[16:07]
Kristinn H. Gunnarsson :
Virðulegur forseti. Það er gott að heyra að forseta skuli hafa leiðst biðin eftir mér. Það er alla vega betra en að mönnum leiðist ekki. En ég biðst forláts á því að hafa ekki komið strax í stólinn. Ég gat því miður ekki komið alveg á stundinni.
Þetta frv. er býsna merkilegt vegna þess að við það atvinnuástand sem er í landinu skuli ríkisstjórnin koma með frv. af þessum toga í stað þess að huga að úrbótum á ýmsum sviðum löggjafar um atvinnuleysistryggingar og annað slíkt eða koma fram með einhverjar tillögur eða hugmyndir til að draga úr atvinnuleysi. Það bólar ekkert á slíkum aðgerðum. Heldur kemur fram frv. um breytingu á lögum um hópuppsagnir. Það segir sína sögu um þessa ríkisstjórn hvað hún er að gera eða öllu heldur hvað hún er ekki að gera. Hún er ekki að fást við þau verkefni sem eru aðkallandi og blasa við í atvinnulífinu. Hún er hins vegar, eins og fram kemur í athugasemdum með lagafrv., að taka að sér það hlutverk að flytja á færibandi frv. sem samin eru erlendis.
Í upphafi athugasemda með frv. kemur fram að frv. þetta sé flutt í framhaldi af ákvörðun sameiginlegu nefndarinnar um Evrópska efnahagssvæðið, eins og þar stendur. Það er sem sagt einhver nefnd í útlöndum sem tekur ákvörðun og ríkisstjórn íslands tekur við þeirri ákvörðun og flytur málið. Ég held að ekki sé hægt að ganga lengra í því að verða ósjálfstæður aðili í málinu en ríkisstjórnin hefur gert í þessu
máli.
Það er líka sláandi að hún skuli gera það í þessu tiltekna máli, breytingu á lögum um hópuppsagnir, vegna þess að þau lög voru þannig frágengin eftir meðferð félmn. í nóvember/desember 1992 að þau voru aftengd frá EES. Það var ákveðið að breyta frv. þannig að það yrði fullkomlega íslensk löggjöf með engri skírskotun til Evrópska efnahagssvæðisins eða samningsins um það. Þannig að lögin munu standa burt séð frá afdrifum þess samnings eða laga sem sett voru um löggildinu samningsins. Menn ákváðu að taka þessi efnisatriði og aðlaga þau að íslenskum aðstæðum. Frá þessu hefur ríkisstjórnin nú horfið með því að breyta frv. aftur yfir í EES-frv. eins og kemur fram í lokagrein frv. þar sem segir, með leyfi forseta:
,,Lög þessi öðlast gildi um leið og ákvörðun sameiginlegu nefndarinnar um Evrópska efnahagssvæðið frá 21. mars 1994.``
Það er einhver nefnd í einhverju landi Evrópu sem ákveður hvenær lög á Íslandi taka gildi. Ég segi nú bara: Sér er hver lagasetningin ef þetta á að fara svona í gegn.
Mér finnst afar hryggilegt að það skuli vera niðurstaða ráðgefandi nefndar ráðherrans að gefast upp á því að vinsa úr þessum haug öllum, sem verið er að bera í okkur frá Evrópu um hin og þessi efnisatriði, það sem við viljum sjálf lögfesta. Og það virðist vera niðurstaða þessarar samráðsnefndar að menn eigi bara að taka við, færibandið eigi bara að fara í gang. Það er afar dapurlegt að menn skuli velja sér það hlutskipti í upphafi samningsins að hugsa ekki einu sinni um það að taka á málefninu með sjálfstæðum hætti. Því það segir í athugasemdunum að frv. sé flutt til að tryggja einsleitni samningsins um Evrópska efnahagssvæðið og réttaröryggi fyrir einstaklinga og atvinnurekendur. Ef menn gefa sér það strax í upphafi málsins, að einsleitnin, ,,hómógenisminn``, í samningnum um Evrópska efnahagssvæði sé númer eitt, þá eru menn búnir að ganga svo langt að lengra verður ekki gengið í að gera lítið úr íslenska löggjafarvaldinu þegar menn velja sér þessa línu til að fara eftir. Það er ekkert sjálfgefið að íslensk stjórnvöld velji sér þá víglínu í málinu að það eigi að vera einhver fullkomin einsleinti í þessu. Það er ekki sjálfgefið. Og við eigum ekki í svona stórum málum að byrja á því að stíga skrefið svo langt að við erum að afvopna okkur nánast á öllum öðrum sviðum þar sem við þurfum að fást við afleiðingar þessa samnings.
Það hefur þegar verið gerð að öðru leyti grein fyrir frv. og ég tek undir ræður þingmanna sem hafa flutt gagnrýni um þetta frv., tilurð þess og málatilbúnað. Ég hef svo sem ekki miklu við það að bæta en ég tel rétt að undirstrika einmitt þann þátt að íslensk stjórnvöld hafa í raun gengið býsna langt í því að vera ósjálfstæður aðili í efnistökum á afleiðingnum af samningnum um Evrópska efnahagssvæðið. Það kemur kannski ekki svo mikið á óvart þegar alþýðyflokksmenn eiga í hlut, en það kemur meira á óvart þegar Sjálfstfl. á í hlut.