Skattfrelsi handhafa forsetavalds stjórnarskrárbrot

Handhafar hafa sömu laun en ekki sömu kjör
Auk þess sem skattfrelsi handhafa forsetavalds hefur enga lagastoð haft, þá er í lögum um laun forseta Íslands einungis kveðið á um að handhafar forsetavalds skuli samanlagt njóta jafnra launa og laun forseta eru þann tíma, sem þeir hverju sinni fara með forsetavald um stundasakir. Ekki er talað um kjör heldur laun, svo ekki verður þar fundin lagastoð fyrir skattfrelsinu frekar en í skattalögum.
Hvað réttlætir nú tvöföldun á launum handhafa forsetavalds
Skattayfirvöld halda því fram að þar sem þessi framkvæmd hafi gilt í áratugi megi halda því fram að hún væri orðin venjuhelguð. Þar er langt seilst til að réttlæti skattleysið, þar sem bæði hefur reglugerðin frá árinu 1963 enga lagastoð og einnig er um að ræða brot á stjórnarskránni. Vart er hægt að draga aðra ályktun en að handhafar forsetavalds hafi í marga áratugi verið veitt heimild til skattfrelsis á launum sem þeir fá þegar þeir fara með forsetavald sem enga stoð hafi haft í lögum. Einnig hefur tvímælalaust verið um stjórnarskrárbrot að ræða frá árinu 1995, þegar stjórnarskránni var breytt þannig að skattamálum átti að skipa með lögum og ekki mátti fela stjórnvöldum ákvörðun um hvort leggja skuli á skatt breyta honum eða afnema hann. Spurning er því hvað réttlæti að tvöfalda nú greiðslur til handhafa forsetavalds með þeim rökum að afnumið sé skattfrelsi, sem handhafarnir lögum samkvæmt hafa engan rétt átt á gegnum árin.