Frú forseti. Fundarstjórn forseta hefur verið ágæt. Það sem mig langar að ræða er það að hér hefur orðið breyting á. Við erum að tala um faraldur sem ekki er horfst í augu við. Þegar ég nefni tölu og bið um tölu er það vegna þess að aukningin í þessum hörmulegu málum hefur orðið töluverð. En því miður virðist ríkisstjórnin ekki geta horfst í augu við vandann. Ég held að við séum öll sammála um það að þetta er grafalvarlegt. En hvernig væri þá að koma hér, frú forseti, í pontu og viðurkenna að það hafi orðið aukning? Hér er faraldur í gangi. Það var annar faraldur fyrir skömmu síðan. Milljarðar fóru í hann. Það var hægt á tíu dögum að byggja upp úrræði, á tíu dögum, frú forseti. En núna er liðið u.þ.b. ár og enn verið að bíða eftir úrræðum. Eru þetta skilaboðin til þeirra foreldra sem eru á milli vonar og ótta með börnin sín hingað og þangað? (Forseti hringir.) Eru þetta skilaboðin? Er þetta lágpunkturinn á þinginu, eins og hv. þingmaður nefndi hér áðan?

Frú forseti. Auðvitað er þetta sannarlega mál sem við erum að ræða í fundarstjórn sem snýr að tilfinningum, ég veit það og við vitum það öll hér. Að sjálfsögðu viljum við búa sem best í haginn fyrir þau sem verða fíkniefnum að bráð. Ég held að það eigi við um okkur öll og ég er sammála því að við skulum gæta orða okkar hvað það varðar. Það eru vonbrigði að hæstv. forsætisráðherra hafi ákveðið að sitja ekki undir þessari umræðu, það hefði verið gott ef hún væri hér. Ég vil líka minna á það að á undanförnum þingum hafa aðilar tekið til máls með sambærilegum hætti og var rætt áðan, til þess að brýna þáverandi ríkisstjórn með góðu eða illu til góðra verka. Við erum sammála um að það er mikilvægt að við sinnum þessum góðu verkum og við leggjum auðvitað allt okkar í það að ná fram einhverri bót í þessu. Eins og hér var sagt þá munum við auðvitað ekki koma í veg fyrir að það verði dauðsföll en við getum gert allt sem í okkar valdi stendur til að lágmarka þau.

Virðulegi forseti. Ég get tekið undir það að umræðan má ekki vera í átt að sakbendingu, kannski í þá veru sem hún var. Ég vil undirstrika að vandamálið er gríðarlega alvarlegt. Það eru margar fjölskyldur sem kvíða jólunum. Ég get sannarlega tekið undir það að við getum gert miklu betur þegar kemur að aðferðafræðinni. Það er alveg rétt að ef við horfum til samanburðar við Covid, ef við horfum á aðgerðir á Reykjanesinu, þá erum við snögg að setja upp plan og hrinda því í framkvæmd. Þó svo að við séum, sem er jákvætt hjá ríkisstjórninni, að sjá aukna fjármuni fara í málaflokkinn er aðferðafræðin, hvernig við hlaupum af stað, hvernig við náum markmiðum, hver eru mælanlegu markmiðin með auknu fjármagni — það er þarna sem við getum gert betur og við verðum að gera betur. Ég hvet okkur öll til að sameinast um það.