru í fjölskyldum með tekjur undir fátæktarmörkum. Börnin okkar eru það dýrmætasta sem við eigum og það er mikilvægur mælikvarði á framsýni þjóða, hvernig þær búa yngstu kynslóðir sínar undir framtíðina. Við viljum að börnin okkar verði sterkir og sjálfstæðir einstaklingar. MEIRA... Þriðjudagur 27. mars 2007
Löglegt en siðlaust? "Ný sýn - Nýjar áherslur". Framkvæmdasjóður aldraðra var látinn greiða fyrir gerð og útsendingu kynningarbæklings heilbrigðisráðherra með þessari yfirskrift um persónulegar áherslur hennar í öldrunarmálum. Ef til vill löglegt, en er það siðlegt? Barátta Svavar Sigurðssonar gegn eiturlyfjum, Óperukórinn, Söngskólinn í Reykjavík, Háskóli Íslands, Ungmennafélag Íslands, Tónaljón og fjöldi einstaklinga og samtaka hefur fengið styrki úr sjóðnum, jafnvel án þess að vita að peningarnir komi þaðan. Í Framkvæmdasjóðinn greiða allir landsmenn nefskatt til að byggja upp þjónustu við aldraða. Það er hneisa að fé úr sjóðnum sé notað í hin og þessi gæluverkefni þegar 400 aldraðir bíða í brýnni þörf eftir hjúkrunarýmum, hátt í 1000 aldraðir hjúkrunarsjúklingar eru í þvingaðri samvist í fjölbýlum og 70 manns eru fastir inni á LSH í allt að ár vegna þess að þeir komast ekki inn á hjúkrunarheimili. Ekkert nýtt hjúkrunarpláss hefur bæst við á síðasta ári og ekkert á þessu ári, þrátt fyrir fögur loforð heilbrigðisráðherra ríkisstjórnarinnar reglulega í tólf ár. Framkvæmdirnar á þeim bæ er ein skóflustunga í ár! Skuldar ríkisstjórnin ekki öldruðu, veiku fólki afsökunarbeiðni á þessu ástandi? Afsökunarbeiðni á meðferð mikilla peninga úr mörkuðum tekjustofni, Framkvæmdasjóðnum, í ýmis gæluverkefni þegar verkefnin sem sjóðurinn var stofnaður til að kosta með sérstökum skatti eru látin sitja á hakanum með þessum alvarlegu afleiðingum. MEIRA... Laugardagur 24. febrúar 2007
Slæm samviska Nú blossar upp bullandi samviskubit hjá framsóknarmönnum vegna vanrækslu í málefnum eldri borgara. Það má sjá á heimasíðu Framsóknarflokksins og í skrifum heilbrigðisráðherra undanfarið. Framsókn hefur haft málaflokkinn á sinni hendi í 12 ár og aldraðir finna á eigin skinni hvernig flokknum hefur farist stjórn hans úr hendi. Það er svolítið seint að koma með loforð og áætlanir um úrbætur, - á næstu árum og ártugum, það trúir þeim ekki nokkur maður eftir það sem á undan er gengið. Eftir 12 ár yfir málefnum aldraðra er staðan svona: Þriðji hver eldri borgari þarf að lifa undir lágmarksframfærslu, 400 eru í brýnni þörf í biðeftir hjúkrunarrýmum, 70 eru fastir inni á Landspítala og yfir 900 eru í þvingaðri samvist við aðra í fjölbýli á hjúkrunarheimili. Heimahjúkrun er mun lakari hér á landi en á öllum hinum Norðurlöndunum. Starfsfólk hjúkrunarheimila neyðist til að vekja athygli á bágum kjörum sínum með setuverkföllum. Skammtímarýmum fyrir heilabilaða fækkar árlega, - er nú aðeins eitt á Landakoti. Öldruð hjón og pör eru ítrekað aðskilin á síðustu æviárunum vegna úrræðaleysis í vistunarmálum. Skattbyrði eldri borgara hefur aukist á valdatíma ríkisstjórnarinnar. Framsóknarmenn hafa ítrekað greitt atkvæði á Alþingi gegn kjarabótum fyrir eldri borgara s.s. hækkun á frítekjumarki, hærri bótum, minni tekjutengingum, afnámi tekjutengingar við tekjur maka, og að Framkvæmdasjóður aldraðra fari í uppbyggingu hjúkrunarrýma eins og hann var stofnaður til. MEIRA... Föstudagur 29. desember 2006
Hálf sagan sögð – gamla kerfið áfram Fyrir rúmu ári spurði ég heilbrigðisráðherra að því á Alþingi – einu sinni sem oftar - hvort og hvenær mætti búast við því að Tryggingastofnun sendi fólki afsláttarkort vegna lækniskostnaðar um leið og það hefði öðlast rétt til þess, án þess að það þyrfti að safna kvittunum og sækja síðan um kortið. Ráðherra sagðist búast við að Tryggingastofnun hæfi slíka þjónustu í byrjun ársins 2006. Nú er heilt ár liðið og viti menn: Forstjóri Tryggingastofnunar upplýsir í fjölmiðlum að nú ætli stofnunin að verða notendavæn og senda afsláttarkortin til fólks án umsóknar þegar hámarksupphæð er náð. Betra seint en aldrei. En því miður er þessi ráðstöfun ekki notendavænni en svo að enn þurfa menn að halda til haga öllum kvittunum fyrir greiðslu á læknisþjónustu vegna þess að Tryggingastofnun er bara með upplýsingar um útgöld fyrir sérfræðilæknisþjónustuna. Það sem greitt er fyrir þá þjónustu er aðeins hluti af þeim greiðslum sem veita réttinn til afsláttarkorts. Þarna vantar enn greiðslur sem inntar hafa verið af hendi t.d. á heilsugæslustöðvum og göngudeildum. Hagræðingin er því lítil, því fólk gæti verið komið með réttinn til afsláttarkorts fyrir löngu án þess að Tryggingastofnun hefði hugmynd um það, ef viðkomandi hefur verið að greiða fyrir aðra þjónustu en hjá sérfræðingum. Fréttaflutningurinn var þannig að fólk gæti jafnvel haldið að það þyrfti ekki lengur að geyma og safna saman kvittunum. Svo er ekki, enn er sama gamla kerfið í gangi. Það er ótrúlegt að árið 2007 skuli ekki vera hægt að halda utan um þennan kostnað og afgreiða afsláttarkortin sjálfkrafa þegar hámarki er náð. Við vitum að fjöldi sjúklinga er ófær um að safna saman kvittunum, halda reiður á þeim og fara síðan með þær til Trygginngastofnunar til að fá afsláttarkort. Ég nefni sem dæmi fólk með þroskahömlun, heilabilun og ýmsa geðræðna sjúkdóma. Þessi aukna þjónusta kemur fólki vel ef það nær hámarksgreiðslum hjá sérfæðingum eingögnu, annars ekki. MEIRA... Laugardagur 04. nóvember 2006
Látið ekki plata ykkur! Fyrir borgarstjórnarkosningarnar í vor lofuðu frambjóðendur Sjálfstæðisflokksins öldruðum öllu fögru, - bættum kjörum, betri þjónustu og svo framvegis. Nú koma efndirnar, 9% hækkun á þjónustugjöldum. Hækkun sem nær til heimaþjónustu, félagsstarfs og þjónustu í þjónustuíbúðum aldraðra. Sú litla kjarabót sem lífeyrisþegar fengu í kjölfar hækkana á vinnumarkaði er þarna takin aftur með einu pennastriki borgarstjórans í Reykjavík. Þetta fólk er flest með lægstu tekjurnar. Eins og Ólafur Ólafsson hefur bent á þá er þessi hópur í 70% tilfella lágtekjufólk. Nú lofa frambjóðendur Sjálfstæðisflokksins enn öldruðum öllu fögru. Í grein í Morgunblaðinu í gær vill Ármann Kr. Ólafsson, frambjóðandi í prófkjöri Sjalfstæðisflokksins, að aldraðir geti aukið tekjur sínar án þess að þær skerði bætur almannatrygginga. Það þýðir lítið að halda slíku fram, - flokkur hans er ekki tilbúinn í slíkt en leggur til smánarlega aðgerð eftir tvö ár og þá aðeins 17.000 krónur á mánuði sem skerði ekki bæturnar. Við í Samfylkingunni leggjum til að menn geti haft 75 þúsund króna tekjur á mánuði án þess að bætur skerðist frá næstu áramótum. Ég segi við alla eldri borgara: Látið ekki plata ykkur. Ríkisstjórnarflokkarnir hafa engan vilja til að breyta þessu skammarlega ástandi. MEIRA... Laugardagur 14. október 2006
Aldraðir ánægðir með tillögur okkar Landssamband eldri borgara hefur lýst yfir ánægju með tillögur okkar í þingmálinu um nýja framtíðarskipan í lífeyrismálum, sem fjallar um lífeyris- og kjaramál eldri borgara. Þar göngum við mun lengra en ríkisstjórnin var tilbúin að gera. Fulltrúar eldri borgara lýstu yfir ánægju sinni við þingflokk Samfylkingar á fundi í vikunni. Þeir ályktuðu síðan ásamt framkvæmdastjórn og trúnaðarmönnum sínum, þar sem kröfur þeirra voru tíundaðar. Þær eru nánast samhljóða tillögum okkar. Það er mjög mikilvægt að fá svo öflugan stuðning við tillögur okkar. Aldraðir krefjast einnig breytinga í skattamálum. Samfylkingin krefst þess einnig í öðru þingmáli að skattkerfið verði endurskoðað með jöfnuð, sanngirni og réttlátari dreifingu að leiðarljósi, auk þess að dregið verði úr jaðarsköttum. Þar er lagt til að sérstaklega verði útfærðar leiðir til að lækka skattbyrði fólks með lágar tekjur og meðaltekjur og að lífeyrisgreiðslur úr lífeyrissjóðum beri fjármagnstekjuskatt í stað tekjuskatts. Tillögur Landssambands eldri borgara eru í takt við tillögur okkar og yrðu veruleg kjarabót ef þær verða að veruleika. Hjá Samfylkingunni eru þessi mál í forgangi. MEIRA... Sunnudagur 08. október 2006
Lífeyrisþega í öndvegi Kjör aldraðra og öryrkja verða í brennidepli fyrir kosningarnar í vor. Breytingar á tryggingakerfinu verða væntanlega lögfestar á Alþingi fyrir áramótin í kjölfar yfirlýsingar ríkisstjórnarinnar og fulltrúa eldri borgara. Þar er ekki gengið nógu langt í að bæta kjörin. Við í stjórnarandstöðunni leggjum til betri kjör strax um áramótin, í sameiginlegu þingmáli stjórnarandstöðunnar um nýskipan lífeyrismála. Við göngum mun lengra en ríkisstjórnin. Við viljum auka svigrúm lífeyrisþega strax til að afla sér tekna án þess að þær skerði lífeyrisgreiðslur þeirra frá Tryggingastofnun. Tillögur okkar stuðla að því að lífeyrisþegar geti notið mannsæmandi kjara eins og aðrir landsmenn og greiðslur taki mið af raunverulegum framfærslukostnaði. Megináherslur okkar umfram tillögur ríkisstjórnarinnar eru: Hærri tekjutrygging, mun minna skerðingarhlutfall gagnvart tekjum, frítekjumark 75 þúsund krónur á mánuði gagnvart alvinnutekjum strax, veruleg kjarabót og hækkaðir vasapeningar til vistfólks á stofnunum og afnám tekjutengingar við tekjur maka, - þetta eru helstu áhersluatriði í tillögum okkar, auk þess sem aldraðir öryrkjar haldi aldurstengdri örorkuuppbót sinni. MEIRA... Föstudagur 08. september 2006
Ómannúðlegur aðskilnaður aldraðra bitnar á heilsu þeirra Eftir þriggja ára aðskilnað í ellinni, langa baráttu og mikla vanlíðan hefur loksins tekist að vista öldruðu hjónin saman sem urðu tilefni fyrirspurna frá mér í vetur á Alþingi. Barnabarn þeirra hafði samband við mig, miður sín yfir meðferðinni á ömmu hans og afa. "Þau eru aðskilin í ellinni og líða mjög fyrir það" sagði ungi maðurinn. Afinn var á hjúkrunarheimili en amman veik ein heima á biðlista eftir hjúkrunarvist, sorgmædd og leið. Ég tók málefni aldraðra í þessari stöðu upp á Alþingi í kjölfarið og spurðist fyrir um ástandið í þessum málum. Þá kom fram að um 100 aldraðir væru aðskildir á þennan hátt eða vistaðir sitt á hvorri stofnuninni. Ég hef fylgst með stöðu gömlu hjónanna sem voru tilefni fyrirspurnar minnar á þinginu. Gamla konan datt ein heima og slasaðist nokkru síðar og lenti á spítala, þar dvaldi hún í 4 mánuði án þess að hægt væri að útskrifa hana vegna skorts á hjúkrunarrými. Eiginmaður hennar var þá á hjúkrunarheimili án þess að hún gæti hitt hann og þau því áfram aðskilin. Síðan var eiginkonan vistuð á öðru hjúkrunarheimili, sem er meira að segja í öðru sveitarfélagi en heimili eiginmannsins. Þegar þarna var komið mótmæltu ættingjarnir harðlega meðferðinni á þeim og nú, eftir langan aðskilnað gömlu hjónanna og þrotlausa baráttu ættingja, eru þau loksins saman á sama hjúkrunarheimili. Þessi meðferð hefur bitnað mjög á heilsu þeirra beggja. Ekki veit ég hvernig ræst hefur úr hjá öðrum í sömu stöðu en svona framkoma við aldrað og veikt fólk er ekki boðleg. MEIRA... Þriðjudagur 05. september 2006
Hvers eiga börnin að gjalda? Börnum af erlendum uppruna er mismunað í aðgangi að námi á Íslandi. Þau fá ekki menntun sem þau eiga rétt á vegna þess að skrifstofufólk hefur ekki haft tök á að gefa þeim kennitölu. Að minnsta kosti átta börn á Ísafirði, ættuð frá Póllandi, fá ekki leyfi til að ganga í grunnskóla vegna þess að þau hafa ekki enn fengið kennitölu. Löng og mikil bið er eftir kennitölum hjá þjóðskrá, en án kennitölu er ekki hægt að skrá sig í sveitarfélag og þar af leiðandi geta skólayfirvöld ekki hleypt börnunum í skólann án þess að gerast lögbrjótar. Hvað á þetta að þýða? Nú verða menn að gefa undanþágu svo börnin fái sína menntun og dragist ekki aftur úr vegna þessa ástands hjá hinu opinbera, sem stendur sig ekki. Í barnasáttmála Sameinuðu þjóðanna kemur skýrt fram að börn eigi rétt á skólagöngu og jöfnum tækifærum til menntunar. Þessi framkoma gagnvart börnum er ómanneskjuleg og á ekki að líðast. Það var skammarlegt að fylgjast með því í sjónvarpinu hvernig eina skólareynsla erlendu barnanna í Ísafirði var að kíkja inn um skólagluggana á félaga sína, sem njóta þeirra forréttinda að fá að fara í skólann. MEIRA... Þriðjudagur 22. ágúst 2006
Mæðrastyrksnefnd enn mikilvæg Í dag opnaði Mæðrastyrksnefnd Reykjavíkur afgreiðslu og skrifstofur í nýju húsnæði að Hátúni 12b. Nú 78 árum eftir stofnun Mæðrastyrksnefndar er enn mikil þörf fyrir starf hennar, en áherslur hafa breyst í tímans rás. Það er áfellisdómur yfir stjórnvöldum að á þeim góðæristímum sem ríkt hafa undanfarið skuli heimsóknum til Mæðrastyrksnefndar fara sífjölgandi. Margar fjölskyldur gætu ekki haldið jól eða aðrar hátíðir ef aðstoðar þaðan nyti ekki við. Það er líka talandi dæmi um aukinn ójöfnuð undir þeirri hægri ríkisstjórn sem nú er við völd að eldri borgurum og örykjum hefur fjölgað mjög í hópi þeirra sem leita til nefndarinnar ár hvert um aðstoð. Það eru ekki lengur aðeins einstæðar mæður sem leita til hennar, karlar hafa bæst í hópinn, bæði einstæðir og með börn á framfæri. Starfsemi nefndarinnar og barátta hefur verið mikilvægur þáttur í velferðarþjónustunni frá því að hún var stofnuð MEIRA... Fimmtudagur 27. júlí 2006
Voru aldraðir plataðir? Samkomulagið sem undirritað var í síðustu viku milli eldri borgara og ríkisstjórnarinnar var ekki samkomulag heldur yfirlýsing ríkisstjórnarinnar. Það sagði Einar Árnason, hagfræðingur eldri borgara, í fréttum í vikunni. Aðeins þriðjungur hækkana væri raunveruleg kjarabót fyrir aldraða. Þessi orð Einars skjóta stoðum undir gagnrýni okkar í Samfylkingunni á hið svokallaða samkomulag við eldri borgara. Þótt það sé í áttina vantar mikið upp á að eldri borgarar fái þær kjarabætur sem vonast var til. Einar bendir á að eldri borgarar séu í erfiðri stöðu og ekki beinir samningsaðilar um þessi mál - það er skrýtið í samráðsnefnd. Það er líka sérkennilegt að nefndin sem skilaði þessu svokallaða átaki var sett á laggirnar til að taka sérstaklega á lífeyrismálunum, en niðurstöðurnar lúta meira að aukinni heimaþjónustu og hjúkrun. Til þess að hægt verði að bæta þá þjónustu verður að meta störf umönnunarfólks til almennilegra launa ella fæst ekki mannskapur í þessi störf og þá er tómt mál að tala um aukna þjónustu. MEIRA... Föstudagur 21. júlí 2006
Átakið mikla Mikið held ég að aldraðir verði vonsviknir þegar þeir finna það á eigin skinni og buddu að hið mikla átak ríkisstjórnarinnar er lítið meira á þessu kjörtímabili en það sem ASÍ samdi um fyrir þá lægst launuðu á vinnumarkaði. Það er hefð fyrir því að slíkt samkomulag skili sér til lífeyrisþega. Til þess þarf ekki nefndir í ráðuneytum. Lítið á að skila sér til aldraðra á valdatíma ríkisstjórnarinnar, en umboð hennar er aðeins til næstu 10 mánaða. Ég efast ekki um baráttu fulltrúa aldraðra í nefndinni, - en þeir náðu ekki meiru fram. MEIRA... Föstudagur 31. mars 2006
Virðingarleysi við aldraða Ástandið á hjúkrunarheimilum og viðbrögð ráðherra og varaformanns fjárlaganefndar Alþingis Einars Odds Kristjánssonar við því, lýsir í hnotskurn afstöðu ríkisstjórnarinnar til aldraðra sjúklinga. Það er rangt að taka þurfi upp kjarasamninga til að leysa þessi mál. Þeir kveða á um lágmarkslaun, en koma ekki í veg fyrir að fólki séu greidd hærri laun. Það er fyrirsláttur ráðamanna. Aftur á móti þarf að hækka daggjöldin til hjúkrunarheimilanna svo hærri launagreiðslur til lægst launuðu umönnunarstéttanna rúmist innan þeirra. Geri ríkisstjórnin það ekki, er það skemmdarstarfsemi á velferðarþjónustunni. Nógu slæmt er ástandið fyrir í hjúkrunarmálum aldraðra og algjört ábyrgðar og virðingarleysi við aldrað fólk að bregðast ekki strax við ástandinu. 60 – 70% starfsmannavelta á hjúkrunarheimilunum og mörg auð rúm á meðan á fjórða hundrað aldraðra bíða eftir hjúkrunarplássum í brýnni þörf, segir sína sögu. Hjúkrunarsjúklingar eru mjög viðkvæmur hópur, sem þolir illa rask og tíðar mannabreytingar. Það er ömurlegt að fylgjast með úrræða- og aðgerðarleysi ráðamanna. Ástandið er alvarlegt þegar Eflingarkonurnar taka til örþrifaráða eins og setuverkfalls, enda stofnanirnar undirmannaðar og álag mjög mikið á starfsmönnum sem kemur auðvitað niður á þjónustunni við hina öldruðu. Sjá nánar í grein í Mbl. í dag og á slóðinni www.althingi.is/arj/greinar/safn/002689.html#002689 MEIRA... Mánudagur 27. mars 2006
Siv fellur á fyrsta prófi Nýr heilbrigðisráðherra ætlar ekki að verða við áskorun frá samtökum aldraðra um að endurskoða lögin um málefni aldraðra, sem samtökin telja dragbít á eðlilega og nauðsynlega framþróun í málaflokknum. Þessi afstaða ráðherrans er vonbrigði fyrir þá sem trúðu yfirlýsingum hennar um að aukin þjónusta við aldraða yrði höfuðverkefni hennar á ráðherrastóli. Þessi afstaða hennar kom fram í fyrirspurnartíma á Alþingi í síðustu viku, er Siv svaraði fyrirspurn frá mér um hvort hún ætlaði að endurskoða lögin. Siv vill að nefnd, sem Ásmundur Stefánsson er formaður í og vinnur á vegum forsætisráðherra, ljúki sínu starfi fyrst, en sú nefnd er aðallega að skoða tekjutengingar og tekjumál aldraðra. Ráðherrann ætlar sem sagt að bíða eftir niðurstöðum þeirrar nefndar áður en farið verður að skoða lög um málefni aldraðra. Er heilbrigðisráðherra ekki búin áð átta sig á því að umboð ríkisstjórnarinnar rennur út eftir rúmt ár? Siv ætlar greinilega að svæfa þetta mál þrátt fyrir hvatningu frá nýju samtökunum AFA, aðstandendafélagi aldraðra, sem segja að nóg sé komið af nefndum og ráðum. MEIRA... Þriðjudagur 29. nóvember 2005
Heilbrigðisráðherra, jólasveinninn og jólakötturinn Heilbrigðisráðherra hefur bakkað með að skerða lífeyri frá Tryggingastofnun niður í 0 ef um ofgreiðslur hefur verið að ræða. 0-greiðslu-reglugerðin hefur verið afturkölluð. Gott hjá Jóni. Svona er ekki hægt að hegða sér, - að skella á svona reglum á aldraða og öryrkja með litlum fyrirvara. Þessum hópi er bjargað frá jólakettinum um þessi jólin. Jón fór líka í stellingar jólasveinsins nú á aðventunni þegar hann ákvað í síðustu viku að tæplega 2000 sjúklingar á stofnunum, sem einungis hafa vasapeninga fyrir persónulegum útgjöldum að fjárhæð tæpar 22 þúsund kr. á mánuði, fengju 26 þúsund króna eingreiðsluna nú um mánaðamótin. Þessu fagna ég, en hvet um leið til að vasapeningakerfið verði endurskoðað. MEIRA... Þriðjudagur 22. nóvember 2005
Leiðréttum þessi ólög Bætur vegna missis fullfrísks maka miðast nú við örorku hins látna ef hann hefði lifað slysið af og eru dregnar frá upphæðinni bætur sem hinn látni hefði fengið frá Tryggingastofnun, úr slysatryggingum og örorkulífeyri frá lífeyrissjóði, en fékk aldrei. Greiðslur sem aldrei voru greiddar eru dregnar frá skaðabótunum. Í tvígang hef ég lagt til að skaðabótalögin verði endurskoðuð og sérstaklega verði hugað að endurskoðun á þeim ákvæðum sem snúa að bótum til eftirlifandi maka eða sambúðarmaka vegna missis framfæranda, en ekkert hefur miðað fyrr en nú að dómsmálaráðherra vill taka á þessu. Fyrir 6 árum var skaðabótalögunum breytt og þá kom inn fáránleg regla um hvernig reikna á út þessar skaðabætur. Ég er sannfærð um að þar var um mistök að ræða við lagasetningu. Í hvert sinn sem ég heyri fréttir um vinnuslys sem leiðir til dauða verður mér hugsað til afleiðinga fáránlegra reglna um útreikning bóta við missi maka í skaðabótalögum. Það er skammarlegt að ekki skuli vera búið að leiðrétta þetta óréttlæti. Í vor tók allsherjarnefnd þingsins þetta ákvæði til umfjöllunar og lagði fram frumvarp til breytinga á því sem ekki náði að verða að lögum. Í fyrirspurnartíma á Alþingi í síðustu viku sagði dómsmálaráðherra að hann væri sammála mér og allsherjarnefnd um að þessu þyrfti að breyta og það yrði vonandi gert á þessu þingi. MEIRA... Þriðjudagur 01. nóvember 2005
Aldraðir eru afskiptir Vitöl við aðstandendur í Kastljósi Sjónvarpsins í gærkvöld sýna glöggt hvernig forgangsröðun ríkisstjórnarinnar í málefnum aldraðra er að leiða til misskiptingar og mismununar. Stjórnvöld hafa með fjársvelti til hjúkrunarheimila og láglaunastefnu í umönnunarstörfum gert það að verkum að fólk sem hefur efni á því kaupir sér og sínum meiri þjónustu inni á öldrunarstofnunum. Það er ömurlegt að ástandið sé orðið þannig að þörf sé á slíkum úrræðum. Ég skil aðstandendur vel, - að þeir grípi til sinna ráða svo þeirra nánustu fái viðunandi þjónustu og kaupi jafnvel að þjónustu fyrir þá - en hvert leiðir þetta? Ekki eru allir svo vel settir að hafa ráð á slíku. Mismunun á þjónustu við aldraða er andstæð jafnaðarstefnunni og á ekki að líðast. Það er stjórnvöldum til háborinnar skammar að svona ástand skuli vera á öldrunarstofnunum eins og þessi viðtöl upplýstu og þrengslin á Sólvangi sýna. Starfsfólk á öldrunarstofnunum vinnur frábært og fórnfúst starf, en það annar ekki allri þeirri þjónustu sem aldraðir vistmennirnir þurfa á að halda. Svona framkoma og forgangsröðun gagnvart öldruðum sem hafa skilað sínu ævistarfi sæmir ekki þjóð sem gumar af því að halda úti velferðarþjónustu á heimsmælikvarða. Hingað og ekki lengra, - snúum vörn í sókn og tryggjum mannsæmandi laun og þjónustu á öldrunarstofnunum okkar. Líðum ekki ójöfnuð, tryggjum öldruðum lífsgæði á ævikvöldinu. MEIRA... Mánudagur 31. október 2005
Mannréttindi og virðing Aðstandendahópur Geðhjálpar var stofnaður í gær á fjölmennum fundi í húsi Geðhjálpar við Túngötu. Með því hefur réttindabaráttu geðsjúkra áskotnast mikilvægur liðsauki. Yfirskrift fundarins var "Fram í dagsljósið", en nauðsynlegt er að öllum í samfélaginu sé ljóst hvernig kjörum og aðbúnaði geðsjúkra er háttað svo unnt sé að ráða bót þar á. Þessum sjúklingahópi ber að tryggja sömu mannréttindi og virðingu og öðrum sjúklingahópum. Krafan um að notendahópurinn komi að stefnumörkun í eigin málum og ákvörðunum um þjónustu er mjög mikilvæg. Enginn þekkir betur hvar skórinn kreppir en þeir sem hafa veikst af geðsjúkdómum sjálfir og aðstandendur þeirra. Á fundinum heyrðust frásagnir af ótrúlegum aðstæðum og kjörum þessa fólks. Aðstandendur eru eða hafa verið margir hverjir í prísund við umönnun á heimilum sínum vegna þessara erfiðu sjúklinga sem ekki hafa átt í nein hús að vernda. Talið er að um 100 geðsjúkir séu án heimilis og stór hópur er án efa hjá foreldrum eða öðrum aðstandendum. Sjúklingarnir þurfa mjög mismunandi þjónustu og stuðning, - sem verður að berast sem fyrst. Þjónusta við þennan sjúklingahóp er 20 árum á eftir þjónustu við aðra. Starfshæfingu verður að bæta og taka á kjaramálum samhliða henni, þannig að þjálfunin virki hvetjandi. Eins og kerfið er byggt upp er það letjandi fyrir sjúklinga að fara út í atvinnulífið. Hastarlegar skerðingar í almannatryggingakerfinu, í reglum lífeyrissjóðanna og í skattakerfinu bíta fast og fljótt þannig að sjúklingar á batavegi hrökkva til baka og veigra sér við að fara í vinnu. Þetta þekki ég ótal dæmi um. Þarna verður að breyta kerfinu. Atvinnuþátttaka þessa hóps er honum og samfélaginu mjög mikilvæg. Heilbrigðisráðherra hefur samþykkt að móta stefnu í málefnum geðsjúkra með aðkomu þeirra sjálfra. Nú er mikilvægt að láta verkin tala. Gott er að fá markaðar tekjur til málaflokksins við sölu Símans, en það dugar ekki eitt og sér. Mikið verk er óunnið. Við verðum að tryggja viðunandi þjónustu, þannig að aðstandendur komist úr þeirri prísund sem margir þeirra eru í vegna þess að þeirra nánustu hafa ekki þá þjónustu sem þeir þurfa frá samfélaginu. Ég óska aðstandendahópnum alls velfarnaðar í starfinu framundan, sem er ærið. MEIRA... Miðvikudagur 05. október 2005
HJÁLP! Náðunarbeiðni Arons Pálma var synjað í gær. Öðru hverju fáum við þingmenn tölvupóst frá þessum unga Íslendingi sem býr við þau ömurlegu örlög að vera í fangelsi vegna óvitaskaps á barnsaldri. Öllum Íslendingum ættu að vera kunn örlög Arons Pálma og baráttan fyrir að leysa hann úr þeirri prísund sem hann er í vestanhafs vegna fáranlegra laga og reglna í Texas. Í tölvupóstinum mínum í dag er ákall um hjálp til okkar frá Aroni Pálma. Það ber yfirskriftina "Ákall um hjálp" og hefst á orðunum: "Dagurinn í dag er sorgardagur….. en ég er engu að síður vongóður". Hann treystir því að við landar hans fáum hann leystan úr haldi með samtakamætti okkar. Hvernig stendur á því að stjórnvöld hafa ekki tekið fastar á málum og fengið Aron Pálma fluttan hingað til lands eins og hann þráir svo heitt? Nú er kominn nýr maður í utanríkisráðuneytið. Ég skora á hann að taka á þessu máli og leysa þennan unga mann úr refsivistinni vestra sem rænt hefur hann eðlilegu lífi barns og unglings. Rísum nú upp öll sem eitt og leggjum honum lið á allan þann hátt sem við getum. Bregðumst ekki þessu ákalli. MEIRA... Þriðjudagur 04. október 2005
Ríkisstjórnin ræðst á hreyfihamlaða Í fjárlagafrumvarpi ríkisstjórnarinnar, sem lagt var fram í gær, finnur hún verðuga matarholu á þessum allsnægtartímum. Aflögufærir að hennar mati eru hreyfihamlaðir sem hafa bensínstyrk frá Tryggingastofnun ríkisins. Þennan styrk 8247 krónur á mánuði á að taka af fötuðum með einu pennastriki. Til að vega upp á móti þessu ætla stjórnvöld að hækka tekjutryggingaraukann, en það kemur hreyfihömluðum til lítillar bjargar því að þeir eru ekkert endilega með þann bótaflokk. MEIRA... Mánudagur 08. ágúst 2005
Fæðingarorlof feðra er jafnréttistæki Viðbrögð stjórnar KEA við því að framkvæmdastjórinn hugðist nýta sér lögbundinn rétt sinn til fæðingarorlofs eru ótrúleg. Stjórnarmenn KEA telja að rétturinn til orlofsins gildi ekki um stjórnendur á háum launum. Þar fara þeir villir vegar. Það var einmitt eitt af markmiðunum með fæðingarorlofi feðra, þar sem þeir halda obbanum af launum sínum í orlofinu, að auðvelda konum á barneignaraldri að komast upp úr glerþakinu svokallaða. Með fæðingarorlofsréttinum til feðra er það jafn mikil áhætta að ráða karl og konu í toppstöðu. Starfsmaðurinn fer í nokkurra mánaða barnseignarfrí hvort sem hann er karl eða kona. Áður var það notað gegn ráðningu kvenna í toppstöður að hætta væri á að þær eignuðust börn og færu í fæðingarorlof, - væru frá vinnu vegna barneigna. Þegar þingflokkur Samfylkingarinnar heimsótti Landspítalann ekki alls fyrir löngu kvartaði einn yfirmaðurinn yfir því við okkur að nú væri ekki hægt að treysta því þegar karl væri ráðinn í yfirlæknisstöðu að hann yrði ekki frá störfum vegna barneigna. Á þessu sáum við að fæðingarorlofslögin væru farin að virka sem jafnréttistæki. Ætli karlar séu farnir að fá spurninguna sem margar konur hafa verið spurðar í starfsviðtölum, um hvort þeir hafi í huga að eignast fleiri börn?....... MEIRA... Miðvikudagur 23. febrúar 2005
Óréttlæti í framkvæmd sjúklingatryggingar Nú hefur sjúklingatrygging verið við lýði í fjögur ár og nokkur reynsla er komin á framkvæmd hennar. Í nýútkominni skýrslu kemur fram að þeir sem verða fyrir miklu tjóni fá það ekki að fullu bætt, en þeir sem verða fyrir litlu tjóni fá það bætt að fullu. Þetta er vegna þess að bótahámark sjúklingatryggingarinnar í lögum er of lágt, var 5,7 milljónir króna á síðasta ári, 2004. Tryggingastofnun telur þetta mjög óheppilegt og leggur til á heimasíðu sinni að bótahámarkið verði hækkað hið fyrsta. Ég tek undir það, mér finnst þetta mjög óréttlátt. MEIRA... Föstudagur 04. febrúar 2005
Tryggjum einkalíf aldraðra
Eitt þúsund aldraðir hjúkrunarsjúklingar hér á landi þurfa að deila herbergi með öðrum og hafa ekkert val um það með hverjum þeir eyða þannig ævikvöldinu. Þetta koma fram á Alþingi í vikunni hjá heilbrigðisráðherra í svari við fyrirspurn Björgvins G. Sigurðssonar. Gleymum því ekki að hjúkrunarheimilin eru heimili þessa fólks, sem einnig missir fjárhagslegt sjálfstæði sitt við að flytjast þangað. Tryggingabætur falla niður og sækja þarf um vasapeninga sem nema tæpum 22 þúsund krónum á mánuði og skerðast um 65% þegar aðrar tekjur fara yfir rúmar 7 þúsund krónur. Ekki er hægt að leyfa sér mikið fyrir þessar fjárhæðir, enda duga þær skammt. Einnig er hjúkrunarsjúklingum sem fá greiðslur úr lífeyrissjóðum gert að greiða vist sína á heimilinu, en þeir halda eftir um 48 þúsund krónum á mánuði til eigin ráðstöfunar. Þetta ástand er arfur frá liðinni öld og gömlum samfélagsháttum og löngu er tímabært að gera breytingar á þessu. Nú verður að einhenda sér í að bæta þetta ástand og tryggja mannréttindi aldraðra hjúkrunarsjúklinga og fjárhagslegt sjálfstæði þeirra. MEIRA... Miðvikudagur 22. desember 2004
..... KÁTT Í HÖLLINNI
Þar kom að því að ríkistjórnin tryggði fjárveitingu til Fjölmenntar og Geðhjálpar svo þeir sem þar eru í starfsendurhæfingu og námi geti haldið því áfram eftir áramótin. Sú frétt barst af ríkistjórnarfundi í gær. Það hlaut að koma að því og fagna ég þeirri niðurstöðu sem orðin er í þessu mikilvæga máli. Þó fjárveitingin dugi ekki til að halda úti námi fyrir alla sem þess óska allt árið 2005, treysti ég því að stjórnvöld tryggi viðbótarfé síðar, svo enginn þurfi frá að hverfa. Það er mjög mikilvægt að þessi hópur þurfi ekki að búa við óvissu um framtíðarþjónustu eins og endurhæfingu og menntun. Það getur haft alvarleg áhrif á heilsu þessa viðkvæma sjúklingahóps. MEIRA... |