21.07.2010
Ávarp forseta Alþingis á 3. heimsráðstefnu þingforseta á vegum Alþjóðaþingmannasambandsins í Genf

Ásta R. Jóhannesdóttir sat 3. ráðstefnu þingforseta aðildarríkja Alþjóðaþingmannasambandsins sem haldin var í Genf í Sviss 19.-21. júlí. Í ávarpi sínu þar lagði hún áherslu á gott samstarf sambandsins við Sameinuðu þjóðirnar og mikilvægi eflingar lýðræðis með aukinni þátttöku kvenna í stjórnmálum um allan heim. Í lokayfirlýsingu ráðstefnunnar var mikilvægi aukins jafnréttis kynjanna áréttað og hvatt til að efla verulega átak í að auka hlutdeild kvenna á þjóðþingum allra aðildarríkja sambandsins.

Forseti Alþingis heimsótti fastanefnd Íslands sem annast samskipti við alþjóðastofnanir í Genf og kynnti sér starfsemi hennar. Að því loknu fór hún til aðalstöðva EFTA. Þar átti hún fund með Kåre Bryn, aðalframkvæmdastjóra EFTA, og Guðmundi Einarssyni skrifstofustjóra, ásamt Kristni F. Árnasyni sendiherra, fastafulltrúa Íslands í Genf. Forseti Alþingis sótti sérstakan fund með þingforsetum evrópskra smáríkja í höfuðstöðvum Sameinuðu þjóðanna í Genf.

Heimsráðstefna þingforseta er haldin á 5 ára fresti og er öllum þingforsetum aðildarríkjanna 155 boðið ásamt þingforsetum þeirra níu ríkja sem eiga aðild að Alþjóðaþingmannasambandinu. Að auki sækja ráðstefnuna fulltrúar fjölmargra stofnana á vegum Sameinuðu þjóðanna og annarra alþjóðastofnana.

Hér má lesa ávarp forseta Alþingis.