Upplýsingar um þingstörfin

Ýmsar leiðir eru til að kynna sér störf Alþingis. Þingskjöl og ræður eru aðgengileg á vef Alþingis. Þingskjöl birtast þar eftir að þeim hefur verið útbýtt í þingsalnum. Ræður eru birtar á vefnum eftir fyrsta yfirlestur. Upplýsingar um nefndastarf eru veittar hjá nefndasviði, í síma 563 0420. Öll þingmál eru einnig fáanleg í skjalaafgreiðslu Alþingis í Þórshamri og þar eru Alþingistíðindi einnig afgreidd.

Skrifstofa Alþingis veitir upplýsingar um dagskrá þingfunda og stöðu þingmála í síma 563 0500 og dagskrá Alþingis er birt á síðu 230 í textavarpi sjónvarpsins.

Á meðan þingfundur stendur eru þingpallar öllum opnir. Þingpallarnir eru á þriðju hæð Alþingishússins. Gengið er inn á þingpallana frá Templarasundi.

Sjónvarpað er beint frá þingfundum á rás ríkissjónvarpsins frá því að þingfundur hefst þar til regluleg dagskrá sjónvarpsins hefst um kl. 17. Standi þingfundur lengur er honum sjónvarpað daginn eftir og hefst sú útsending kl. 9.30. Sjónvarpað er óslitið frá þingfundum á breiðbandinu. Enn fremur eru beinar útsendingar frá þingfundum á heimasíðu Alþingis.