fsp. 4.
Virðulegur forseti. Hér kemur hæstv. fjármálaráðherra og viðurkennir að það er allt ósatt sem segir í fjármálaáætlun og nýlegri yfirlýsingu fjármálaráðuneytisins frá því fyrir nokkrum dögum um ástæður hækkunar kolefnisgjalds, um 100% hækkun á kolefnisgjaldi. Þar er því lýst að ástæðan sé sú að stemma stigu við meintum syndum bifreiðaeigenda og ökumanna með losun koltvísýrings. Það stendur beinlínis bæði í fjármálaáætlun og í yfirlýsingu ráðherrans sjálfs fyrir nokkrum dögum. Allt í einu kemur hann hingað núna og segir: Nei, það eru í rauninni miklu fleiri þættir sem orsaka álagningu hárra skatta upp á margar milljónir fyrir heimilin og þá skattahækkun sem var núna um áramótin, m.a. að það liggur fyrir að það er ekki nóg að greiða kolefnisgjald heldur hafa bifreiðaeigendur, eins og staðan er núna, verið látnir greiða (Forseti hringir.) margar milljónir í kolefnistengd vörugjöld þegar nýir bílar eru keyptir og einnig kolefnistengd bifreiðagjöld. (Forseti hringir.) Þetta er allt mikilli óvissu undirorpið og ég spyr aftur hæstv. ráðherra hver nákvæmlega tilgangurinn er með þessari skattlagningu og hvort bifreiðaeigendur megi eiga von á hærri gjöldum í ljósi einhverra nýrra markmiða með álagningu kolefnisgjalds og kolefnistengdra gjalda.
Ég þakka hv. þm. Sigríði Á. Andersen fyrir spurninguna. Ég kann því illa að vera sakaður um ósannsögli af því að ég kannast ekki við að það hafi verið, heldur var ég að fara yfir að það væru fleiri sjónarmið sem hægt væri að leggja til grundvallar. Það er alveg ljóst að álagning kolefnisgjalda hefur verið leið til þess að taka tillit til þeirra neikvæðu áhrifa sem losun kolefnis hefur. Það hefur verið ástæðan hingað til og verður það hér eftir. Það sem ég var einungis að benda á er að Ísland er í þeirri sérstöku stöðu að þessar breytingar hafa ekki bara þau áhrif að draga úr mengun og gera það að verkum að Ísland leggi sitt af mörkum í baráttunni við loftslagsbreytingar heldur gera þær okkur líka, vegna sérstakrar aðstöðu okkar, það kleift að draga úr innflutningi á jarðefnaeldsneyti, sem við framleiðum ekki sjálf og munum sennilega aldrei framleiða, sem auðvitað er gríðarlegt efnahagslegt mál fyrir íslensku þjóðina.