Skrifstofa Alþingis auglýsir eftir lögfræðingi til starfa á þingfundaskrifstofu Alþingis
Skrifstofa Alþingis auglýsir eftir lögfræðingi til starfa á þingfundaskrifstofu Alþingis.
Þingfundaskrifstofa annast fjölbreytt verkefni. Flest varða þau undirbúning og störf þingfunda. Í því felst m.a. gerð dagskrár þingfunda, skráning þingmála og þingskjala, upptaka og útsending umræðna á þingfundum, aðstoð við forseta Alþingis, umsjón með atkvæðagreiðslum, lagaskráning og loks úrlausn á lögfræðilegum álitaefnum tengdum þinghaldinu. Þá annast skrifstofan einnig upplýsingaþjónustu við þingmenn á þingfundum (m.a. um þingmál og umræður) og útgáfu á vikulegu yfirliti yfir stöðu þingmála.
Starfssvið:
- Undirbúningur þingfunda.
- Aðstoð við forseta Alþingis.
- Úrlausn lögfræðilegra verkefna.
- Utanumhald og umsjón með skráningu og útbýtingu þingmála og þingskjala.
- Umsjón með atkvæðagreiðslum.
- Þjónusta við þingmenn á þingfundum.
- Aðstoð við aðallögfræðing Alþingis.
- Önnur verkefni.
Menntunar- og hæfniskröfur:
- Embættis- eða meistarapróf í lögfræði.
- Fullt vald á íslensku og færni í að tjá sig í ræðu og riti.
- Sjálfstæði og öguð vinnubrögð.
- Færni og lipurð í mannlegum samskiptum, góð framkoma og rík þjónustulund.
- Góð tölvukunnátta.
- Geta til að vinna undir álagi.
- Góð tungumálakunnátta, einkum í Norðurlandamálum og ensku.
Æskilegt er að umsækjendur geti hafið störf sem fyrst. Launakjör eru samkvæmt kjarasamningi Félags starfsmanna Alþingis.
Nánari upplýsingar veitir Ingvar Þór Sigurðsson, forstöðumaður þingfundaskrifstofu, í síma 563 0500.
Umsóknir ásamt greinargóðum upplýsingum um menntun og fyrri störf skulu sendar á netfangið starfsmannahald@althingi.is fyrir 25. júní nk. Öllum umsóknum verður svarað þegar ákvörðun um ráðningu liggur fyrir. Umsóknir gilda í sex mánuði frá lokum umsóknarfrests.
Gildi skrifstofu Alþingis eru
þjónustulund, fagmennska og samvinna.