Símanúmer skrifstofu Alþingis er 563 0500. Skrifstofa Alþingis er opin kl. 9-17 frá 1. okt til þingloka að vori og kl. 8-16 á sumrin. Skrifstofa í Alþingishúsinu er opin meðan þingfundir standa. Aðalinngangur í Alþingishús er um Skála.
Almenningi er heimilt að koma í Alþingishúsið, hvort heldur til að hitta þingmenn eða til að hlýða á umræður á þingpöllum. Ef gestir spyrja um þingmann færir þingvörður honum boð og þarf þingmaður að koma í anddyri ef hann
vill ræða við gestinn. Þingverðir hafa eftirlit með gestum bæði á þingpöllum og annars staðar í þinghúsinu. Á meðan þingfundur stendur eru þingpallar öllum opnir. Þingpallarnir eru á þriðju hæð Alþingishússins. Gengið er inn á þingpalla frá Templarasundi.
Blaða- og fréttamenn hafa starfsaðstöðu í blaðamannastúku á þingpöllum á 3. hæð Alþingishúss. Nánari upplýsingar um aðgengi og reglur fyrir blaða- og fréttamenn er að finna á síðunni blaðamenn í Alþingishúsinu.
Reglur um aðgengi gesta að þingpöllum
Aðgangur að þingpöllum er öllum opinn. Áheyrendur á þingpöllum skulu vera kyrrir, hljóðir og gæta þess að trufla ekki störf þingsins.
Þingvörður eða lögreglumaður á vakt ákveður fjölda gesta á þingpöllum með tilliti til aðstæðna hverju sinni. Hámarksfjöldi má þó aldrei vera meiri en eldvarnaeftirlit mælir með.
Gestur undir áhrifum áfengis eða annarra vímuefna fær ekki aðgang að þingpöllum.
Gestir á þingpöllum skulu sitja í sætum sínum meðan á dvöl stendur.
Öll mótmæli og háreysti er óheimil. Óheimilt er að hylja andlit sitt.
Til að fá aðgang að þingpöllum skal afhenda þingverði eða lögreglumanni eftirfarandi: Yfirhafnir og þykkar flíkur. Höfuðfat. Töskur og poka. Lausalega hluti úr vösum sem þingvörður/lögreglumaður ákveður. Farsíma. Myndavélar og annan tækjabúnað. Drykkjarföng, matvæli og hvers konar vökva. Annað að ósk þingvarðar eða lögreglumanns.
Öll vopn og hættuleg efni eru bönnuð í þinghúsinu. Framkvæmd er öryggisleit ef ástæða er talin til. Gesti er heimilt að hafna slíkri leit en fær þá ekki aðgang að þingpöllum.
Brot á framangreindum reglum veldur því að viðkomandi er synjað um aðgang að þingpöllum eða honum vísað þaðan.
(Samþykkt á fundi forsætisnefndar 14. janúar 2009.)
Skrifstofa
