[16:56]
Dómsmálaráðherra (Þorsteinn Pálsson) :
Frú forseti. Ég mæli hér fyrir frv. til laga um breytingar á ýmsum lögum sem varða réttarfar, atvinnuréttindi o.fl. vegna aðildar að samningi um Evrópska efnahagssvæðið.
Þetta frv. er endurflutt. Það var lagt fram á síðasta þingi og þá fóru hér fram nokkuð ítarlegar umræður við 1. umr. og því hafði verið vísað til hv. allshn.
Frv. er samið í dóms- og kirkjumrn. til breytinga á lögum sem eru á starfssviði ráðuneytisins til aðlögunar að samningi um Evrópska efnahagssvæðið. Helstu forsendur fyrir þeim lagabreytingum sem hér er getið um eru eftirfarandi:
1. Í III. hluta samnings um Evrópska efnahagssvæðið er gert ráð fyrir þeirri aðalreglu að þegnar annarra ríkja, sem njóta réttinda samkvæmt samningnum, verði jafnsettir innlendum þegnum á hverjum stað, m.a. varðandi atvinnuréttindi og heimildir til fjárfestingar, auk þess að njóta vissra réttinda til ferða og dvalar í samningsríkjunum.
2. Gera verður breytingar á nokkrum lögum á sviði ráðuneytisins til samræmis við tilskipun 89/48/EBE um almennt kerfi til viðurkenningar á prófskírteinum sem veitt eru að lokinni sérfræðimenntun og starfsþjálfun á æðra skólastigi sem staðið hefur að minnsta kosti í þrjú ár.
3. Ákvæði frumvarpsins miða að auki að nokkru marki að breytingum á löggjöf á sviði ráðuneytisins sem varðar leyfisbundna þjónustustarfsemi málflutningsmanna, fasteigna- og skipasala og niðurjöfnunarmanna sjótjóns.
4. Í bókun 5 með samningi milli EFTA-ríkjanna um stofnun eftirlitsstofnunar og dómstóls er að
finna stofnsamþykkt EFTA-dómstólsins en í 25. og 26. gr. bókunarinnar koma fram reglur um gagnaöflun fyrir dómstólnum sem kosta tvenns konar breytingar á lögum á sviði ráðuneytisins.
Að öðru leyti, frú forseti, vísa ég til þeirra athugasemda sem fylgja með frv. og þeirrar umræðu sem fram fór um það á fyrra þingi og legg til að frv. verði að lokinni þessari umræðu vísað til 2. umr. og hv. allshn.
