Forseti. Ég mæli fyrir frumvarpi til laga um breytingu á lögum um evrópska langtímafjárfestingarsjóði. Lagt er til að lögfest verði reglugerð Evrópuþingsins og ráðsins sem breytir eldri reglugerð um sama efni.

Reglugerðin gildir um evrópska langtímafjárfestingarsjóði eða svokallaða ELTIF-sjóði. Eingöngu þeir sjóðir sem hafa starfsleyfi á grundvelli fyrrgreindra reglugerða geta notað þetta heiti. Þetta eru sérhæfðir sjóðir og eru eina tegund sjóða sem helguð er langtímafjárfestingum sem heimilt er að markaðssetja yfir landamæri innan Evrópska efnahagssvæðisins fyrir bæði fagfjárfesta og almenna fjárfesta.

Fáir ELTIF-sjóðir hafa hingað til verið stofnaðir innan EES og má það m.a. rekja til strangra reglna um samsetningu eignasafna slíkra sjóða. Engir ELTIF-sjóðir eru starfandi á Íslandi en með breyttri og einfaldaðri reglugerð gæti slíkt sjóðaform orðið eftirsóknarverðara þar sem sveigjanleiki við fjárfestingar verður meiri.

Meðal breytinga má nefna að fallið er frá kröfu um 10 milljóna evra lágmark á hverja hæfa fjárfestingu, opnað er á heimildir til fjárfestinga í nýsköpunarfyrirtækjum á fjármálamarkaði og heimildir til lántöku eru auknar.

Forseti. Ekki er lagt til að gengið verði lengra við innleiðingu á reglugerðinni en lágmarkskröfur hennar áskilja. Þó er rétt að taka fram að lagt er til að nýrri reglusetningarheimild verði bætt við lögin. Hún varðar upplýsingagjöf um kostnað sem fjárfestingar í evrópskum langtímafjárfestingarsjóðum bera.

Það var fyrir yfirsjón á sínum tíma að þessi reglusetningarheimild var ekki hluti af frumvarpi sem varð að lögum nr. 115/2022 sem innleiddu eldri reglugerðina.

Fyrirhuguð lagasetning hefur hvorki áhrif á fjárhag ríkissjóðs né eftirlitsgjald sem eftirlitsskyldar aðilar á fjármálamarkaði greiða.

Forseti. Ég hef nú gert grein fyrir efni frumvarpsins í stórum dráttum og legg til að frumvarpinu verði að lokinni þessari umræðu vísað til hv. efnahags- og viðskiptanefndar.