Sjávarútvegsráðherra (Þorsteinn Pálsson)
:
Herra forseti. Það er rétt að árétta það að í áliti Hafrannsóknastofnunar segir að þrátt fyrir að afli á sóknareiningu hafi minnkað á afmörkuðu svæði, þá þurfi það ekki að benda til þess að stofninn sé í hættu. En stofnunin hefur vakið athygli á þessari þróun og talið nauðsynlegt að takmarka veiðarnar við ákveðið mark. Það hefur ekki enn komið til þess að ákveðið yrði að setja þennan stofn í aflamark. Ég tel að þó að það geti alveg komið til álita, þá hafi það ekki verið tímabært fram til þessa.
