Atlaga að mannréttindum og lýðræði

Afstaða fjármála- og dómsmálaráða um að sett verði skilyrði um 44% til 50% atkvæðisbærra manna þurfi að greiða atkvæði gegn fjölmiðlalögunum til að þau falli úr gildi er aldeilis fráleit og beinlínis atlaga að lýðræðinu og mannréttindum fólks. Ráðherrarnir hefðu varla sett svona afdráttarlaust fram sín sjónarmið í málinu, ef ekki væri búið að ákveða þetta á æðstu stöðum í herbúðum íhaldsins. Afstaða þingmanna framsóknarflokksins mun engu máli skipt. Þeir verða teymdir með í þá niðurstöðu nauðugir viljugir ella sé stóll forsætisráðherra í húfi. Þjóðin hlýtur líka, að bregðast hart við ef sú verður raunin, því á grófan hátt er verið að mismuna fólki eftir því hvort það er fylgjandi eða andvígt fjölmiðlalögunum.

Vægi já-fólks vegur margfalt meira en nei-fólks
Með svona skilyrðum er vegið að grundvelli 65.gr. stjórnarskrár lýðveldisins um að allir skuli jafnir fyrir lögum, en í þessari grein stjórnarskrárinnar er beinlínis tiltekið, að allir skuli jafnir fyrir lögum án tillits til m.a. skoðana. Með þeim skilyrðum sem ráðherrarnir tveir tala nú fyrir á atkvæði þeirra sem greiða atkvæði með lögunum að vega miklu þyngra en þeirra sem greiða atkvæði gegn lögunum. Ef skilyrði yrði um að 44% atkvæðisbærra manna þyrfti til að fella lögin, þá þyrftu tæplega 94 þúsund manns að greiða atkvæði gegn lögunum. Í þeim fimm þjóðaratkvæðagreiðslum sem haldnar hafa verið hér á landi, hefur kosningaþátttaka verið innan við 50% atkvæðisbærra manna í þrem þeirra. Ef 100 þúsund manns mættu á kjörstað eða tæplega 47% atkvæðisbærra manna og 93 þúsund manns segði nei og vildu fella lögin, en 7 þúsund manns segðu já við að lögin héldu gildi sínu, þá réðu 7% þeirra sem þátt taka í kosningunum niðurstöðunni. Þannig yrði réttur 93% kjósenda sem mættu á kjörstað fótum troðinn. Vægi atkvæða já-fólksins, sem styddi ríkisstjórnina í því að lögin héldu gildi sínu myndu vega 12 til 13 falt meira en nei-fólksins sem vildi fella lögin. Þjóðin hlýtur að bregðast hart við ef það verður raunin, að stjórnvöld ætla að beita valdi sínu til að mismuna á grófan hátt atkvæðavægi fólksins í landinu.