Alvarlegar rangfærslur stjórnarflokkanna

Fulltrúar Landssambands eldri borgara þurftu á blaðamannafundi í gær að setja ofan í við stjórnarflokkanna vegna þess að þeir höfðu skrumskælt og farið með rangar upplýsingar um stöðu eldri borgara. Þetta höfum við í Samfylkingunni margbent á og gerði ég það m.a. síðast í sjónvarpsþætti með Guðlaugi Þór Þórðarsyni sem frussaði af reiði þegar ég fór með sannleikann í þessu máli og um ójöfnuðinn í samfélaginu. Það er auðvitað alvarlegt þegar forystumenn stjórnarflokkanna ítrekað fara með rangfærslur ójöfnuðinn í þjóðfélaginu og um kaupmátt og skattbyrði t.d. hjá lífeyrisþegum.

70% þjóðarinnar segja að ójöfnuður hafi vaxið
Það er staðreynd sem ekki verður á móti mælti að 17 þúsund aldraðir og nálægt 8 þúsund öryrkjar hafa í tekjur 140 þúsund og greiða af því um 20 þúsund krónur í skatt. Kaupmáttur lífeyrisþega er líka einungis 1/3 af því sem heimilin í landinu almennt hafa fengið. 70% þjóðarinnar telja að ójöfnuður í samfélaginu hafi aukist sem er staðreynd. Þegar litið er á tekjudreifinguna eftir þær breytingar sem gerðar hafa verið á skatta og bótakerfinu og teknar inn fjármagnstekjur kemur fram mikill og vaxandi ójöfnuður. Þar vegur þungt veruleg lækkun barnabóta, persónuafsláttur og miklu þyngri skattbyrði hjá 9 af hverjum 10 skattgreiðendum.

Í hópi Evrópuþjóða þar sem ójöfnuður er hvað mestur
Í vorskýrslu hagdeildar ASI kemur fram að ójöfnuðurinn hefur að meðaltali aukist mest gagnvart eldri borgurum og barnafólki. Þetta eru einmitt þeir hópar sem Samfylkingin hefur ekki síst beint sjónum sínum að undanfarið og hefur lagt fram afar metnaðarfullar tillögur til að bæta kjör og aðbúnað þeirra. Ástæða er einnig til að benda á að kaupmáttur lífeyrisgreiðslna samkvæmt mælingu Hagstofu er lægstu hér á landi m.v. hin Norðurlöndin, en stjórnvöld hafa haldið því fram að kaupmáttur lífeyrisgreiðslna væri hæstu hér á landi.
Stjórnarliðar gefa sér alltaf rangar forsendur þegar þeir tala um ójöfnuðinn og líta á dreifingu atvinnutekna s.l. 10 ár, en taka ekki með fjármagnstekjur né breytingar á bóta og skattakerfinu, en ráðstöfunartekjur endurspegla einmitt mikinn ójöfnuð í samfélaginu. Athyglisvert er einnig að á árinu 2004 var Ísland í úttekt Evrópusambandsins á ójöfnuði í hópi þeirra Evrópuþjóða þar sem ójöfnuður er hvað mestur. Núna er kosið sérstaklega um það hvort þessi ríkisstjórn ójöfnuðar og misskiptingar haldi velli, eða hvort ný ríkisstjórn okkar jafnaðarmanna taki völdin, sem hefur það sem forgangsverkefni að endurreisa á nýjan leik velfeðrarkerfið og jöfnuð í samfélaginu.