Nefndasvið

Verkefni nefndasviðs eru þríþætt: Aðstoð við nefndir (fastanefndir og alþjóðanefndir), þingmálagerð og skjalavinnsla.

Aðstoð nefndasviðs við fastanefndir felst í undirbúningi nefndarfunda, faglegri aðstoð við yfirferð þingmála og gerð nefndarálita og breytingartillagna. Aðstoð við alþjóðanefndir felur í sér faglega aðstoð á sviði alþjóðamála, undirbúning fyrir þátttöku í alþjóðlegum fundum, gagna- og upplýsingaöflun og undirbúning fyrir alþjóðlega þingmannafundi sem haldnir eru á Íslandi. Nefndasvið aðstoðar þingmenn við samningu þingmála og uppsetningu og málfarslegan yfirlestur þingskjala og veitir þeim lögfræðilega ráðgjöf. Þá sér sviðið um útgáfu þingskjala, bæði á prenti og vefsíðum, og skjalaparts Alþingistíðinda (A-hluta), svo og uppfærslu og útgáfu lagasafns á vef Alþingis.

Á vegum sviðsins er vikulega gefið út rit með upplýsingum um þau mál sem liggja fyrir í nefndum og á hvaða stigi þau eru í umfjöllun nefndar.

Starfsfólk nefndasviðs hefur aðsetur á 2. og 3. hæð Austurstrætis 8–10, en í því húsi eru jafnframt fundarherbergi fastanefnda þingsins.