Jóhannes Geir Sigurgeirsson
(andsvar)
:
Virðulegi forseti. Með tilliti til orða hæstv. forsrh. áður um ríkisfjármál, nauðsyn aðhalds á því sviði og að forðast beri alla lausung í fjármálum ríkisins, þá vil ég spyrja hæstv. forsrh. hvort sá skilningur minn á ræðu hans hér áðan sé réttur að hann telji að samningur framkvæmdarvaldsins við eitt sveitarfélag í landinu upp á rúman milljarð rúmist innan þess heimildarákvæðis í 6. gr. fjárlaga sem hæstv. fjmrh. vitnaði til hér áðan.
Ég gat ekki skilið hæstv. forsrh. öðruvísi og ég vildi gjarnan fá staðfestingu á þessum skilningi mínum.
