Virðulegur forseti. Þessi afgreiðsla á frv. um jöfnunargjald gerist nú æ farsakenndari en við blasti í upphafi þegar frv. var lagt fram. Við 1. umr. rakti ég nokkuð sögu þessa máls og lýsti því yfir að mér hefðu orðið á þau mistök að taka hæstv. utanrrh. alvarlega í rúmlega eitt ár þegar hann innan síðustu ríkisstjórnar lýsti því yfir hvað eftir annað að það væri brot á alþjóðlegum skuldbindingum Íslands að framlengja jöfnunargjaldið. Ég óskaði jafnframt eftir því að hæstv. utanrrh. legði fram þau bréf sem hann hefði skrifað Evrópubandalaginu og jafnvel fleiri erlendum aðilum þar sem hann tilkynnti fyrir hönd Íslands að jöfnunargjaldið yrði lagt niður. Nú er mér tjáð, hæstv. utanrrh., að því hafi verið neitað af hálfu hæstv. utanrrh. í efh.- og viðskn. þessa þings ( Gripið fram í: Við fengum að lesa bréfið.) að leggja bréfin fram með þeim hætti að hv. nefndarmenn gætu sýnt þau öðrum þingmönnum. Því var neitað. Það var eingöngu samþykkt að leggja bréfin fram með þeim hætti að hv. nefndarmenn gætu rennt yfir þau og síðan ekki meir. Nú vil ég óska eftir því við hæstv. utanrrh. að hann leyfi mér einnig að renna augum yfir þessi bréf hér í ræðustól Alþingis. Eða er það þannig að þessi bréf séu orðin slíkt feimnismál í utanrrn. að hæstv. utanrrh. neiti að leggja þau fram þannig að þjóðþingið geti skoðað þau? Ég vil spyrja hæstv. utanrrh. og ég óska eftir svari. Hvers vegna?
Það er auðvitað mjög alvarlegt fordæmi þegar hæstv. utanrrh. neitar að leggja fram á Alþingi Íslendinga bréf sem hann notaði í heilt ár í ríkisstjórn Íslands sem röksemd fyrir því að ekki væri hægt að framlengja jöfnunargjaldið.
Ég hef trúað því fram til þessa að hæstv. utanrrh. vildi láta taka sig alvarlega í alþjóðamálum. Ég hef talið að ýmislegt af því sem hann hefur barist fyrir, þótt ég hafi kannski ekki verið ánægður með að allt saman, byggðist á þeirri lífsskoðun hans að Ísland ætti að vera þátttakandi í alþjóðlegu samstarfi og taka á sig alþjóðlegar skuldbindingar og þær ættu að standa. Það væru ákveðnir nútímalegir hættir í samskiptum þjóða og innan lýðræðisríkja, sem bæri að virða. Ég tek eftir því að hæstv. utanrrh. sagði t.d. í fjölmiðlum í dag að það væri ánægjulegt að Rússland væri komið í hóp lýðræðislegra ríkja
og mundi hugsanlega sækja um aðild að varnarbandalagi lýðræðisríkja, eins og hæstv. utanrrh. orðaði það. Í lýðræðisríkjum, hæstv. utanrrh., neitar utanrrh. þjóðþinginu ekki um að leggja fram bréf sem skrifuð hafa verið í nafni ríkisstjórnar Íslands til alþjóðasamtaka sem Ísland er aðili að. Svona einfalt er nú það, hæstv. utanrrh. Þess vegna er það óhjákvæmilegt að því sé mótmælt hér harðlega, að hæstv. utanrrh. skuli hafa neitað þjóðþinginu um að fá þetta bréf í hendur. ( Gripið fram í: Bréfin voru send til EB.) Já, bréfin voru send til EB, það er alveg rétt. ( Gripið fram í: Við erum ekki aðilar að EB.) Það er alveg rétt, ég skal endurtaka setningu mína. Bréf sem send eru alþjóðasamtökum sem Ísland á margvísleg samskipti við og hefur gert margvíslega samninga við og ætlar sér að gera vegabréf 21. aldarinnar einnig sem innsigli að samningsgerð við EB, eða verður það kannski líka þannig, hæstv. utanrrh., að þjóðþinginu verður meinað að sjá vegabréfsáritanirnar á þessu vegabréfi 21. aldarinnar?
Mér er þetta ekki gamanmál, hæstv. utanrrh. Vegna þess að það eru nokkrar grundvallarreglur sem eiga að gilda í lýðræðisríkjum og í samskiptum stjórnvalda og þjóðþinga. Ég tel að hæstv. utanrrh. hafi brotið þær grundvallarreglur með því að neita að sýna þjóðþinginu þetta bréf. Það væri vissulega tilefni til langra umræðna ef hér hefði ekki verið gert samkomulag um að greiða fyrir afgreiðslu mála. Ég vil þess vegna beina þeirri spurningu til hæstv. utanrrh.: Hver eru rök hans fyrir þeirri einstæðu ákvörðun að meina Alþingi Íslendinga, þjóðþingi í lýðræðisríki, að fá að sjá með eðlilegum hætti og hafa til grundvallar í umræðu sinni formlegt bréf sem skrifað hefur verið alþjóðlegum samtökum af hálfu Íslands?
Ég ætla svo að neita mér um þá skemmtan að spyrja hæstv. utanrrh. að því hvernig hann ætli að rökstyðja það í næsta bréfi til Evrópubandalagsins að ákvörðun ríkisstjórnar um að leggja niður jöfnunargjaldið um mitt næsta ár hafi allt í einu orðið hér á einum sólarhring að ákvörðun um að leggja það niður 1. sept. það sama ár. ( Gripið fram í: 30. sept.) 30., nú það er bara enn lengra, 30. sept. það sama ár. Það þarf að vísu mikla hæfileika í kansellíinu og utanrrn. til þess að komast í gegnum þá þraut. Eða er þetta bara þannig, hæstv. utanrrh., að þetta sé allt saman marklaust kjaftæði? Allt, sem sagt var í eitt og hálft ár við ríkisstjórnarborðið í gamla húsinu við Lækjartorg, hafi verið marklaust kjaftæði?
Hér var sagt fyrr í kvöld að þess væri óskað til að sýna okkur ákveðna tillitssemi að spurningum væri svarað og ég vil óska eftir því við hæstv. utanrrh. að hann svari þessari spurningu. Ég vil svo um leið óska hæstv. fjmrh. til hamingju með það að hafa ekki aðeins flutt hér á Alþingi frv. um það að framlengja jöfnunargjald heldur einnig sérstakar brtt. um að framlengja það enn frekar.