Kjördæmi

Við alþingiskosningar 2003 var kosið eftir nýrri kjördæmaskipan í sex kjördæmum: Norðvesturkjördæmi, Norðausturkjördæmi, Suðurkjördæmi, Suðvesturkjördæmi, Reykjavíkurkjördæmi norður og Reykjavíkurkjördæmi suður. Atkvæði voru talin í hverju kjördæmi fyrir sig. Í hverju kjördæmi voru níu kjördæmissæti sem úthlutað var á grundvelli kosningaúrslita í kjördæminu. Öðrum þingsætum en kjördæmissætum var ráðstafað í kjördæmi og úthlutað til jöfnunar milli stjórnmálasamtaka þannig að hver samtök fengu þingmannatölu í sem fyllstu samræmi við heildaratkvæðatölu sína. Þau stjórnmálasamtök komu þó ein til álita við úthlutun jöfnunarsæta sem hlutu minnst 5% af gildum atkvæðum á landinu öllu.

Samkvæmt ákvæðum í stjórnarskrá um kjördæmaskipan, sem sett voru í júní 1999, skulu kjördæmi vera fæst sex en flest sjö. Mörk kjördæmanna eru ákveðin í lögum, landskjörstjórn er heimilt að ákveða kjördæmamörk í Reykjavík og nágrenni. Ef kjósendur á kjörskrá að baki hverju þingsæti, að meðtöldum jöfnunarsætum, eru eftir alþingiskosningar helmingi færri í einu kjördæmi en öðru skal landskjörstjórn breyta fjölda þingsæta í kjördæmum í því skyni að draga úr þeim mun, kjördæmissæti skulu vera minnst sex í hverju kjördæmi. Breytingar á kjördæmamörkum og tilhögun á úthlutun þingsæta, sem fyrir er mælt í lögum, verða aðeins gerðar með samþykki 2/3 atkvæða á Alþingi. Íslandi var áður skipt í átta kjördæmi og hafði sú skipan verið á síðan 1959.

Samkvæmt ákvörðun landskjörstjórnar á fundi föstudaginn 16. maí 2003 færðist eitt sæti frá Norðvesturkjördæmi til Suðvesturkjördæmis í næstu kosningum þar á eftir.

Til baka