Virðulegi forseti. Ég mæli fyrir þingsályktunartillögu um stofnefnahagsreikning ríkissjóðs í heild og einstaka ríkisaðila í A-hluta.

Með uppsetningu á stofnefnahagsreikningum verða umtalsverðar breytingar á framsetningu og innihaldi efnahagsreikninga fyrir ríkissjóð í heild og einstaka ríkisaðila í A-hluta. Lagt er til að breytingarnar komi til framkvæmda á næstu árum í samræmi við innleiðingaráætlun og að fyrsti ríkisreikningurinn sem uppfyllir kröfur alþjóðlegra reikningsskila fyrir opinbera aðila verði fyrir árið 2019.

Uppsetning stofnefnahagsreikninga er gerð á grundvelli breyttra reikningsskilaaðferða í samræmi við ákvæði 52. gr. laga um opinber fjármál. Þessum breytingum má í aðalatriðum skipta í þrennt, þ.e. nýir liðir á eigna- og skuldahlið, breyttar matsaðferðir og breytt sundurliðun á eigin fé.

Með þingsályktunartillögunni fylgir greinargerð sem ég ætla að leyfa mér að vísa til. En við erum hér að feta okkur áfram við að innleiða og hrinda í framkvæmd ýmsum breytingum sem fylgja nýlegum lögum um opinber fjármál. Með þeirri miklu breytingu sem hér er verið að innleiða þá getum við í framtíðinni betur lagt mat á það hver er í raun og veru afskriftarþörfin vegna hinna ýmsu fjárfestinga í ríkisfjármálunum og þá borið saman við nýfjárfestingu og áttað okkur á því hvort við séum að ganga kannski á stofninn á hverjum tíma eða hvort við erum að fjárfesta umfram afskriftaþörf.

Þetta hefur vissa tengingu við þá umræðu sem hefur verið mjög fyrirferðarmikil í íslenskri stjórnmálaumræðu á undanförnum misserum og árum kannski, nefnilega að við hefðum mögulega átt að fjárfesta meira í innviðunum, en kortlagning á virði innviðanna, stofnkostnaðarvirðið og eðlileg afskrift yfir tíma samkvæmt því sem hér er verið að leggja upp með, hefði getað gefið betri vísbendingu um það hver raunstaðan í þessu tilliti hefur verið.

Ástæðan fyrir því að við leggjum upp með að innleiða breytingarnar á nokkrum árum er sú að þetta er gríðarlega mikið verkefni sem felur m.a. í sér að menn fara nánast yfir alla innanstokksmuni í öllum ríkisstofnunum og meta virði þeirra, vegakerfi og aðrar stofninnviðafjárfestingar verða teknar með þegar allt er saman komið.

Þetta er stórt skref ásamt öðrum sem við erum með á dagskrá á þessu þingi. Þar nefni ég sérstaklega afnám þess að marka tekjur sem mun koma fram á næstunni en tengist líka breytingum sem leiða af lögum um opinber fjármál.

Ég legg til að tillögunni verði vísað til fjárlaganefndar og síðari umræðu að aflokinni þessari.