Setning Alþingis þriðjudaginn 6. desember 2016
Þingsetningarathöfnin hefst kl.13.30 þriðjudaginn 6. desember með guðsþjónustu í Dómkirkjunni. Forseti Íslands, biskup Íslands, forseti Alþingis, ráðherrar og alþingismenn ganga fylktu liði til kirkjunnar úr Alþingishúsinu. Séra Hjálmar Jónsson, sóknarprestur í Dómkirkjunni, predikar og séra Sveinn Valgeirsson þjónar fyrir altari ásamt biskupi Íslands, frú Agnesi M. Sigurðardóttur. Organisti Dómkirkjunnar, Kári Þormar, leikur á orgel og kammerkór Dómkirkjunnar syngur við athöfnina.
Að guðsþjónustu lokinni ganga forseti Íslands, biskup Íslands, forseti Alþingis, ráðherrar, alþingismenn og aðrir gestir til þinghússins.
Forseti Íslands setur Alþingi, 146. löggjafarþing, og að því loknu tekur starfsaldursforseti við fundarstjórn og stjórnar kjöri kjörbréfanefndar. Strengjakvartett leikur tónlist við þingsetningarathöfnina. Þingsetningarfundi verður síðan frestað til kl. 16.
Við framhald þingsetningarfundarins klukkan fjögur verða kjörbréf þingmanna afgreidd, drengskaparheit unnin, kosinn forseti Alþingis og varaforsetar og í nefndir þingsins. Að síðustu verður hlutað um sæti þingmanna. Fjárlagafrumvarpi 2017 verður útbýtt á fundinum.
Bein útsending verður frá þingsetningu í Ríkisútvarpinu sjónvarpi og á Rás 1. Einnig á sjónvarpsrás Alþingis og á vef Alþingis.
Yfirlit helstu atriða þingsetningar:
Kl. 13.25 Þingmenn ganga til kirkju.
Kl. 13.30 Guðsþjónusta.
Kl. 14.05 Þingmenn ganga úr kirkju í Alþingishúsið.
Kl. 14.10 Forseti Íslands setur þingið og flytur ávarp.
Kl. 14.20 Strengjakvartett flytur Hver á sér fegra föðurland. Strengjakvartettinn skipa Auður Hafsteinsdóttir og Gróa Margrét Valdimarsdóttir, fiðlur, Matthías Stefánsson, víóla, og Örnólfur Kristjánsson, selló.
Kl. 14.22 Starfsaldursforseti tekur við fundarstjórn.
Kl. 14.24 Strengjakvartett flytur Smávinir fagrir.
Kl. 14.26 Forseti Íslands gengur úr þingsalnum.
Kl. 14.27 Starfsaldursforseti stjórnar kjöri kjörbréfanefndar. Hlé á þingsetningarfundi fram til kl. 16.
Bein útsending verður frá þingsetningarathöfninni í Ríkisútvarpinu og á sjónvarpsrás og vef Alþingis.
