Frú forseti. Ég er ekki sáttur við það að ég þurfi að vera svona snöggur að melda mig til máls um atkvæðagreiðsluna, en ég geri grein fyrir atkvæði mínu hér með.

Þetta eru mistök sem við erum að leiðrétta, nokkuð sem átti að framkvæma í vor en frumvarpið gleymdist. Hér er kveðið á um meira eftirlit o.s.frv., við stefnum meira í átt til stóra bróður eins og er von og vísa. En það eru mörg réttindi í frumvarpinu sem ég tel vera mjög jákvæð og ég tel að nauðsynlegt sé að samþykkja það sem allra fyrst. Því legg ég til að þingheimur samþykki frumvarpið og greiði atkvæði með því að það verði að lögum, ég mun gera það sjálfur.