[15:58]
Svavar Gestsson :
Virðulegi forseti. Það er rétt sem hér kom fram áður að þessi mál hafa oft verið rædd í þessari virðulegu stofnun en því miður hafa ekki fylgt þeim miklu orðræðum neinar aðgerðir og það er mjög alvarlegur hlutur standandi frammi fyrir þeim veruleika að þessi grein er mjög komin að fótum fram að ekki sé fastar að orðum kveðið. Við sjáum þetta birtast með ýmsum hætti einmitt þessa daga. Hugmyndir einstakra fyrirtækja, t.d. um launalækkun sem hafa birst í fréttum síðustu daga sem verkalýðshreyfingin verður nú að slást við, eru í raun og veru ein afleiðing þess stórfellda vanda sem þessi grein á við að stríða.
Við sjáum það líka í þessu sambandi hvað það er háskalegt að þessi grein standi jafnilla og raun ber vitni að það er verið að brjóta grundvöll undan mjög veigamiklum þætti verkmennta á Íslandi. Þar er ekki bara um að ræða málmiðnaðargreinar, þar er líka um að ræða tréiðnaðargreinar og rafgreinar af ýmsu tagi þannig að hér er augljóslega veruleg vá fyrir dyrum ef svo heldur fram sem horfir. En hvernig horfir? Það horfir þannig að þessi grein leggist niður alveg á næstunni, að það verði enginn skipasmíðaiðnaður á Íslandi alveg á næstunni og að þeir sem vilja sjá skipasmíðaiðnað á Íslandi verði að fara hið fyrsta á staðina til þess að kynna sér hvernig sú starfsemi hefur verið stunduð um áratuga skeið því að það er yfirvofandi eins og horfir núna að hún verði ekki stunduð mikið lengur.
Þess vegna þarf ekki fleiri skýrslur og það þarf ekki fleiri nefndir, heldur þarf ákvarðanir og það er auðvitað rétt sem hæstv. iðnrh. sagði að það er ekki einfalt mál að taka ákvarðanir í þessu efni. Ef það væri einfalt mál, þá hefðu þær verið teknar fyrir löngu. En þó eru nokkur atriði sem er þegar í stað hægt að taka ákvörðun um. Ég bendi í því sambandi á það sem kemur fram í samþykkt frá Félagi dráttarbrauta og skipasmiðja um það í fyrsta lagi að felld verði alveg niður lán Fiskveiðasjóðs Íslands til nýsmíða og breytingaverkefna erlendis og samtímis verði lánskjör vegna verkefna innan lands bætt. Þetta eitt mundi gjörbreyta stöðu greinarinnar og ég spyr hæstv. ráðherra: Er hann tilbúinn til þess að taka um það ákvörðun núna að þetta verði gert? Í öðru lagi hafa samtökin bent á nauðsyn þess að stjórnvöld beiti sér fyrir því að lánastofnanir veiti ábyrgðir til verka sem unnin eru í íslenskum skipasmíðastöðvum. Í þriðja lagi hefur verið bent á að íslenskum skipasmíðastöðvum verði ávallt gefinn kostur á að bjóða í nýsmíði og viðgerðir á skipum fyrir íslenska aðila þegar lán eru veitt til slíkra verkefna af opinberum lánastofnunum. Þá er lagt til af stofnuninni að skip smíðuð á Íslandi fái aukakvóta úr Hagræðingarsjóði og loks að íslenskur skipasmíðaiðnaður fái fulltrúa í stjórn Fiskveiðasjóðs eins og hv. 5. þm. Vesturl. rakti hér áðan.
Það er með öðrum orðum augljóst mál að það liggja fyrir tillögur sem er hægt að taka um ákvörðun hér og nú. Það þarf ekki fleiri utandagskrárumræður, það þarf ekki fleiri skýrslur, það þarf ekki fleiri nefndir, það þarf ákvörðun. Og það þarf ákvörðun sem er af því tagi að iðnrh. taki fram fyrir hendurnar á viðskrh. Vandi skipasmíðaiðnaðarins á undanförnum árum hefur verið sá að viðskiptaráðherrann réði ævinlega fyrir iðnaðarráðherranum. Nú þarf þetta að snúast við. Nú þarf þjóðin að eignast kjarkmikla iðnaðarstefnu sem þorir að taka á málum þessara greina og við höfum ákveðið í iðnn. Alþingis að fara í þessi mál sérstaklega, en mestu veldur þó ráðherrann í þessu efni og ríkisstjórnin. Ég skora á hann að ýta viðskiptaráðherranum til hliðar um sinn og halda þannig á málum að iðnaðarráðherrann fái einu sinni að taka á verkefni af þessu tagi. Það hefur hann ekki fengið nú um nokkurra ára skeið. Nú er tækifæri til að brjóta í blað í þeim efnum.