[12:43]
Frsm. meiri hluta menntmn. (Sigríður A. Þórðardóttir) :
Virðulegi forseti. Ég mæli fyrir nál. frá meiri hluta menntmn. um frv. til laga um breytingu á lögum um Kennaraháskóla Íslands á þskj. 805 og brtt. á þskj. 806.
,,Nefndin hefur fjallað um frv. sem felur annars vegar í sér nokkrar minni háttar breytingar á lögum um Kennaraháskóla Íslands varðandi kjör rektors, verksvið deildarráðs og skólaráðs, stöðu- og embættisveitingar og að kveðið verði á um skipan kennaranáms í reglugerð en ekki í lögum eins og nú er. Þessar breytingar eru gerðar að ósk skólaráðs Kennaraháskóla Íslands. Hins vegar felur frv. í sér frestun á gildistöku ákvæða er mæla fyrir um lengingu almenns kennaranáms úr þremur árum í fjögur ár.
Nefndin fékk á fund sinn um málið Stefán Stefánsson, deildarstjóra í menntmrn., Þóri Ólafsson, rektor Kennaraháskóla Íslands, Vigdísi Jóhannsdóttur, fulltrúa nemenda í skólaráði Kennaraháskóla Íslands, Svanhildi Kaaber, formann Kennarasambands Íslands, Birnu Sigurjónsdóttur, formann skólamálaráðs Kennarasambands Íslands, og Elnu Katrínu Jónsdóttur, formann Hins íslenska kennarafélags.
Meiri hluti nefndarinnar leggur til að frv. verði samþykkt með breytingu sem gerð er tillaga um á sérstöku þingskjali. Lagt er til að tekið verði fram í 3. gr. frv. að við smíði reglugerðar um skipan almenns kennaranáms skuli liggja fyrir tillögur skólaráðs Kennaraháskóla Íslands.
Björn Bjarnason ritar undir með fyrirvara varðandi þá skipan sem lögð er til í 6. gr. frv. um stöðu- og embættisveitingar.``
Undir nál. rita Sigríður Anna Þórðardóttir, Björn Bjarnason, Árni Johnsen, Petrína Baldursdóttir og Tómas Ingi Olrich.
Við 1. umr. um frv. og einnig við umfjöllun um málið í menntmn. hafa þingmenn gert að sérstöku umtalsefni frestun á lengingu kennaranámsins. Ég vil því víkja að þessu atriði örfáum orðum.
Á vegum ráðuneytis er starfandi nefnd til að gera tillögur að rammalöggjöf um kennaramenntun í landinu. Þar eru að sjálfsögðu til skoðunar ýmsar leiðir til að styrkja kennaramenntunina. Ein þeirra er lenging almenns náms við Kennaraháskóla Íslands en aðrar leiðir eru líka til umfjöllunar þar og má nefna sem dæmi uppbyggingu meistaranáms við Kennaraháskólann, kandídatsár og markvissa sí- og endurmenntun kennara.
Ljóst er að engar ákvarðanir hafa verið teknar um hvort breytingar verða gerðar á uppbyggingu kennaranámsins við Kennaraháskóla Íslands. Hér er eingöngu um að ræða frestun þess ákvæðis gildandi laga sem lýtur að því að lengja námið um eitt ár meðan unnið er að tillögum um framtíðarskipan þessara mála.
