[16:04]
Ingibjörg Pálmadóttir :
Virðulegi forseti. Ég vil byrja á að þakka hæstv. viðskrh. fyrir að minna okkur á um hvað þessi utandagskrárumræða fjallar því hér hefur verið rætt vítt og breitt um ýmis önnur atriði. Þessi utandagskrárumræða átti alltént að fjalla um dóm Hæstaréttar Íslands um skattgreiðslur vegna kaupa á veiðiheimildum. Dómur Hæstaréttar er ótvíræður varðandi skattalega meðferð á keyptum aflaheimildum og í fullu samræmi við það sem löggiltir endurskoðendur þessara sjávarútvegsfyrirtækja hafa meðhöndlað þennan kvóta. Það er því raunverulega ekkert nýtt í málinu, ekki nokkur skapaður hlutur nema það að Hæstiréttur hefur kveðið upp sinn dóm um skattalega meðferð kvóta. Þessi utandagskrárumræða hefði eins getað farið fram í fyrra eða hittiðfyrra. Það eina sem menn gætu kannski talað um er fyrningarhlutfallið vegna þess að þar er breyting á varðandi það sem verið hefur og verður framvegis.
Ég get ekki séð, og það hefur verið margsannað í umræðunni, að þetta breyti núgildandi ákvæðum í löggjöfinni. Það er alveg ótvírætt í 1. gr. laga um stjórn fiskveiða að nytjastofnar Íslands eru sameign þjóðarinnar og það breytist ekkert við þetta. 67. gr. stjórnarskrárinnar um að almannaréttur geti aldrei orðið eign einhvers einstaklings er auðvitað svo ótvíræð að menn þurfa vart að ræða það. Ég hef heldur ekki heyrt nokkurn mann á Íslandi andmæla því nema ef vera skyldi starfsmaður LÍÚ sem hv. 3. þm. Vesturl. vitnaði í áðan. (Gripið fram í.) Hv. 3. þm. Vesturl. kallar hér fram í, ég heyrði hvorki Jónas né Kristján segja þetta, en hv. þm. fullyrðir að svo sé og ég mun athuga það hvort hann hefur lög að mæla í því.
Auðvitað nota andstæðingar núverandi kerfis sér þetta mál. Það er ekkert óeðlilegt þó svo að út af fyrir sig, eins og Sigurður Líndal segir í Morgunblaðinu í gær, er þetta eins og sandkorn. Þetta er eins og lítið sandkorn bæði fyrir þá sem styðja kvótakerfið, og ég vil bæta við, þá sem styðja ekki kvótakerfið.
Ég sakna þess verulega í máli hv. 3. þm. Vesturl. að hann skyldi ekki koma með stefnu Alþb. í sjávarútvegsmálum, ég sakna þess verulega og það voru fleiri hér sem söknuðu þess. Mér fannst gæta mikils tvískinnungs í ræðu hans þar sem hann sagði í sama orðinu að það væru fáir einstaklingar sem fengju að nýta þennan rétt en um leið að ríkið væri að eignast þennan kvóta í gegnum bankana annars vegar og hins vegar að bæjarsjóðir væru að eignast kvótana. Því miður er þetta alveg rétt hjá hv. þm. En það sem er réttast er að lífeyrissjóðirnir í landinu eru orðnir stærstu eigendur þessara fyrirtækja og það getur varla verið slæmt því hver á lífeyrissjóðina aðrir en fólkið í landinu? Ég spyr hv. þm., er það slæmt?
En það er annað kannski sem menn gætu haft áhyggjur af vegna þess að það er það fjármagn sem er að koma inn í sjávarútvegsfyrirtækin og núna síðast inn í Útgerðarfélag Akureyrar. Ég held ég fari rétt með það að það voru lífeyrissjóðirnir sem keyptu langstærsta hlutann af þeim 160 millj. sem voru boðnar þar út. Og við höfum auðvitað áhyggjur af því að lífeyrissjóðirnir fari að fara með þetta fjármagn úr landi og við höfum heyrt að þeir séu á leiðinni með sitt fjármagn út, að fjárfesta erlendis.
En mér fannst þetta ekki koma alveg heim og saman, að þetta væri að fara á fáar hendur á sama tíma og ríkið var að eignast þetta, bæjarfélögin voru að eignast þetta o.s.frv. Það kom ekki heim og saman.
Auðvitað verðum við að ætlast til þess að hæstv. ríkisstjórn hafi stefnu í sjávarútvegsmálum. Ég sakna þess verulega að það forgangsverkefni sem átti að vera á þessu þingi, að leggja fram sjávarútvegsfrumvörpin, skuli ekki vera komið fram. Ég sakna þess verulega, hæstv. sjútvrh. Ég veit að hann er í miklum vanda vegna þess að það er ekki samkomulag um eitt eða neitt í þessari ríkisstjórn og allra síst um þessi mál. En erfiðleikarnir í sjávarútveginum eru slíkir að þjóðin þolir ekki ríkisstjórn sem er ekki með stefnu í sjávarútvegsmálum, vegna þess að sjávarútvegsmál koma okkur öllum við. Hverju einasta mannsbarni í landinu vegna þess að við lifum á sjávarútvegi og munum gera. (Gripið fram í.) En af því að hæstv. umhvrh. er hér að rabba við mig í ræðustól þá langar mig til að heyra hvað líður stefnu Alþfl. sem var fyrir skemmstu kynnt fréttamönnum? Ný stefna, alla vega hvað varðar smábátaútgerð. Það er fróðlegt þegar menn eru á annað borð farnir að fara vítt og breitt um að fá þá stefnu upp á borðið.
Ég ætla að halda áfram að ræða við hæstv. sjútvrh., sem ég er farin að samhryggjast, ég verð að segja það. Ég er farin að samhryggjast honum þegar hann verður nú að selja veiðileyfi Hagræðingarsjóðs hæstbjóðendum vegna þess að hann kemst ekkert áfram með ný lög í staðinn fyrir það að hægt væri að bæta byggðarlögum sem hafa orðið fyrir mestu skerðingu í þorskveiðum með því að úthluta þeim þessum aflaheimildum. Auðvitað er það alveg ólíðandi að hér sitji ríkisstjórn sem er ekki búin að endurskoða þessi lög sem við viðurkennum öll að margir gallar eru á sem þarf að sníða af.
Það eru stór orð þegar hv. 3. þm. Vesturl. talar um höfuðatvinnugrein þjóðarinnar sem algjöra glæpastarfsemi og það er ekki hægt að skilja annað en þetta sé algjör glæpalýður sem við þennan atvinnuveg starfar. Það var ekki hægt að skilja orð hans öðruvísi. Ég veit ekki betur en að flestir sem við þennan atvinnuveg starfa séu dag frá degi að gera sitt besta, en það er mjög auðvelt að gera alla hluti tortryggilega. Í sambandi við frjálsa framsalið, sem eðlilega er mikið ágreiningsmál, þá vitnaði hv. þm. Anna Ólafsdóttir Björnsson í svar vegna þess fjölda af framsölum á aflaheimildum sem hefur átt sér stað. En ef menn mundu skoða þessi svör vel og skoða hvað er á bak við þau, hvað er á bak við mörg þessara svara? Það er ýmislegt. Það er verið að hagræða innan greinarinnar og víðast hvar er það þannig t.d. að í staðinn fyrir að menn séu að vinna karfa þá vinna þeir þorsk, allt eftir því sem þeir eru búnir að festa sölu á erlendis. Þetta er ekki bara það að menn séu með kvótabrask eingöngu sér og sínum til yndisauka. En kannski þurfum við engu að kvíða. Ef Morgunblaðið segir rétt frá þá er formaður Farmanna- og fiskimannasambandsins að boða nýjan flokk manna sem eru með nýja sjávarútvegsstefnu og það verður mjög spennandi að sjá það hvað út úr því kemur.
Það er mikilvægt að ræða sjávarútvegsmálin en mér finnst rétt að gera það undir réttum formerkjum.